ANG AKONG PAMAGDOY SA YUTA SA OZ
(Ikawalong Bahin)
MAYO 1. Unang adlaw ni Yoyong sa iyang trabaho. Tungod sa desisyon sa magtiayon nga motrabaho si Yoyong, nalugwayan ang among bakasyon sa Australia gikan sa 37 ka adlaw ngadtos 82 ka adlaw.
Ako ang tighatod ug tigkuha ni Casey sa eskuylahan. Miangay kos maong kaakohan kay mapugos kog baklay ug eksersays.
Matag Sabado ug Domingo na lang makalugar si Yoyong sa pagsuroy kanamo. Gani, basin dili mahinayon ang iyang pag-adto sa Brisbane aron pagtan-aw sa away ni Manny Pacquiao batok kang Jeff Horn didto sa Suncorp Stadium sa Hulyo 2.
Nangita na si Pat ug dugang kalingawan o buluhaton sa balay aron pag-iway sa kalaay. Way problema sa akong kabahin kay malingaw man ko atubangan sa kompyuter. Taas pa ang akong sulatonon ning among pamagdoy sa Australia. Gani, nakasulat
na man kog sugilanon, “May mga Tunob sa Luha sa Baybay sa Brighton-le-Sands”).
Gawas pa, malingaw kos sumpay-sumpay nga mga salida sa Niflix. Nahuman na nako ang tulo ka season sa “Grace & Frankie” ug sa napulog tulo ka episode sa “Cosmos: A Spacetime Odyssey”. Naa na kos episode 9 sa season two sa “Orange is the New Black”. Naa pay mga full length movie nga matan-aw sa You Tube. Ug mapaminawng balita sa “24 Oras” ug ubang estasyon sa telebisyon. Delayed broadcast ang balita gikan sa Pilipinas pero may konsuylo kay walay advertisement.
Kon naay Adlaw ug dili kaayo tugnaw, magbaktasbaktas kos palibot sa Mortdale. Kalagmitan mohapit kos Vinnies pamasin nga may magustohan nga segunda manong baligya. Ang Vinnies gidumala sa St Vincent de Paul Society, usa ka internasyonal nga Katolikong kapunongan. Ang halin sa gidonar nga mga butang (panapot, sapatos, bag, dulaan, libro, ubp.) gamiton sa kapunongan sa katilingbanong serbisyo niini. Daghan ang tigdonar sa Vinnies. Gani, nakapalit kog duha ka paresan sa mahalong sapatos nga wa pa magamit sa presyo nga $ 20 ug $ 25).
Samtang wala pay biyahe sa layong lugar, akong ilakbit pagasoy ang among kasinatian sa pagsuroy sa Sydney Fish Market (Abril 27) ug sa University of Sydney (Abril 28).
Ang Sydney Fish Market naglangkob sa usa ka dunggoanan sa isda, merkado nga pakyawanan sa isda ug menudong palitanan sa lab-as nga pagkaon gikan sa dagat. Sa sulod sa merkado makapalit og lutong pagkaon o makapaluto og isda, pansat ug kasag.
Gitugod sa gobyerno niadtong 1945, ang Sydney Fish Market gihimong pribadong establisimento kaniadtong 1994. Ang merkado nagpungko daplin sa Blackwattle Bay, duha ka kilometro sa kasadpan sa Sydney CBD. Ang Sydney Fish Market maoy ikatulo sa dagkong mga merkado sa isda sa tibuok kalibotan.
Usa kos daghang turista (nga kadaghanan Insek ug Hapon) nga nalingaw pagpanguhag hulagway sa mga produkto sa dagat nga gibayang sulod sa mga bildong estante. Naglaway kong nagtan-aw sa mga pasayan ( king prawn, Tasmanian giant freshwater crayfish, rock lobster, scampi, Moreton bay bug, Balmain bug), mga kasag ( Alaska king crab, spanner crab, Tasmanian giant crab), mga kinhason ( pacific oyster, rock oyster, scallop), salmon ug ubang isda.
Sa among paniudto, nagpaluto mig king crab ug rock lobster. Nag-order sad si Yoyong og makilaw nga pacific oyster.
Among gibisita ni Pat ang akong kanhi sakop sa DILG Provincial Office sa Bukidnon nga kasamtangang nagtungha sa University of Sydney (USyd). Graduate student si Rhona Abadilla ubos sa Australian Awards Scholarship sa Department of Foreign Affairs and Trade. Ang gobyerno sa Australia ang nagasto sa usa ka tuig niyang pag-eskuyla, lakip na ang $2500 living allowance matag bulan, tuition fees, plete sa eroplano ug health insurance.
Ang Central Railway Station (Central) nga nahimutang sa Eddy Avenue, Haymarket, 33 minutos nga daganon sa tren gikan sa Mortdale Station. Nagpaabot na si Rhona sa Grand Concourse sa pag-abot namo sa Central.
Ang main campus sa USyd nahimutang sa Parramata Road sa Camperdown, mga usa ug tunga sa kilometro gikan sa Central.
Nagkasabot ming maglakaw aron masinati sa mga lugar nga maagian.
Natukod sa tuig 1850, ang University of Sydney mao ang unang unibersidad sa Australia. Ang kampus sa USyd giila nga usa sa napulo ka kinanindotan sa tibuok kalibotan.
Luag ang kampus sa unibersidad nga nalatag tadlas sa suburbs sa Campertown ug Darlington, busa didto ra mi dapit sa Quadrangle nagsuroy-suroy. Giubanan mi ni Rhona sa Main Building, Anderson Stuart Building (Sydney Medical School), Madsen Building (School of Geosciences), Institute Building ug Manning House.
Sa Nicholson Museum sulod sa Quadrangle, nalingaw mig tanaw ug kuhag hulagway sa daghang koleksiyon sa kakaraanan sa Ehipto, Gresya, Italya, Cyprus ug sa Haduol nga Silangan.
(PADAYONON)