MELCHOR U. YBURAN, 78
ANG bomberong magbabalak tua na, mituman na sa gitakdang kataposan niyang pagpanaw gikan sa kalibotan sa mga buhi sa edad nga 78 anyos. Si Melchor Ubal Yburan nga bag-o lang gipasidunggan sa Unyon ng Mga Manunulat sa Pilipinas (UMPIL) sa ‘Gawad Pambansang Alagad ni Balagtas sa tula at katha sa Cebuano’ niadtong Abril, 2017, nabugtoan sa iyang kinabuhi ala una ang takna adtong Hunyo 12, 2017.
Mabulokon ug mabungahon ang kinabuhi ni Abay Melchor isip magsusulat sa pinulongan ni Lapulapu ug Humabon. Hanas siya sa balak, sugilanon ug gumalaysay nga maoy hinungdan nga ang pasidungog nga gihatag kaniya sa UMPIL alang sa ‘ tula at katha.’ Niining tuig 2017 ang iyang balak nga “Balak: Impresyon #2”, Bisaya, Marso 15, 1978 nahilakip sa PATIK Postcolonial Cebuano Poetry, antolohiya sa mga balak nga Sinugboanon gikan sa tuig 1947 hangtod 1983 ug gihubad ngadto sa Iningles sa mga estudyante sa ‘ translation class’ ubos ni Dr. Hope Sabanpan-Yu, direktor sa Cebuano Studies Center, University of San Carlos, Cebu City.
Si Abay Melchor natawo sa Suba, Pasil, Cebu City, sa Enero 6, 1939 sa ginikanang Pablo Abayan Yburan ug Escolastica Ubal. Natapos niya ang elementarya sa San Nicolas Elementary School ug nigradwar sa high school sa Cebu Institute of Technology. Nakatapos sab siya sa kursong bokasyonal, stenography ug typewriting sa Cebu Secretarial School. Mikuha og radio operator course sa Universal Radio Institute ug nakapasar sa pasulit pagka radio telephone operator sa tuig 1964. Nagpaenrol sa Bachelor of Science in Criminology sa University of the Visayas, apan usa ka tuig ray iyang nahuman. Naghupot siyag ‘ eligibilities’ sama sa firefighter, fireman first class, fire officer 2nd class ug police officer 3rd class.
Human makaalagad og 18 ka tuig kapin sa Cebu City Fire Dept.
nanimpalad siya sa Kingdom of Saudi Arabia ug mialagad sa Dharan International Airport isip bombero sa Crash and Rescue Fire Dept. sulod sa kaping upat ka tuig.
Premyadong magbabalak si Abay Melchor sa dekada ’70 hangtod ’90. Iyang nailok ang unang ganti sa Allego Poetry Award ug ang unang ganti sa Inter-School Balak Contest, USC Cultural Center, atol sa kasumaran sa adlawng natawhan ni Don Sergio Osmena, Sr. sa Sept. 9, 1978. Tungod sa pagdaog niyag lima ka unang ganti sa bangga sa balak, gituboy siya sa Bahalad Hall of Fame niadtong Mayo 19, 1990.
Ang una niyang balak nga napatik sa Bisaya mao ang “Ikaw, Angelita, Ikaw Gayod Kadto”, Hulyo 9, 1958. Misunod ang “Bayaning Hinikalimtan”, Marso 25, 1959.
Naminyo siya kang Angelita ‘Angeling’ Gonzales, usa ka magaawit ug igsoon sa nabantog nga mga mag-aawit kanhi sa Sugbo, ang BIMBOMBA Brothers.
Aniay balak ni Abay Melchor nga nahipos ning tagsulat. Napatik kini sa Bisaya sa tuig 1974. TING-ANI
Niining buntag sa ting-ani,
Hanggapa ang kabugnaw Sa lab-as nga huyuhoy…
Ug sud-onga ang nagalawod Ug nangahinog nga kahumayan.
Di ba imong maaninaw Ang katumanan sa mga pag-antos
Nga kanhi nag-itos Sa mga singot mo,
Ubos sa naglagiting kainit Nga gisaliyab sa panahon…! Pamatia ang awit sa ting-ani
Nga buhing nagadasig Sa matag balatian…
Ug ibayaw ngadto sa Langit Ang kinasingkasing pasalamat,
Nga ning kainit karon Nga gihuyatid sa kahaponon,
Nagpasidaan kanimo… Nga natapos na ang pag-antos,
Ug dawaton mo na ang Bililhon, bulawanon mong ganti.