RESULTA SA ESKOM GIBANABANA SA KOMITE
HUMAN sa usa ka semana gikan sa pagpahigayon og Espesyal nga Nasodnong Kombensiyon (ESKOM) sa Lubas sa Dagang Bisaya kun LUDABI, Inc., niadtong Abril 29-30, 2017, ang Komite Ehekutibo nagtigom. Kining tagsulat nga maoy chairman sa maong kombensiyon maoy nagpatawag sa tigom aron banabanaon ang kalamposan nga nakab-ot ug tukion ang pipila ka kakulangon nga angayng likayan sa umaabot.
Kompleto ang walo ka sakop sa EHEKOM sa ESKOM nga nagtigom. Sila si Atty. Leo M. Zaragoza, ang chairman sa Ways and Means kinsa siya usab ang tagbitang sa Kausaban sa Batakang Balaod; kanhi NP Roy Trinidad, ang natudlong tagbitang sa KOMSAPIL; si Alagad ni Balagtas Marcelo Geocallo, ang UMPIL awardee nga maoy nagkoordinet sa mga pagdapit; si Pamuno sa Sanga Frank Dosdos; si Nestor Degoma, ang gisangonan nga tagbitang sa Pasidungog ug mga Sertipiko sa Pagtambong; uban usab ang kalihim sa ESKOM nga si Ginang Gilthrod Dingding, ang mamahandi nga si Ginang Diana Flores ug ang direktor sa ESKOM. Ang natala nga mga nakab-ot sa pagdumala sa maong kombensiyon mao kining mosunod: 1) Kasiyaman ug upat (94) ang tanan-tanan nga narehistro sa ESKOM. 2) Katloag unom (36) ang nanumpa pagkasakop nga nagpuyo sa Iligan ug kawhaag pito (27) ang dili taga Dakbayan sa Iligan. 3) Ang rehistrasyon sa mga nanambong gitanyag nga walay bayad. 4) Mitabang ang kagamhanan sa siyudad
pinaagi ni Halangdong Mayor Celso G. Regencia nga maoy nagtubag sa lima ka kan-anan, tulo ka timo-timo, ug libre nga pagpuyo ug pagkatulog didto sa Macapagal Ancestral House, sa Timoga, Iligan City. 5) Libre usab ang gihimong pagpanuroy ( tour) ubos sa pag-ayuda sa City Tourism Office, apil na ang paghatodkuha didto sa Laguindingan Airport ni Dr. Jes Tirol nga maoy nagbasa sa Mensahe ni PLLO Sec. Adelino Sitoy sa Malacañang. 6) Nakapahigayon og tulo (3) ka mubong pasinati bahin sa Batadilang Binisaya nga gipadayag nila ni kanhi NP Dr. Jes Tirol sa Bohol, Atty. Cesar Kilaton sa Cebu ug Emeliano De Catalina sa Sugbo. 7) Nakaparipa og door prizes nga mikantidad og P10,000 pesos. 8) Nahingpit ang Piliay ug kasamtangang nanumpa ang napulog usa ka sakop sa Hunta Direktiba nga gipangulohan ni Manlalaban Leo Montalban Zaragoza, ang bag-ong napili nga nasodnong pamuno sa kapunongan. 9) Nauyonan ang tanang gisang-at nga kausaban sa Batakang Balaod diin ang labing ulahing kausaban niadto pang tuig 2000. 10) Nakatunol og siyam (9) ka plake sa Pasidungog— upat ka Taliwanon ngadto nila ni Anhing NP Arleigh Sitoy, Nick Maglasang, Teofy Del Mar, ug kang anhing Charter Member Istanislao Empinado, nga niadto lang bulan sa Abril 2017 nanamilit sa dayon; lima ka plake sa Pasalamat ug Pagdayeg nga tinagsang gitunol ngadto nila ni Dr. Jes Tirol, Sec. Adelino Sitoy, Mayor Celso G. Regencia, RTC Judge Alberto Quinto, ang Keynote Speaker, ug plake nga nag-ila kang Marcelo A. Geocallo isip Alagad ni Balagtas 2015. 11) Mikita ang Ways and Means Komite sa kantidad nga P70 mil pesos, nga tupong-tupong lang sa kantidad nga dugang nagasto alang sa ESKOM. 12) Unom ka hut-ong sa maglilingaw mingsalmot sa pagpasadya sa kalihokan ug 13) Ang labing mahinungdanong nakab-ot sa ESKOM mao ang tinguha sa pagpukaw sa dugay nang nahinanok nga Inahang Kapunongan.
Samtang naani ang kalamposan, dili malikayan nga adunay pipila ka kakulangon o kakulian nga salabtonon. Sama sa kakulang sa panahon aron ang tanang nahan-ay sa tulumanon masunod. Ang uban gilaktawan na lang kun giluksoan aron ang mas mahinungdanong bahin maoy unahon.
Sa pagkagabii, katunga na lang ang mingsalmot sa Panagdaitay kun “fellowship” kay daghan ang gusto na mopahulay tungod lagi kay ang gigahing panahon unta ( break time) nga libreng usa ka oras wala na man matuman gumikan sa mga kalangan. Ang takna sa lainlaing bahin sa tulumanon nagsobra, sama sa mga pakigpulong, dugayng panahon nga nagasto sa pagpailaila sa mga delegado nga ang mga ngalang nasuwat lisod basahon, aduna pa gyoy “brownout” sulod sa 30 ka gutlo, ug uban pang kalangan.
Apan gawas niining pipila ka kakulian, ang kinatibukang resulta mao ang kalamposan sa tumong ug tinguha sa Kombensiyon nga mao ang pagpalagsik og balik sa Inahang Kapunongan nga dugay nang naglubog sa kaluya sukad pa sa pagtaliwan ni Kanhi Pamuno Arleigh Sitoy.
Ang kalamposan sa Espesyal nga Kombensiyon uban ang dugokan, “Ang Pagbakyaw sa Lubas sa Halaman ug Kulturang Bisaya” nakadawat og grado gikan mismo sa Komite Ehekutibo sa ESKOM nga 85% porsento sa nakab-ot niini nga kahimoan ug kalamposan.—