MALACAÑANG MOTABANG SA MGA OFW SA QATAR

GIPANEGURO sa Malacañang nga andam silang motabang sa mga ahensiya sa gobyerno kon maapektohan sila sa diplomatic crisis sa Qatar sama sa pagproseso sa ilang repatriation.

Gipahayag kini ni Presidential Spokesperson Ernesto Abella human nga gibugto sa Saudi Arabia, Bahrain ug Egypt ang ilang diplomatic ties sa Qatar ingon man ang United Arab Emirates, Yemen, Libya ug Maldives gumikan sa pasangil nga misuporta kini (Qatar) sa extremist groups lakip ang ISIS.

Mituo ang kagamhanan sa Saudi Arabia nga nag-unang suporter sa mga terorista sa Middle East ang Qatar. Hinuon, gipanghimakak sa gobyerno sa Qatar ang maong akusasyon.

Gibanabanang adunay kapin kun kulang sa 50,000 ka OFWs nga nagtrabaho sa Qatar diin mibisita si Presidente Rodrigo Duterte kaniadtong Abril ning tuiga.

Nasayran nga gisera sa UAE, Bahrain ug Saudi Arabia ang ilang airspace sa Qatar Airways samtang dili pa lang sab dugay nga gikanselar sa Emirate Airways sa Dubai ug Etihad Airways sa Abu Dhabi ang tanan nilang flights paingon sa Qatar.

Gidid-an usab sa nahinganlang mga nasod ang ilang mga residente sa pag-adto sa Qatar ug gipabalik na sab nila sa masignila ka nasod ang ilang mga diplomat nga atua sa Qatar.

Gitagalan sab og 14 ka adlaw nga ultimatum ang Qatari citizens sa pagbiya sa nahisgotang mga nasod.

Gisera na sa Saudi ang ilang mga border nga nagdugtong sa Qatar ug gibabagan ang mga delivery sa mga pagkaon ug uban pang suplay paingon sa Qatar. Tungod niini, inanay na nga nahurot ang mga baligya sa mga supermarket gumikan sa panic buying. – TNB