Mirror Of Fortune
(ANG INYONG KAPALARAN SA HUNYO 28 – HULYO 4, 2017)
PISCES – (Pebrero 20 – Marso 20) – Makadiskobre kag tinagoan nga makahatag kanimog kadasig sa pagpaningkamot. Makahinuklog ka sa nasaksihan mong panghitabo. Matugkad mo na ang kamahinungdanon sa pag-apil sa kalihokan sa simbahan. Maanod kas kahidlaw. Sabado ang suwerte mong adlaw ug 4, 6, 5 ang palaran mong numero.
ARIES – (Marso 21 – Abril 20) – Niining semanaha makahagdaw kag importanteng impormasyon nga magamit sa imong pagpanukiduki. Ipadayon mo ang imong interes bahin sa electronics. Ayaw paglunga sa pagkab-ot sa imong ambisyon. Mosamot ang kalalim sa romansa. Suwerte mong adlaw ang Huybes ug palaran mong numero ang 7, 8, 9.
TAURUS – (Abril 21 – Mayo 21) – Di ka magpatibaong sa mga panagway sa ubang tawo. Ipadayon mo ang imong pagpanglimbasog alang sa kabulahanan sa imong pamilya. Makatapos ra unya ang imong mga anak sa ilang pag-eskuyla. Ayaw paglugak. Makahangos ka sa kalalim. Domingo ang suwerte mong adlaw ug 6, 2, 3 ang palaran mong mga numero.
GEMINI – (Mayo 22 – Hunyo 21) – Niining semanaha daghan ang makamatikod sa madanihon mong awra. Magpabilin ang imong katahom bisan sa pagpanglabay sa panahon. Alingahon mo ang imong pahat nga trabaho sa simbahan. Mahuwasan ra ang imong kahidlaw. Suwerte mong adlaw ang Biyernes ug palaran mong numero ang 8, 4, ug 3.
CANCER – (Hunyo 22 – Hulyo 22) – Angayng analisahon mog maayo ang usa ka kasabotan sa di ka pa mosanong. Pagmatngon kay basig malingla ka. Ayaw pagpahaylo sa matam-is nga mga pulong. Makadawat kag sorpresang balita. Makahibalag kag binuhat nga mahalon. Biyernes ang suwerte mong adlaw ug 5, 9, 3 ang palaran mong numero.
CAPRICORN – (Disyembre 22 – Enero 21) – Himoon kang ehemplo sa imong manghod. Dako na ang kausaban sa iyang batasan. Di mo ihikaw ang paghatag og suporta kaniya aron magmalamposon siya. Di mo malimtan ang pagserbisyo sa simbahan. Masabtan mo ang mensahe sa kidhat. Martes ang suwerte mong adlaw ug 5, 6, 7 ang palaran mong numero.
LEO – (Hulyo 23 – Agosto 23) – Niining semanaha likayan mo na ang pag-abuso sa imong lawas. Angayng sundon mo ang gipahimangno sa doktor. Ipadayon ang imong regular nga pag-eksersays. Makabalik ka na sa imong trabaho. Motaas ang imong kadasig human sa seks. Suwerte mong adlaw ang Lunes ug palaran mong numero ang 4, 6, ug 8.
VIRGO – (Agosto 24 – Septiyembre 23) – Makabig ang imong atensiyon sa mapuslanong tinguha. Isentro mo ang imong panahon nga makat-onan mo ang epektibong pamaagi nga maimplementar ang imong plano. Di mapiog ang imong baroganan. Matagbawon ang romansa. Miyerkoles ang suwerte mong adlaw ug 3, 7, 5 ang palaran mong numero.
LIBRA – (Septiyembre 24 – Oktubre 23) – Niining semanaha mapukaw ang imong kahimatngon bahin sa paglig-on sa pagtuo sa Diyos. Biyaan mo na ang imong mga bisyo. Mosubay ka na sa tul-id nga dalan sa kinabuhi. Agakayon mo ang imong igsoon. Patughan mo ang imong kahidlaw. Suwerte mong adlaw ang Martes ug palaran mong numero ang 6, 2, 8.
SAGITTARIUS – (Nobiyembre 23 – Disyembre 21) – Niining semanaha alingahon mo ang pagugmad sa imong personalidad. Paningkamotan mong makab-ot ang kalamboan nga gitagana kanimo. Ayaw kalimot sa pagsangpit sa Ginoo. Di makawang ang imong gipangandoy. Mainit ang romansa. Suwerte mong adlaw ang Huybes ug palaran mong numero ang 9, 2, 1.
SCORPIO – (Oktubre 24 – Nobiyembre 22) – Mobathay sa imong panagway ang kamasadyaon. Makab-ot mo ang katumanan sa imong ambisyon. Makatabang ka na sa pagpaeskuyla sa imong manghod. Makatrabaho ka sa abroad. Maugmad pa ang imong talento. Makawiwili ang romansa. Domingo ang suwerte mong adlaw ug 4, 7, 3 ang palaran mong numero.
AQUARIUS – (Enero 22 – Pebrero 19) – Niining semanaha di ka magpaulahi sa pagpangaresgar aron mahatag mo ang panginahanglan sa imong estudyante. Sudlan mo ang tanang matang sa panginabuhi. Taposon mo ang nataligam-an mong buluhaton. Makapiyong kas kalalim. Suwerte mong adlaw ang Lunes ug palaran mong numero ang 8, 4, 1.