MAYMAY ENTRATA PADAYON ANG PAGSIKAT; ALBUM SA KANTA MI-GOLD DIHADIHA

WALA damha nga ang unang album ni Maymay Entrata mihalin dayon ug karon giila nang Gold Record. Gisugdan pagbaligya ang album kaniadtong Hunyo 21 didto sa SM City North EDSA Skydome nga sa sulod lang sa upat ka adlaw mihalin dayon og 7,500 ka kopya.

Si Star Music A&R Jonathan Manalo naghatag dayon og award nianang Hunyo 25 sa programang ASAP sa Kapamilya Network.

Nagpahayag dayon si Maymay sa iyang dakong pagpasalamat sa Star Music, Star Magic ug sa iyang loyal fans sa hugot nga pagsuporta sa iyang karera.

Sumala sa Philippine Association of the Record Industry (PARI), ang album sa mga kanta makadawat dayon og gold certification kon mohalin og dili momenos sa 7,500 ka kopya sa Pilipinas.

Sa iyang kalipay, wala makapugong si Maymay sa paghisgot sa panahon nga nagdamgo ug nangandoy pa siya nga mahimong usa ka recording artist.

Niya pa, “Noon po kasi parang pa char-char lang na compose, compose at pagkanta pero ngayon bigla na ibinigay sa akin. Masayangmasaya po ako sobra talaga, lalo na sa mga na-inspire sa buhay ko talaga, kaya natupad din ‘yung mga ultimate dreams ko din.”

Dugang niining tanan, sa iyang instagram, gisubli niya ang dako kaayong pagpasalamat sa Star Music nga gibuligan siya nga matuman ang dako kaayo niyang damgo ug ngadto usab sa iyang fans nga way hunong mingsuporta kaniya sukad pa sa sinugdanan.—