ANG MAGBUBUHAT...

magbuot sa ngalan niini, pinuy-anan, kahimtang sa kinabuhi ug sa dangatan sa palad niini. Kon mahimo pa lang moreklamo ang usa ka karakter ngadto sa awtor ngano nga hilabihan ang mga kasakit nga iyang gipas-an; o ang kontrabida ngano nga hilabihan siya kadaotan ug kamatayon lang ang padulngan niyang kataposan. Ang Magsusulat Ug Ang Magbubuhat Ang Magbubuhat ba sama sa magsusulat? May eskrip na ba Siyang gihan-ay nga maoy dangatan sa mga butang, sa kapanahonan, sa kalibotan ug sa tibuok uniberso? Gilatid na ba Niya ang padulngan sa kinabuhi sa tawo?

Sa tawo nga malamposon diha sa iyang mga paningkamot sa kinabuhi, sayon ra ang pag-ingon nga bunga sa iyang mga paningkamot ang iyang mga nakab-ot. Sa laing bahin, sila nga mga pakyas moingon, ‘Pagbuot sa Ginoo!’— mga linya nga kasagaran imaymay ngadto sa mga nahiagom og grabeng kasakit ug pagsulay. Sa laing bahin, may mga tawo usab moingon nga kon wala pa modangat ang usa ka daotang hitabo, dili unta siya magmalamposon sa kasamtangan.

Gihimong usa sa mga frontliner sa gubat ang sundalong si Uria aron mamatay ug maangkon ni Haring David ang asawa niining si Batseba. Unya, si David ug Batseba nakabaton og anak nga lalaki— si Solomon— nga mipuli kang David sa gingharian ug nahimong labing batan-on ug labing maalamon nga hari sa iyang panahon. Nan, gihan-ay na ba daan kadtong pagpakasala ni Haring David? Kon wa kadto niya buhata, wala untay Haring Solomon?

Gitagna ni Jesus nga molimod si Pedro makatulo ug nga magbudhi si Hudas ug natuman gayod. Kon ako pay Pedro o Hudas, di ba diay ko magpabelib sa akong Magtutudlo ug ipakita nga dili mahitabo ang Iyang giingon? Sa bisperas sa paglansang, didto sa tanaman sa Getsemane, mihangyo ang Mesiyas ngadto sa Amahan nga kon mahimo dili idayon ang maong kasakitan apan ‘matuman ang Iyang pagbuot’.

Kon wa pa patya si Ninoy mahitabo kaha ang rebolusyon sa Edsa? Ang pagtaliwan ni Cory Aquino sa nagsingabot ang presidential election 2010 mao bay hinungdan nga nakuha ni Noynoy ang simpatiya sa mga Pilipinhon ug nagmadaogon siya pagka Pangulo? Pagbuot ba diay sa Diyos kanus-a mamatay ang usa ka tawo? Matod pa ni Rick Warren sa iyang librong The Purpose Driven Life, giplano na daan sa Diyos ang tukmang petsa ug takna kon kanus-a mahimugso ug mamatay ang matag tawo.

Kon eskripted na ang kinabuhi, unsa pa man ang pulos sa pag-ampo?

Ang magsusulat sa nahanunga-tunga na siya sa iyang pagsulat, may mga sirkumstansiya nga makapausab sa dagan sa sinulat. Ang direktor sa usa ka gigaling nga pelikula o teleserye, sa nakita niya ang potensiyal sa usa ka patyonon unta nga karakter, gilugwayan ang papel niini hangtod sa kataposan.

‘ Ang kalan-on namo sa matag adlaw... ihatag kanamo karong adlawa...’ Nganong karong adlawa ra man? Aron ugma magampo na usab? Makanunayong paghangyo! Ang usa ka tawo sa usa sa mga sambingay ni Kristo mibangon gikan sa pagkatulog ug mihatag og pan dili tungod kay higala ang nangayo, kondili, tungod kay nagpunayg panuktok ang higalang nangayo. Ang usa ka huwes mitabang ngadto sa usa ka biyuda tungod sa pagsigeg balik-balik niini. Mao kini ang tinuod nga kahulogan sa grasya: usa kini ka gasa gikan sa Diyos ngadto sa dili unta takos nga mga makasasala. Kon ang higala ug huwes minghatag ug mingtabang niadtong nagsige og balik-balik og pangayo, unsa pa kaha ang Diyos kon ang tawo subli-subling maghangyo ngadto Kaniya?

Kon ang dagan sa sugilanon sa kapalaran kanunay giabyan sa mga suliran ug kasakitan, mas maayo diayng hangyoon nga makanunayon ang Magsusulat nga Magbubuhat nga ipakanaog ang grasya nga motuis sa estorya ngadto sa happily ever after nga KATAPOSAN.