ANG AKONG PAMAGDOY SA YUTA SA OZ
MAS dali maabot ang Manly kon magsakyanan (mga usa ka oras), apan nakahukom mi nga magsakay og tren gikan sa Mortdale paingon sa Circular Quay, dayon sakay og ferry paingon sa Manly. Tunga sa oras latason sa ferry ang Sydney Heads paingon sa Manly. Daghang taga Sydney ang mosuroy
sa Manly panahon sa Sabado ug Domingo busa puno sa pasahero ang barkong Collary paingon sa Manly Wharf ug sa Freshwater sa among pagbalik sa Circular Quay. Ang duha ka gagmayng barko may kapasidad nga kapin sa usa ka libo ka pasahero.
Ang Manly nga usa ka suburb sa Amihanang Sydney gidugok sa daghang mga tawo tungod sa Manly Beach nga giila nga nag-una ug kinanindotan nga baybay-lulinghayawan sa Australia. Dili momenos sa usa ka milyon ang mamisita
sa Manly matag tuig, 30 porsento niini mga langyaw.
Palis na sa among pag-abot sa Manly. Among gigugol ang tulo ka oras namo didto sa pag- window shopping sa mga tindahan duol sa Manly Corso ( street), pagpakuhag hulagway sa lingkoranan ug estatuwa sa luag nga dalan ug paglakaw-lakaw sa laktanan daplin sa baybay.
Ang komersiyo ug kalingawan sa Manly nasentro libot sa Manly Corso nga nahimutang latas gikan sa pantalan ngadtos dagat nga bahin sa Manly Beach. Daghang kan-anan ang may mga lamesa sa gawas. Alang niadtong naanad nas kabugnaw sa Australia, ganahan silas gawas magkape,
mag-inom og bino ug mangaon. Kami ni Pat nga di kaagwanta sa katugnaw minghangyo kang Yoyong nga adtos sulod sa kan-anan mangaon sa among giorder nga fish & chips, ratatouille veggies ug burger nga panghapin sa tiyan samtang nagbiyahe pauli sa Mortdale.
Maayong magsakay og tren sa adlawng Domingo kay $2.50 ra ang plete sa tibuok adlawng sakay-sakay. Usa nis hinungdan nganong wala mi magsakyanan sa among pagsuroy sa Manly niadtong Mayo 1.—