Gera sa Marawi taposon sa dili pa ang SONA

TANGKOD nga 36 ka adlaw sa krisis sa Marawi, gitinguha sa kagamhanan nga matapos na ang kaguliyang sa maong dakbayan sa dili pa moabot ang Hulyo 24 nga maoy gikatakdang ipahigayon ang ikaduhang State of the Nation Address (SONA) ni Presidente Rodrigo Duterte.

“Matatapos yang Marawi before SONA para maumpisahan na natin yung repair dun ng mga facilities,” pahayag ni Defense Secretary Delfin Lorenzana.

Nagtinguha ang tropa sa gobyerno nga mahuman na ang krisis sa Marawi tungod kay dili man lagi maayo nga magSONA ang presidente kon magsige pa ang pinatyanay.

Sukad nga miulbo ang gubat sa Marawi City kaniadtong Mayo 23, miabot na sa 387 (sa pagsulat niini) ang nangamatay nga naglangkob sa 290 ka Maute, 27 ka sibilyan, ug 70 ang security forces samtang adunay kapin sa 400 nga nangaangol sa habig sa gobyerno.

Sumala ni Lorenzana, mismo si AFP Chief of Staff Gen. Eduardo Año iyang gipangutana ug miingon si Año nga usa hangtod sa duha ka semana matapos na ang kagubot sa Marawi.

Hangtod sa paghikay ning balita, giingon nga ang 150-200 ka hostages maoy nakapalangan sa operasyon sa tropa sa gobyerno ingon man ang nagkatap nga mga Improvised Explosive Device (IED) nga gipanglubong sa grupong Maute sa battle zone.

Midugang sab pag-ingon si Lorenzana nga dili angayng dugayon pa ang krisis sa Marawi City kon manurender na ang Maute pero tungod kay mga terorista man lagi sila manukol gayod kini samtang may gininhawa pa.

Atol gihapon sa pagsulat niini mitala na sa 250 ka armas ang narekober sa tropa sa kagamhanan gikan sa grupong Maute.