DIYALOGO O ENGKUWENTRO?
NAKURAT ang tanan sa gihimong pagpakig-atubang ni Presidente Duterte sa libo ka libong mga walhon nga maisogong nagprotesta batok sa iyang administrasyon atol gayod sa iyang SONA niadtong miaging semana. Makasaysayanon ug wala pay laing presidente sa tibuok kasaysayan sa nasod nga nakahimo niadto.
Tingali gawas sa iyang mga security official ug mga sinaligan, wala gyoy nagdahom nga himoon kadto sa presidente. Nakurat ang tanan, bisan ang maukiton nga media sa gihimo sa pamuno. Tinuod, kinaiya ni Duterte ang pagpakighimamat ug paghatag og panahon sa linawas nga pakigdiyalogo sa masang sektor, bisan kadtong mga nagsupak sa gobyerno labi na sa mahinungdanong mga okasyon sama sa SONA. Gani, makapila na man siya makighimamat linawas ug nakigdiyalogo sa mga nagprotesta labi na sa mga sektor sa walhong grupo nga giila niya nga mga higala. Gihimo na niya kini niadtong una niyang SONA sa miaging tuig. Apan nausab na ang panahon karon. Ang mga walhong sektor wala na moila ug motahod kaniya isip amigo. Kon kanhi mahigalaon ang mga protesta nga gipadayag nila ug wala gyod kini magpunting sa pagsaway kaniya, kondili nagpadayag lang sa mga yangungo nila sa gobyerno, karon pintok na kaayo ang ilang mga pagsaway ug pangatake kang Digong. Gani, sa unang higayon sa iyang ikaduhang SONA, gisunog na ang iyang caricature sa mga raliyista sama sa gihimo niini sa ubang kanhing mga presidente nga nagsimbolo sa dako na kaayo nilang kasilag kaniya. Kining maong mga grupo nga kaalyado sa National Democratic Front ug New People’s Army pagka karon tin-aw kaayong mingsupil ug mingsungag na sa kanhi nilang higala nga si Presidente Duterte.
Nangatarantar bisan ang mga security official ni Duterte niadtong tungora nga nagtan-aw sa presidente nga nagpabantang sa risgo sa iyang kinabuhi diha sa linawas gayong pag-atubang kanila. Security nightmare, matod pa sa maong mga opisyal sa kapolisan nga nagtan-aw sa ilang presidente nga daw nag- suicide na ug wala na kuwentaha ang seguridad sa iyang kinabuhi atubangan sa masuk-anong panon nga nagprotesta batok kaniya. Maayo na lang unta og mabugnawon ug mahigalaon ang iyang mga pulong sa pagpakighinabi kanila. Daw nangasaba ug nagsudya og mga anak ang iyang tono. Apan bisan nagpadayag siyag pintok nga hangyo sa panaghiusa ug paghatag kaniya og higayon aron tumanon ang ilang mga yangungo, mas sipa ang iyang pagbasol sa ilang sektor sa pag- ambush sa mga NPA sa iyang Presidential guards didto sa North Cotabato niadtong miaging
Kini tingali ang hinungdan ngano nga hangtod karon kusog gihapon kaayo ang suporta ug pagdawat sa dakong mayoriya sa mga Pilipino ngadto kaniya.
semana, paminggar na ang iyang mga pulong. Gihagit pa gani niya ang mga raliyista nga kon duna silay armas ug granada mahimo siyang pusilon ug pabuthan ug andam siyang mamatay. Unsa na lang kahay nahitabo kon naay huramentado o mga tawo niadtong liboang panon nga mipalit sa iyang hagit o mihana na ba lang kaha og pasakit kaniya makontrolar kaha sa mga polis ang kahimtang? Dili kaha mobanaw ang daghang dugo?
Bisan klarong nakurat ug wala gyod pod magdahom ang mga nagprotesta nga himoon kadto sa presidente, tinaw sa usa ka punto nga gikahimuot kadto nila. Mingsibaw man ang siyagit sa pagbatikos ug pagsaway nga ilang gipadayag atubangan gyod sa presidente, klarong sa usa ka bahin sa ilang pagbati gidayeg nila ang gipakitang pagka bukas sa pamuno sa nasod ug sa pagtahan niini sa iyang kaugalingon aron makiglambigit kanila, butang nga wala ihatag kanila ni bisan kinsang presidente o taas nga opisyal sa nasod nga ilang giprotestahan kanhi.
Mainiton ug puno sa drama ang gipahigayong ikaduhang SONA ni Duterte. Paglabay sa usa ka tuig sa iyang pangatungdanan, wala pa man tuoy natuman sa iyang gipangsaad sama sa pagpaundang sa droga ug krimen, korapsiyon, ug uban pa dili gyod ikalimod ang iyang kamatinud-anon ug walay undang nga kakugi sa pagporsegir niini. Sama nga wala pod maundang ang pamalikas ug panunglo sa iyang dila nga nagpadayag sa prangka niyang kapikal sa mga nagbabag sa iyang tumong. Kini tingali ang hinungdan ngano nga hangtod karon kusog gihapon kaayo ang suporta ug pagdawat sa dakong mayoriya sa mga Pilipino ngadto kaniya.
Maisog, matinud-anon, makugihon, matinagdanon, pintok ug walay pagpakaaroningnon pagpadayag sa gibati. Mao kana ang dagway ug mga pulong sa pamuno sa ikaduha niyang SONA.
Mao usab kini ang presidente nga nanaog ug nakig-atubang aron makiglalis sa panon sa iyang giila kanhing kahigalaan sa kawsa nga karon mingsaway ug mingtunglo na kaniya. Ug nahitabo ang maong makasaysayanong drama bisan human na ang SONA.
Usa lang ang dili matuis nga katahom sa maong hitabo. Buhi kaayo ug naglihok ang demokrasya sa atong nasod.—