DUGANG KAHULOGAN SA KINABUHI
TUNGOD sa kalawom sa kahulogan sa kinabuhi, dili nato kini undangan pagtugkad. Busa, aniay pipila nga atong ipaambit. Nagtuo ko nga daghan na ang nasayod niini apan daghan usab ang wala pa. Ang dugang kamatuoran nga nagpaluyo sa inuslan natong kinabuhi kon kita motalikod na sa dayon, mao kining mosunod:
Ang salapi ug kabtangan nga atong naangkon lakip na niini ang balay, mga sakyanan, kayutaan, kasangkapan, negosyo ug uban pa, dili gayod kita ang tag-iya kondili gisalig lang kanato ang pagdumala aron atong ikapahamutang ug idapat sa husto ug angayan nga pagpahiluna nga kahimut-an sa atong Labawng Makagagahom nga maoy nagpiyal niini kanato.
Ang atong talento, kahibalo, kahanas ug kabatid, gipanagiya sa kahigayonan ug walay atoa. Bisan gani ang atong kapikas, mga anak, ug uban pang minahal sa kinabuhi, dili kita ang nanag-iya kay giangkon na sila sa kasingkasing.
Tugob sa handomanan ang atong kinabuhi apan walay maato niini tungod kay ang tanan gipanag-iya na sa panahon. Ang atong lawas mismo, kita ba ang tag-iya? Dili gihapon tungod kay sukad pa sa sinugdan iyaha na kini sa abog. Labaw na gyod nga dili kita ang may katungod nga manag-ya sa atong kalag kay kasamtangan lang kining gipahulam sa atong Manggiluy-ong Diyos aron mag-uban-uban kanato ug kuhaon pagbalik sa Ginoo kon mahimulag na sa lawas.
Nan, unsa ra man ang atong mabalon inigpanaw nato sa dayon? Ingon sa wala gayod kitay mapanag-iya kay ang tanan temporaryo lang gipagamit kanato. Apan adunay gitugot sa Kahitas-an nga atong madala sa panahon sa atong pagtaliwan ug kana mao ang daklit nga mga higayon ( moments) sa atong pagkinabuhi. Kon mao ra kini ang bugtong natong maangkon, atong hinuktokan kon unsa ba ang matang sa “daklit nga higayon” nga atong hambinon. Unsa kasagad kita makiglambigit diha sa daklit nga mga higayon? Duha lang ka matang ang mahimong pilian, ang negatibo ug ang positibo. Walay gusto sa negatibong kahimtang nga maoy balonon busa, maningkamot ta nga ang daklit nga mga higayon sa atong pagkinabuhi puno sa katagbaw— sa kalipay, sa pakigdait, sa pagpakabana sa uban, sa pagpaambit sa mga grasya ug mga gasa, sa pagtabang ug sa paghimo sa bisan unsang kahimoan sa buhat sa kaluoy nga atong maabot. Kini atong makab-ot lamang kon anaa kanato ang gugma, pag-antos ug kamapaubsanon.
Pagkasayang kon ugaling ang sukwahing gawi ang buhaton kay wala kiniy kahulogan ug dili takos nga balonon uban sa atong kamatayon kay ang labing nindot nga handomanan nga atong ikapaambit sa atong pagbiya mao ang dalaygong mga buhat nga atong gitigom diha sa daklit nga mga higayon sa atong pagkinabuhi.—