ANINO SA KAAWAY
(KATAPOSANG GULA)
HALOS dungan sa paglanog sa siyagit sa tulo ka babaye nga nangalisang, mingtublaw sa kalikopan ang masipang buto-buto. Dihadiha may mga sakop sa kulto nga nangamatay. Wala ikahinayon ni Ramon Diaz paghansak ang gigunitan nga baraw ngadto sa dughan sa bata nga naghayang ibabaw sa lamesa. Nagkaguliyang ang mga Bangkulisan.
“Mga igsoon!” Mipatigbabaw ang tingog ni Ramon Diaz sa kanta sa mga armas nga tag-as og kalibre. “Ang inyong mga armas! Ang inyong mga armas!”
Nanglihok ang mga sakop sa kulto sa pagkuha sa tagsa-tagsa nila ka armas. Si Ramon Diaz wala mamatikdi nga nahanaw.
Si Victor Foz nahikugang sa kalit nga hitabo. Apan mipasulabi ang gibati niyang kahinangop. Kinsa man kaha ang nagpabuto? Nakasukot siya sa iyang kaugalingon. Apan wala siya makakaplag og tubag sa pangutana nga iyang gisukna.
Mingsukol ang mga sakop sa kulto sa mga nanulong. Tagas usab ang ilang mga hinagiban. Wala sila magpaalkanse sa sinukliay sa mga bala. Daghan na ang minghay-ad ug nakabsan sa kinabuhi.
Mibatig kahinugon si Victor sa higayon nga nausik. Kon wala pa siya gaposa, higayon na unta niya kini karon. Apan lisod kaayong badbaron ang malig-ong pisi nga gibalighot sa iyang mga tiil ug kamot.
Taudtaod, dihay mga anino nga kalit nangguho sa kangitngit ug mipaduol sa ilang nahimutangan. Nakugang si Victor. Mga polis ang nahiabot. Maoy nangulo kanila si Lt. Valera.
Gibadbad sa mga polis ang gapos sa mga dinakpan sa mga Bangkulisan. Dihang nakabuhi na, si Victor maoy nagmaniobra pagluwas kang Inday Shantal. Gikoberan siya sa mga polis nga nakigpinusilay sa mga sakop sa kulto.
“Sarge!” Gisangpit ni Valera ang polis nga diha sa iyang duol. “Kamo nay bahala nila ni Padre Daniel ug mga kauban. Iseguro sila sa safe nga lugar.” “Yes, Sir,” sanong sa polis. Gidala sa upat ka polis sila si Padre Daniel ug mga kauban pahilayo sa dapit diin nahitabo ang pinusilay. Apan nagpabilin si Victor. Miabag siya sa kapolisan nga nakigsangka sa mga sakop sa kulto.
Si Victor nahisama sa usa ka leyon nga bag-ong nakagawas sa tangkal, nagbahis pag-ayo. Duha ka armas ang iyang gigunitan, armalite ug .45 kalibre, nga pulos nakuha niya gikan sa mga sakop sa kulto nga napatay sa kapolisan. Walay puas ang iyang pagpabuto. Ang mga kaaway nagkapulikig tago sa kabatoan ug sa mga punoan sa kahoy. Ang rebulto sa mananap nabungkag nga naigo sa iyang pagpusil.
Taliwala sa sinukliay sa mga bala, gipangita ni Victor si Ramon Diaz, ang supremo sa kulto. Kaganina ra siyang wala makakita niini. Wala siya makaalinggat kon diin kini mopaingon pag-ulbo sa pinusilay gumikan sa kakalit sa hitabo. Dili siya makatugot nga makaikyas kini. Kinahanglang madakpan si Ramon Diaz aron pabayron sa nahimo niining mga kasal-anan ilabi na gayod sa pagpatay niini sa iyang mga ginikanan.
Nagpadayon ang makabungol nga pinusilay. Maayong pagkapuwesto ang mga tinugyanan sa balaod. Ang kahayag sa Buwan ug sa mga sulo nakatabang sa mga polis sa sayon nga pagluthang sa mga Bangkulisan. Sa matag karon ug unya duhawitan ang mga buto-buto sa makalilisang nga tig-ik sa kamatayon. May mga inagulo nga nanikop og hangin nga ikadugang sa nagkapupos nga gininhawa.
Hangtod nga nagkaatubang na gayod sila si Victor ug Ramon Diaz. Gikasugat niya kini dihang mihana siyag sulod sa baba sa langob. Miuna kini pagpusil kaniya. Maayo gani kay nakaipli siyag dali luyo sa usa ka dakong bato. M-203 ang giamit sa supremo sa kulto.
Dihang milunga pagpusil ang supremo, mikalit si Victor paggawas sa iyang gitagoan aron mobalos sa pagpabuto. Apan igo na lang mipiti ang duha ka armas nga diha sa iyang kamot. Wala nay bala! Ug nabati niya ang lanog nga katawa sa supremo sa kulto.
“Mao na kini ang imong kataposan, Mr. Foz,” nagkanayon si Ramon Diaz.
Midali si Victor pagbalik og pasalipod sa dakong bato. Wala na siya masayod kon unsaon niya pagpanalipod ang iyang kaugalingon. Gibuhian niya ang duha ka armas nga wala nay silbi. Si Ramon Diaz nagpadayon sa pagpabuto nga ingon sa nag-anam og kaduol sa iyang gitagoan.
Nangandam si Victor. Gipaod niyag maayo ang iyang bukubuko sa gipasalipdan nga bato. Nanukad siyag maayo. Dihang nahatungod na kaniya ang supremo, kalit niyang gigunitan ang tumoy sa armas niini ug gibunlot. Nakalitan ang supremo. Wala kini makalihay dihang iyang gibuhian ang makusog nga kinumo nga didto motugpa sa apapangig niini. Mialipadsay ang supremo ug nabuhian ang M-203.
Gigamhan sa tumang kalagot, gitumong ni Victor ang M-203 nga diha na sa iyang mga kamot ngadto kang Ramon Diaz. Gikablit niya kini apan igo na lang mipiti. Nahutdan na usab kinig bala! Nakita niya ang supremo nga midali paglanit sa .45 kalibre nga gisuksok sa hawakan niini. Midali si Victor sa pagpasalipod sa dakong bato.
“Mamatay ka na, Victor Foz.” Nabati niya ang tingog sa supremo nga naglagarat sa tumang kalagot. “Patyon ko ikaw!” Bang! Bang! Bang! Bang! Gikitkit sa mga bala ang bato nga gipasalipdan ni Victor. Samtang nagpasalipod, miliraw ang mga mata ni Victor sa palibot aron pagpangitag sulbad sa iyang suliran. Nagkinahanglan siyag armas. Apan wala siyay nakitang tubag sa iyang panginahanglan. Misaog kaniya ang kabalaka. Nasayod siya nga si Ramon Diaz nag-anam na usab og paduol sa iyang nahimutangan.
Takulahaw lang, nahinumdom siya sa iyang cellphone. Nahinangop siyang nahinumdom sa maong butang. Maayo gani kay wala kini kuhaa sa mga sakop sa kulto dihang nadakpan siya nila. Dihadiha, gikuha niya ang cellphone sa bolsa sa iyang diyaket. Mingkitiw lang ang iyang mga tudlo nga mitulpok sa keypad niini. Gi- set niya sa type 13 ang ringtone niini ug gipislit ang asterisk zero-zero-seven aron mahimo kining cellgun. Ug nangandam siya sa iyang kaugalingon alang sa naumol niyang laraw sa paglit-ag sa kaaway.
Mihata si Victor paggawas gikan sa iyang gipasalipdan. Gipusil gilayon siya ni Ramon Diaz. Mibalik siya pag-ipli. Kadtoy kabahin sa iyang estratehiya aron pagsuta kon unsay posisyon sa kaaway.
Mihinok siyag lipot sa pikas bahin sa bato aron pagsignit sa supremo. Apan misantop usab tingali sa supremo ang nahunahunaan niyang paagi. Wala damhang nagkasugat sila sa iyang pagpamidpid sa kilid sa dakong bato. Managsama silang nakugang. Apan si Victor maoy daling nakahunahunag maayo. Kilatnon niyang gisagpo ang kamot sa supremo nga naggunit sa pistola ug gilubag kini. Giisa niya kini aron adto makabuto sa ibabaw dungan ang pagtulpok sa send button sa cellgun nga diha
Bangis ang panagsangka nila ni Victor ug Ramon Diaz. Kinahanglan nga usa kanila ang matapos…
sa pikas niyang kamot. Milanog ang lima ka buto. Ang supremo natusak sa mga bala nga migawas gikan sa antenna sa cellgun. Nahagba kini sa yuta ug mikirig. Ang pistola niini diha na sa kamot ni W-7.
Mihinay paglakang si Victor ug mipaduol sa nahagbaan sa supremo. Gitino niya kon patay na ba gayod kini. Nasuta niya nga wala na kiniy kinabuhi. Gitutokan niya pag-ayo ang nagbuyod nga lawas sa supremo. Milakdop sa iyang hunahuna ang iyang mga ginikanan. Gikapanimalos ko na gayod sila! Milanog kining mga pulonga sa lawak sa iyang hunahuna. Pagkilab sa pipila ka daklit, miusa pagtang-on ang buto-buto. “Men,” nabati ni Victor ang tingog ni Lt. Valera nga maoy nangulo sa operasyon sa mga tinugyanan sa balaod. “Search the area!”
Mingkiros ang mga polis. Gituman nila ang mando sa tenyente. Niining higayona, namasibas na ang subangan, timaan nga nagsingabot na ang kabuntagon.
“Wala ka ba maunsa, Sir,” nagkanayon si Lt. Valera nga miduol kang Victor.
“Wala,” mubong tubag ni Victor. “Salamat nga nahiabot mo. Pero abi kog patay ka na usab tungod kay gipusil ka man sa mga sakop sa kulto didto sa kuwerpo.”
“Gisuwerte pa gyod, Sir,” matod ni Valera. “Nakasulob kog bullet proof dihang gipusil ko sa mga sakop sa kulto. Nakamatikod man god ko nga may laing sabaw sa puwersa sa PNP dihang nadakpan nimo si Chief mao nga nangandam dayon ko. Nagpapatay-patay lang ko dihang ila kong gipusil. Pagbiya nila sa kuwerpo dala ka nga wala nay panimuot, hilom kong misunod maong natultolan ko kining dapita nga lisod gayod kaayong tultolon sa wala masuheto. Nangayo kog panabang sa kapolisan sa silingang lungsod. Maayo gani kay mi- cooperate sab sila.”
“Dakong accomplishment mo kini, Tenyente,” ni Victor pa. “Nagtuo ko nga makadawat ka gayod og promotion tungod niini.” Igo lang mipahiyom ang tenyente. Usa ka kauban ni Lt. Valera miduol sa ilang nahimutangan. “May mga stock sa shabu nga among na- recover sulod sa langob, Sir,” taho niini.
Nagkatinan-away sila si Victor ug Lt. Valera. Apan sa kaisipan ni Victor, dihay milugdang nga kamatuoran. Ang mga Bangkulisan ra usab diay maoy nagpayuhot sa ginadiling droga sa lungsod sa Mabini. Misantop usab sa iyang hunahuna nga malagmit migamit usab si Ramon Diaz sa ginadiling droga hinungdan nga nawad-an na kini sa hustong panghunahuna ug nahungog sa Satanismo.
“Hiposa ninyo ang tanan ninyong makita nga magamit natong ebidensiya batok sa kulto,” giingnan ni Valera ang polis.
GITUMAN gayod ni Victor ang saad niya ngadto ni Sonia Areza nga magpakasal na sila kon masulbad na niya ang kaso nga iyang giatubang. Ang ilang kasal didto ipahigayon sa simbahan sa Guadalupe sa Dakbayan sa Sugbo. Kini ang dapit nga gipili ni Sonia tungod kay usa man ka deboto ang babaye sa Birhen sa Guadalupe.
Daghang tawo ang nanambong sa ilang kasal. Sa habig ni Victor, mingtambong sila si Belen, Arlin, Jimmy ug Tiyo Berto. Kauban nila ang bata nga si Inday Shantal. Mitambong usab si Maj. Valera (nakadawat og promosyon) kay gidapit kini ni Victor.
Sa habig ni Sonia, halos diha ang tanan niining kabanay ug suod nga mga higala. Mingtambong usab ang mga kauban ni Sonia sa trabaho sa Sunlight Publications nga gipangulohan sa editor-in-chief sa Moon-Star Daily.
Samtang gipahigayon ang salusalo sulod sa hamugaway nga Sacred Heart Center, kalit naukay ang nanagmayang katawhan dihang nakadungog silag buto-buto didto sa gawas sa kan-anan.
Mogawas unta si Victor aron magsusi, apan maoy pag-abot sa usa ka lalaki gikan sa gawas, nagpahibalo nga usa diay ka esnatser ang gigukod sa polis. Misukol ang esnatser hinungdan nga napugos ang polis pagluthang niini. Igo lang nakapanglingo si Victor.
Gipadayon ang pangaon. Apan si Victor nagtimitimi. Dihay iyang gihunahuna nga nakapakulba sa iyang dughan. Nabalaka siya.
Dili kaha nga kadtong nahitabong pinusilay usa ka pasidaan sa bad omen sa iyang kaminyoon? Naatol ra ba gayod sa adlaw sa kasal nila ni Sonia. Ug diha pa gayod mahitabo duol sa lugar diin gihimo ang ilang reception. Apan dili siya gustong maghunahuna niini. Gisalig niya sa Diyos ang tanan.
“Diyotay ra lagi ang imong gikaon,” buyag ni Sonia nga nakamatikod nga ingon sa wala siyay ganang mikaon. “Busog na ko,” mubo niyang tubag. “Morag may naghasol sa imong hunahuna.” Daw gibasa sa babaye ang kinidlap sa iyang mga mata.
“Wala, uy,” niya pa nga mipahiyom og ahat. “Hasol god. Gihunahuna ko lang ang mahitabo nato unyang gabii.” “Buing!” Gikusnit ni Sonia ang iyang kilid. Nahatukiki si Victor. Ang tinuod, naghinam-hinam gayod siya sa pag-abot sa kagabhion. Kay bisan makadaghan nang may nahitabo tali kanila ni Sonia, gusto niyang masinati ang katam-is sa panagsalo sa dugos sa gugma karon nga lisensiyado na sila. (KATAPOSAN)