DRUG RUNNER
DUNAY naka- tip kang PO1 Juanito Tamban nga si Dongdong drug runner ni Doglion, alyas sa usa ka druglord sa Barangay Asero, Dakbayan sa Sugbo. Busa iya kining gipanid- an kay naa man siya magpuyo sa maong barangay. May pipila na ka tawo nga mingsulti niini kaniya, lakip na gani ang mga bata nga nakaila kang Dongdong. Dose anyos pa si Dongdong ug bag- o lang migradwar sa grade six.
Wala siya mag- uniporme niining buntaga. Tuyo niya nga dili makadiparal si Dongdong nga may polis nga naniid kaniya. Didto siya ipli sa tindahan og mga sitsiriyas dili layo sa barungbarong nga gipuy- an sa pamilya ni Dongdong.
Taudtaod, nakita niya ang bata nga nanaog. Nagsul- ob kinig puti nga t- shirt ug maong nga shorts. May itom nga gora nga gitabon sa iyang ulo. Naagian siya sa bata nga wala molingi sa tindahan. Dihang distansiya nag mga napulo ka lakang si Dongdong, mihinay- hinay pagsunod si PO1 Tamban. Didto sa crossing sa mga Dalan Puthaw ug Bronse, nalantawan ni PO1 Tamban si Dongdong nga misulod sa usa ka tindahan. Sa paggawas sa bata, may gibitbit na siyang gamay nga plastik nga bolsita nga puti ang sulod. Nagduda si PO1 Tamban nga shabu kadto. Mao nga mihukom siya nga sitahon ang bata. Basig ang tindahan nga gisudlan sa bata bagsakanan pod og shabu.
Dihang duol na si Dongdong sa iyang nahimutangan atubangan sa Dulce Bakery, gisitsitan ni PO1 Tamban ang bata apan wala kini manumbaling.
“Pssst! Pssst! Pssst!” Misitsit pag- usab si PO1 Tamban.
Milingi si Dongdong sa polis. “Akoy imong gitawag?” matod sa bata.
“Oo, ikaw!” tubag ni PO1 Tamban. “Tan- awon ko nang imong dala. Basig shabu na.”
Apan imbes moduol, kalit nga misutoy pagdagan si Dongdong. Gigukod siya ni PO1 Tamban. Kusog nga midagan si Dongdong. Paspas nga migukod kaniya si PO1 Tamban.
Gusto sa bata nga dili maapsan sa polis tungod sa kahadlok nga dakpon siya. Maong nagpanglingi siya kay basin og duol na kaniya ang polis. Apan sa iyang paglingi makausa pa, wala siya makaalinggat sa dyip- pasaheroan nga kusog nga nagdagan ug midasmag kaniya. Natumba siya sa karsada ug namatay dihadiha. Ang puti niyang t- shirt natumog sa iyang dugo. Gitapuk- an dayon siya sa mga tawo, lakip na si PO1 Tamban.
“Wa koy sala ani!” matod sa drayber sa dyip. “Siya may midasmag sa dyip!”
May nagpahibalo sa inahan ni Dongdong sa nahitabo.
“Diyos ko, Dongdong! Nganong nahitabo man ni nimo!” Misiyagit ang inahan ni Dongdong samtang miumbangol paghilak.
“Diin diay siya gikan, Nang Biday?” pangutana sa usa ka silingan nga babaye.
“Ay, gisugo nako og asukar sa krosing kay barato didto. Diyes pesos ra ang putos. Unya tungod ini namatay hinuon siya. Hu- hu- hu- hu- hu! Kaluoy sa akong anak!”
Gitan- aw ni PO1 Tamban ang gamayng plastik nga bolsita nga gipunit niya sa yuta. Nawasig- wasig ang sulod niini sa yuta; ang uban nalun- oy sa dugo ni Dongdong. Minghalang ang iyang mga mata. Mingtulo ang iyang mga luha. ( KATAPOSAN)
Midagan siya sa kalisang. Midagan siya aron sugaton ang hinanaling kataposan sa tanan…