ANG AKONG PAMAGDOY SA YUTA SA OZ
(Ikanapulog Upat nga Bahin)
SA akong pagsulat niining kataposang bahin sa akong pamagdoy sa “Yuta sa Oz”, nanuhot-suhot na ang kabugnaw sa winter. Hunyo 8 maoy among pagbiya sa Australia.
Daghang lugar ang among nalaagan sa hapit tulo ka bulan nga bakasyon sa Australia. Apan may duha ka dapit sa itineraryo nga wala namo maadtoi. Ang Melbourne nga tungod sa kalayo (876 kms.) dili paigo ang duha ka bakanteng adlaw (Sabado ug Domingo) ni Yoyong ug ang Snoway Mountains kay wala pay esno didto.
Sa akong pagbalik-lantaw sa among bakasyon ni Pat sa Australia, mipasundayag sa akong alimpatakan ang daghang kasinatian ug talan-awon nga dili ko malimtan.
Ang anad nga mga white ibis, kanaway ug salapati nga nanaghugoy-hugoy sa mga baybayon, parke ug kadalanan.
Ang kaanindot sa Mortdale ug ubang suburbs sa Sydney. Ang dagkong kahoy nga naglumbay sa matag kilid sa mga dalan. Ang hapsay nga mga kalsada, luag nga trapik ug limpiyo nga palibot. Ang nagparadang mga sakyanan daplin sa dalan nga luwas sa karnaper.
Ang mga inahan ug amahan nga nanagtulod og estroler sakay ang puya ug gagmayng bata sa ilang paghatod sa nagtungha sa kindergarten, pagpamalit sa malls ug pagsuroy sa mga lulinghayawan.
Ang pagkaong steamed king crab ug rock lobster, Australian beef steak ug lamp stew, Peking duck, Greek vegetable salad, fish & chips ug mga linuto ni Yoyong ug Ryedgee. Ang humok nga karneng baka, tambok nga salmon ug dagkong sili, kamatis ug sibuyas. Ang bagong pupo nga ubas ug mansanas.
Ang pagpamalit ug window shopping sa Queen Victoria Building ug sangang mga tindahan sa Westfield (Sydney, Hurstville, Miranda, Parramatta ug Bondi).
Ang pagpamaseyo ngadto sa mga baybayon sa Coogee, Surper’s Paradise, Brighton-leSands, Manly ug Bondi.
Ang unang pagsakay og kamelyo ug toboggan.
Ang unang higayon nga nakakita ug nakahikap og Kangaroo ug ang pagtan-aw unsaon pag-alot og karnero.
Ang mga hotel nga natulgan sa among pagsuroy gawas Sydney: Chelsea Motor (Inn Coffs Harbour, NSW), Breakfree Beachpoint Resort (Gold Coast), Colonial Holiday Park (Macquarie Port) ug Pacific Suites (Canberra).
Ang paglaag sa Kamay Botany Bay National Park, Centennial Park, Sydney Olympic Park, Carss Park, Kiama Blowhole, Brisbane Botanical Garden, Currumbin Wildlife Sanctuary, Mt. Wilson Maple Trees Park ug Katoomba Echo Point Lookout.
Ang pagsuroy sa Circular Quay ug Sydney Opera House ug paglantaw sa Sydney Harbour Bridge. Ang pagsakay sa mga ferry paingon sa Darling Harbour ug Manly.
Ang nasudlang Nicholson Museum (University of Sydney), Australian War Memorial (Canberra) ug National Dinosaur Museum (Canberra).
Ang nasimbahang St. Mary’s Cathedral (Sydney CBD), St Declan’s Parish (Penshurst), St. Michael’s Church (Hurstville) ug Cathedral of St Stephen (Brisbane).
Ang pagbiyahe sa one-way nga motorways ug highways nga mas luwas sa disgrasya. Ang berdeng kalikopan nga gihabolan sa eucaplytus ug ubang kahoy. Ang patag nga kayutaan, lapad nga mga ranso ug tambok ang mga baka ug karnero nga nanibsib sa pastohan.
Ang pagsakay sa hamugaway nga Sydney
Trains nga moabot sa oras nga gitakda.
Ang mabulokong talan-awon sa “Vivid Sydney”, tinuig nga outdoor lighting festival nga gisugdan niadtong Mayo 26 ug matapos sa Hunyo 17.
“How many more days, Lolo?” pangutana ni Casey nga midipig kanako nga nagbasa sa Facebook mahitungod sa deklarasyon ni Duterte sa Martial Law sa Mindanao. “Fourteen days,” akong tubag. “Why?” “I will miss you, Lolo. And Lola.” “We will miss you too!” Kinsay dili batiog kamingaw sa hapit tulo ka bulan nga pamagdoy sa Australia? Kinsay dili moiliw sa pamilya ni Yoyong nga mahinangpong miabi-abi kanamo. Nga gibuhat ang tanan aron mahimong hamugaway ug dili laay ang among pag-ipon sa ilang panimalay. Kinsay dili batiog kasubo nga mahilayo pag-usab sa among lima ka tuig nga apo?
Kabahin sa kinabuhi ang pagbiya ug pag-abot. Apan luyo sa kamingaw adunay kahinangop. Akong gibalikan og basa ang mensahe ni Klarence diha sa Facebook messenger: “Lolo kada kita ni Cyd sa nyo pic ni Lola mo ana siya lolo lola go home when? Hehe excited na siya tagbo sa airport sa nyoha.” Si Cyd nga kapin sa dos anyos ang edad, mao ang among ikawalo ug kinamanghorang apo.
Ambot kon makabalik pa ba kos Australia o makalaag sa ubang nasod. Nag-agad kini sa panahon ug kahigayonan. Apan sa akong pamalandong, ang pamagdoy anaa sa hunahuna ug kasingkasing sa tawo. Anaa sa pagmanggad ug pagdimdim sa matag gutlo sa kinabuhi. Pananglit, ang pakig-uban sa pamilya ug pakighugoy-hugoy sa mga apo, alang kanako usa ka dakong pamagdoy. Gani, angay kining bantayan ug hatagag dakong pagtagad, aron walay masalaag.–