Si Domino Blanco
HINAY nga naglakaw si Domino Blanco nianang buntaga sa aseras sa Dalan Colon. Mihunong siya tungod sa usa ka newstand atubangan sa 696 Pharmacy. Gipamasa niya ang mga headline sa lainlaing mantalaang lokal. Nadani ang iyang panan-aw sa headline sa Bag-ong Adlaw tabloid nga nagkanayon: Mamumuno Sa Brgy. Kapitan Ilhan Na!
Nakuryoso, gipunit niya ang mantalaan ug gibasa ang tibuok balita. “May nakasaksi nga usa ka ginganlag Domino Blanco ang mitulis ug mipatay kang Kapitan Israel Deleon, kapitan sa Barangay Kasab, Dakbayan sa Sugbo. Ang krimen nahitabo sa balay mismo sa kapitan kagabii sa alas onse ang takna. Ang suspek gipangita na karon sa kapolisan pinaagi sa follow-up operation.”
Hapit niya mabuhii ang mantalaan. Kalit siya nga gipanguyawan. Subsob nga mibutok-butok ang iyang dughan. Sa iyang pamati nangluspad siya. Dali niyang giuli ang mantalaan. Gipayungyong niya ang ball cap nga iyang gisul-ob aron matabonan og diyotay ang iyang nawong. Gikuot niya ang iyang rayban sa bolsa sa iyang maong nga dyaket ug gitaod sa iyang mga mata. Sa iyang gibuhat, dili na siya mailhan og dali. Kusog siyang mipahilayo sa dapit.
Didto sa giabangan niyang kuwarto sa usa ka balay sa Barangay Lisap, nagdali nga gipanulod niya sa traveling bag ang iyang mga sapot. Nanaog siya nga wa mananghid sa tag-iya sa balay. Misakay siyag taksi paingon sa Cebu South Bus Terminal sa may N. Bacalso Avenue. Mopauli siya sa Nayawak sa habagatang Sugbo.
Human mokawas sa Panocdocan tungod sa simbahan ni Santa Monica, mipaturatoy paglakaw si Domino paingon sa Kambaki. Midulhog siya sa balahaan nga agianan sa tubig gikan sa bukid kon kusog ang ulan. Mitadlas siya ug pag-abot sa pikas tampi migaka paingon sa bungtod sa Ilaya nga nag-ambo sa tubod nga kawsanan og tubig sa taga Ilaya ug taga Panocdocan.
Mihangak siya paghiabot niya sa balay ni Yoyo Pilo, iyang uyoan.
“Nia lagi ka, Domino?” timbaya ni Yoyo Pilo. “Nakapamahaw na ka?”
“Wa pa. Pero nakatimo kog linung-ag saging sa Carcar,” tug-an ni Domino.
“Maayo nuon. Hapit na man sad tingpaniudto. Naghikay na si Manang Ening mo. Ngano diay nga kalit kang mianhi? Layo pa man ang pista.”
“Anhi ko tago, Yo, kay gipangita ko sa Siyudad sa Sugbo. Gipasanginlan ko nga maoy nagtulis ug nagpatay sa
barangay kapitan sa Kasab. Dili baya ako. Wa gani ko kaila sa saksi nga mitug-an sa kapolisan sa akong ngalan! Nahadlok ko nga masikop sa mga polis, dayon isalbeyds.”
“Sige, anhi una ka puyo sa amo. Naay kuwarto nga nabakante dihang milarga si Agaw Lalaine nimo paingon sa Saudi aron adto manarbaho, gamita kana.” “Salamat, Yo!” Paglabay sa duha ka adlaw dihay duha ka polis nga nangita kang Domino. Giposasan siya ug gidala sa police station sa munisipyo sa lungsod sa Dalagit.
“Taas ang kamot sa balaod,” matod sa hepe sa kapolisan. “Bisan asa magtago ang kriminal, masikop gyod!”
“Pero, Tsip, di ako ang nagpatay kang Kapitan Israel!” hugot nga pamalibad ni Domino.
“Diin ka man adtong gabii nga nahitabo ang krimen?” sa hepe.
“Didto sa balay sa akong higala nga nag- birthday, Tsip,” ni Domino.
“Unya nganong milayas ka man gikan sa Cebu City?” sa hepe. “Nagpasabot lang na nga sad-an ka?” “Nahadlok ko, Tsip, nga isalbeyds!” Naputol ilang panag-estorya dihang gipatingog sa hepe ang transistor radio nga diha sa iyang lamesa. Giputol ang naandang programa sa anawnser. “Mga higala, aniay lab-as nga balita. Si Domino Diaz Blanco, ang suspek sa pagtulis ug pagpatay kang Kapitan Israel Deleon sa Barangay Kasab nadakpan na sa follow-up operation didto sa lungsod sa Catmon. Anaa na siya gibalhog sa bilanggoan sa CCPD, samtang giandam ang pagsang-at og tukmang kaso sa korte batok kaniya.” Mitutok ang hepe kang Domino. “Naa kay ID o sedula?” “Nia, Tsip.” Gikuot ni Domino ang iyang pitaka ug gikuha ang iyang SSS ID. Gitunol niya sa hepe nga misuling-suling niini.
“DOMINO CARZA BLANCO!” Mitaas ang tingog sa hepe. “Sus, no! Pareho gyod mog ngalan! Naglahi lang ang mga apelyido sa inyong mga inahan. Na, hala, Domino, balik sa Siyudad sa Sugbo ug pakigkitai ang hepe didto aron marekord nga pareho mog ngalan adtong kriminal.”
“Salamat kaayo, Tsip!” ni Domino nga midawat sa tuong kamot sa hepe aron lamanohon. “Way sapayan!” sa hepe. Migawas si Domino sa munisipyo. Nanghupaw siya. Nawala ang kakulba nga nagpuot sulod sa iyang dughan ning nanglabay nga mga adlaw dihang nahanggap niya ang hangin sa kagawasan.
(KATAPOSAN)
Gigamhan lang siya sa kalisang, imbes pamatud-an ang iyang pagka inosente…