Lechonan sa Kadalanan 2017 sa DIGOS CITY
MINGBIDA sa kadalanan sa Rizal Avenue ang sobra sa 500 ka letsong baboy sa Siyudad sa Digos sa miaging Septiyembre 8, 2017 atol sa kasaulogan sa ika-17 nga kasumaran sa pagkahimugso isip usa ka siyudad nga nailhan na kaayo sa tawag nga “Araw ng Digos”. Kining usa ka semanang selebrasyon gitapos pinaagi sa contest sa pagluto sa kagumkom, lamian ug makaiibog nga letsong baboy. Kini nga kalihokan giila ug gibantog na nga Lechonan sa Kadalanan tungod kay ang display sa mga letson anha man sa kalsada o dalan.
Kini nga kontes gisugdan niadto pang unang pagtuig sa siyudad ug hangtod karon nagapadayon nga hinugopan ug gikahinaman sa mga Digosenyo. Nahimugso kini ubos sa maayong hunahuna ni kanhi Mayor Arsenio Latasa agig pagdasig sa katawhan nga mamuhi og baboy aron makatabang ug dugang kita sa pamilya. Kini ubos usab sa awhag ni kanhi Kagawad Romualdo Crispino, usa ka negosyante nga adunay dagkong piggery ug pabrika sa feeds sa siyudad.
Sayo pa sa kaadlawon, nagsugod nag muntar ang mga letsonero. Nagkadaiyang gidak-on ang gipangtuhog; labing gamay ang 25 kilos ngadto sa 40 kilos ang kinadakoan. Matag kontestan usa lamang ka entri ang gitugot o usa ka baboy, apan puyde magletson bisag pila para ibaligya.
Mas daghang mingsalmot karong tuiga tungod kay tanang barangay miapil gyod sa contest; dunay 26 ka sumasalmot sa inter-barangay ug 41 sa inter-commercial category o stall owners.
Iyahayg posisyon morag nagkupot sa manobela sa pagtuyok-tuyok ang mga letsonero sa ilang gituhog nga baboy. Miaso-aso dayon ug taudtaod nagbaga-baga sa kainit ug inanayng namula-pula ang mga panit sa baboy hangtod mialisngaw ug nangalimyon sa kahumot ang nagtulo-tulo nga
manteka timailhan nga hapit na mangaluto ang mga letson.
Alas nuybe sa buntag nahuman ang civic parade ug didto midagsa ang duot sa katawhan nga mga kumakaon ug mamalitay sa lechon. Nagtinadtaray, nagkinilohay ug nagpangamay ang mga tindera. Nagteybol-teybol ang mga nangaon sa letson pares sa puso. Nagsiot ang mamalitay; tagP380 ngadto sa P400 ang kilo apan sa pagka-alas onse miubos sa tag-P300, gi- bargain aron mahurot. Alegre kay samtang nagtinadtaray dili kalikayan nga naay mamunit-punit sa mga nawisik sa tadtaran— gipasagdan na lang iyawat makatilawtilaw sa kalami.
“Ang main purpose nito ay magkaroon ng food availability sa lahat kasi nga Araw ng Digos, dapat may masarap na pagkain sa lahat, di na kailangan bumili pa sa labas kasi andyan na ang letson,” pamahayag pa ni Dr. Fermin Verallo, city veterinarian nga maoy chairman sa Lechonan 2017.
Ang kampeyon sa inter-commercial category nga nakabolsa sa P5 mil nga premyo mao ang Linda Paping Lechon House, ang kinadaghanag naletson nga miabot og 30 ka baboy. Sa barangay category, ang kampeyon mao ang Barangay Matt, nga nakakumkom sab sa P5 mil nga premyo.
Matod pa sa akong gikahinabi nga letsonerong si Raul Cananira, “sa pagsugod kinahanglan kusog ang kainit nga motuhop sa kinailawman ug unya hinay-hinayan ang kainit aron dili moliki ug mapagod hangtod nga maluto na.”
Matod usab sa laing letsonero, “gawas sa lamas, among sagolan og keso, margarine, condensed milk ug duga sa lemonsito para gyod moalisngaw ang kahumot. Duna miy kaugalingong templa apan dili lang namo ibutyag.”
Nabaniog na lukop sa kapupud-ang Pilipinhon ang matag tuig nga Lechonan sa Kadalanan. Kini usa ka dakong garbo sa dakbayan sa matag saulog sa kasumaran sa pagkahimugso niining siyudad. Dugang pa, kini gitumong aron molambo ang negosyo sa pagpamuhig baboy, negosyo sa letson ug ekoturismo sa siyudad. Gani, giila na ang Siyudad sa Digos nga lechon capital sa Rehiyon 11 o Davao Region.
Target sa City Government sa Digos karon nga mahitala sa Guinness World Record isip “kinadaghanang naletsong baboy sa kalsada sa usa lang ka higayon”.
Daghan pang gipahigayong aktibidades sa usa ka semanang kasaulogan. Ang Lechonan sa Kadalanan maoy usa sa mga highlights matag ika-8 sa Septiyembre.
Ang kinatibuk-ang kalihokan sa Araw ng Digos gipangamahanan gyod ni Hon. Joseph Penas sa pakigalayon sa kapolisan nga nagbantay sa hingpit nga kahusay ug kalinaw. Awhag pa sa mayor, “mag-uban kita kanunay para sa kalamboan sa atong siyudad.”
Sa sunod puhon nga Lechonan, magkita-kita ta. Mabuhi ka Digos, sa ika -17 nga kasumaran!—