KATIN-AWAN SA GI-POSTPONE NGA ELEKSIYON SA BARANGAY SA MINDANAO

DAGHANG opisyales sa barangay dinhi sa Mindanao nga nangalipay human gikataho niadtong miaging semana nga ma- postpone na gyod ang maong eleksiyon base sa mando sa Comelec. Nabalisa kaayo sila sa kadugayon sa pagpasar sa Kongreso sa balaodon nga nagtumong sa pag- postpone sa eleksiyon sa barangay karong umaabot nga Mayo. Kini ang gustong mahitabo sa presidente apan daw hinay kaayo ang pagporsegir niini diha sa Kongreso. Maong bisan ang Comelec nabutang sa walay klarong kahimtang kay ang pagpahigayon sa eleksiyon ila man gyong buluhaton.

Dako nilang tulubagon sa katawhan kon dili nila kini mapahigayon. Maong bisan gideklarar na sa presidente nga dili niya gustong ipahigayon ang maong eleksiyon sa gikatakdang petsa niini karong sunod bulan padayon gihapon ang ilang pagpangandam sama sa pag-imprenta og mga balota ug daghan pa kaayong kalihokan kay 42 mil baya kapin ang gidaghanan sa mga barangay sa Pilipinas, ug dili kini ingon niana kadali ipahigayon kay mano-mano kini nga eleksiyon.

Apan hangtod sa pagsulat ning maong lindog wala pa gyoy balita sa balaodon pag- postpone sa barangay election ngadto sa Kongreso. Kon dili kini molusot ug dili mapirmahan sa presidente sa dili pa ang gitakdang adlaw karong Oktubre, obligado gyod ang Comelec nga mopahigayon sa maong eleksiyon. Apan niadtong miaging semana nakahimo og maalamon kaayong asksiyon ang Comelec mamenosan man lang ang ilang kahasol sa pagpangandam sa walay klarong pag-abot sa Eleksiyon sa Barangay. Ginamit ang gahom nga gihatag ngadto sa maong ahensiya sa balaod nga mao ang Batas Pambansa 881 kun Omnibus Election Code, mimando ang Comelec nga i- postpone ang eleksiyon sa barangay sa Mindanao. Mindanao lang ug walay labot ang ubang bahin sa nasod. Gigamit sa Comelec ang karon nga kahimtang sa

Unta ang karon nga mga lider sa barangay pinaagi ning maong kalamboan mas makatugkad pa sa ilang kaakohan sa tininuod nga pag-alagad ug pagpanguna sa mga paningkamot…

kagubot sa Marawi ug sa martial law nga gideklarar sa tibuok Mindanao aron hukman ang pagpostpone sa barangay election ning maong pulo sa nasod.

Ang gibasehan sa maong kamandoan sa Comelec mao ang Section 5 sa Batas Pambansa 88I nga giila isip Omnibus Election Code. Ang maong lagda naghatag sa Comelec og awtoridad sa pag-oktaba sa gikatakdang eleksiyon sa panahon nga mahitabo ang kagubot ug terorismo nga posibleng mosangpot sa pagkapakyas sa paghimo sa malinawon ug matinud-anong piniliay. Ang kiwag niini kay saksi baya ang tanan nga ang kagubot nga mahimong makaapekto sa malinawong piniliay pagka karon naa ra didto sa Marawi City, Lanao del Sur, ug kasikbit nga mga dapit ug ang labing dakong parte sa ubang mga dapit sa Mindanao nagpabilin baya nga normal ang kahusay ug kalinaw. Nganong tibuok Mindanao man ang mandoan sa Comelec nga ioktaba ang eleksiyon? Ug kinsa may basta makakuwestiyon sa Comelec niini? Dili ba kini man usab ang pangutana nga gidala sa mga nagkuwestiyon sa martial law didto sa Supreme Court diin ang labing taas nga hukmanan pinaagi sa mayoriya sa mga hurado niini mingpabor sa baroganan ni Presidente Duterte nga dili lamang ang Marawi kondili ang tibuok Mindanao ang angay ipailalom sa martial law.

Gimbut-an usab sa maong resolusyon nga ang mga opisyal karon sa barangay nga naa sa puwesto magpabilin sa ilang posisyon pinaagi sa gitawag og hold over capacity. Hayahay, matod pa sa mga nahimuot ug nasina niining maong kahimtang nga nagpabor gyod sa mga nanaglingkod karon sa barangay. Walay tino sa maong resolusyon kon kanus-a ipahigayon sa Comelec ang naoktabang eleksiyon sa Mindanao. Hinuon, matod sa resolusyon nga ipahigayon ang eleksiyon sa barangay sulod unya sa 30 ka adlaw human mawala ang hinungdan sa pag- postpone niini. Buot ipasabot, human malinaw ang karon nga kagubot sa Mindanao nga maoy gibasehan sa maong resolusyon. Walay nasayod kon kanus-a maundang kining maong kagubot sa Marawi, maong bisan ang Comelec wala pod, sa pagka karon, masayod kon kanus-a niini mapahigayon ang naoktabang barangay elections sa Mindanao.

Gitin-aw usab sa maong resolusyon nga sa panahon nga mapasar na ang usa ka balaod nga mag-oktaba unya sa eleksiyon sa barangay mopatigbabaw ang mga probisyon sa maong balaod ug mawad-an nag epekto ang maong resolusyon.

Postpone na pod ang eleksiyon sa barangay. Bisan tuod kini alang lang sa Mindanao, ug resolusyon lang sa Comelec, tino na nga mosunod ang pag- postpone sa eleksiyon sa barangay sa tibuok nasod. Kabubut-on kini sa popular kaayo natong presidente apan nagkalainlain lang ang gibating reaksiyon niini sa mga lungsoranon. Daghang nalipay, daghang agrabyado, daghan pod ang walay pakabana ug wala mobati nga kining maong kalamboan sa politika makaapekto sa ilang kinabuhi.

Unsa man ang sangpotanan niining daw wala nay tino nga pagpahigayon sa piniliay sa barangay, unta sa kinatibukan ang nasodnong interes ug kaayohan sa kinabag-an ang mabulahan. Dako kaayo og papel ang mga lider ug katawhan sa barangay diha sa mga paningkamot sa kalamboan, sa batakang serbisyo sa katawhan sa kinaiyahan labi pa sa kalinaw ug kahusay ug pagsumpo sa krimen. Unta ang karon nga mga lider sa barangay pinaagi ning maong kalamboan mas makatugkad pa sa ilang kaakohan sa tininuod nga pagalagad ug pagpanguna sa mga paningkamot sa kahiusahan ug kalamboan sa ilang mga dapit nga maoy sukaranan sa kalamboan sa nasod.—