BISROCK SONGWRITING CONTEST 2017 FINALS NIGHT
DILI mahubit sa pulong ang gibati sa matag usang mingsaksi gumikan sa hilabihang kakulbahinam dihang nagbagat pag-usab ang Top 20 Bisrock bands aron magtigi sa kataposang hugna alang sa kinsay makalangkat sa unang puwesto ug aron maoy ilhong grand champion sa labing unang Bisrock Songwriting Competition 2017 nga gipasiugdahan sa Lemmonhead Publishing.
Nagsugwak sa nagdasok nga mga tawo ang Handuraw -White Gold sa Dakbayan sa Sugbo niadtong gabii sa petsa 10 ning buwan sa Disyembre diin didto gipahigayon ang finale sa maong tigi. Ang ubang banda naggikan pa sa silingang mga probinsiya sama sa Bohol, Leyte ug Davao nga mingtuyo lang pagdalikyat og taak sa Sugbo alang sa maong dakong kalihokan.
Ang nauna untang plano sa mga haligi sa Lemmonhead nga hagpatan og napulo ang Top 20 ngadto na sa Top 10 nga maoy pinal nga magtigi sa finals night nasabotan sa komite nga ikanselar na lang dihang human sa inisyal nga pagsumada sa mga puntos sa matag banda nga gibase sa live performances, text voting via Globe network ug uban pang criteria sa paghukom, nakita nga gagmay ra gyog ligas ug dikit kaayo ang mga puntos.
Ug kay mas alegre lagi ug mas dakong hagit kon daghan ang magsambunot sa kataposang hugna, maong nahukman nga ilahos na lang ang Top 20 nga maoy mag-abot ngadto na sa finals. Unya ang venue usab sa finals night nga sa unang plano mao unta ang SM Seaside nga tua mahimutang sa South Road Properties kun SRP sa Dakbayan sa Sugbo wala usab mahinayon. Wala man god maaprobahi sa kadumalahan ang sponsorship letter nga gipadala unta sa Lemmonhead ngadto sa management hinungdan nga misitar ang sikat nga tindahan og dakong bayad sa paggamit sa ilang venue.
Mao nga aron makadaginot (kay sa tinuod lang lisod gyod pagpangapkap og pundo nga ikaayuda sa pag-organisar og ingong kalihokan ilabi na sa bag-ong magsugod), gibalik na lang sa Handuraw -White Gold ang venue sa grand finals kay gawas nga libre ang paggamit sa ilang puwesto ug ekipo sa sound system, may libre pa gyong pizza nga maayong sima-sima alang sa mga artists o performers.
Gikatakda untang sugdan sa alas 4:00 sa kahaponon ang kataposang hunat sa panagtigi pinaagi gihapon sa live performances sa mga banda apan pormal nga nasugdan ang programa niana nang pasado alas 7:00 sa gabii gumikan kay wala dayon makabutho sa gitakdang oras ang ubang mga grupo gumikan sa kahuot sa trapiko nga nasinati karon sa bisan asang suok sa Dakbayan sa Sugbo.
Ug dihang ubay-ubay nang mga banda ang nag-ulhosay pagabot, gisugdan gilayon ang programa. Lakip sa mga bandang nangabot mao ang Broken String, Shanika ug Apos Tuhod nga naggikan pa sa Bohol adtong gabhiona. Mingtambong usab isip guest bands ang grupong Emphatzu, Tongues of Fire nga taga Talibon, Bohol ug ang bandang Project Sandugo nga gikan pa sa Dakbayan sa Ormoc.
Gisugdan ang programa pinaagi sa usa ka invocation nga gipangunahan ni Mr. Nhash Maquiling, ang CEO sa Lemmonhead Publishing. Unya gisunod ang undanong pakigpulong ni Mr. Wenceslao Arcuino Jr., ang VP sa Lemmonhead. Si Mr. Arcuino mao usab ang nangulo sa bandang Project Sandugo diin siya mismo ang bahista niini. Kining tagsulat gitawag usab alang sa usa ka inspirational message ug bahin sa akong hilom nga natampo pagkaumol sa Lemmonhead pero wala ko na tas-a ang akong pagyawit atubangan sa mikropono kay nag-apas na ang tanan sa oras. Ug pila ray estorya, gisugdan dihadiha ang rakrakan.
Maoy unang mipakita sa ilang abilidad sa paggabas-gabas sa gitara ang guest band nga Tongues of Fire. Mora gyod tinuod og mga “dila sa nagdilaab nga kalayo” ang mensahe nga buot
ipadangat sa ilang mga komposisyong “Pinangga”, “Ikaw Lang Ang Tanan”, “Hudas Ang Drogas” “Kon Mobalik Ka” ug “Ikaw Lang Sa Gihapon”.
Human sa Togues of Fire, misunod pagpakita sa tinipigan nilang talento ang bandang Project Sandugo nga gipangunahan ni Mr. Wenceslao Arcuino, Jr. gikan sa Ormoc City. Ug hastang lingawa gyos mga tawo dihang gitokar nila ang upat ka orihinal nilang komposisyong “Biniyaan”, “Pasensiya Na”, “Nice Ang Imong Hair” ug “Walop Sa Kagahapon”. Ang bandang Project Sandugo maoy buhing pruyba nga dili lang diay taga Bohol ug Sugbo ang dunay katakos sa pagmugna og kaugalingong obra sa Binisayang komposisyon, kondili hasta usab ang taga Ormoc.
Ug wa usab paalkanse ang laing guest band nga bandang Emphatzu diin puwerteng panghugyaw sa mga tawo dihang ila nang gitokar ang ilang hit songs nga medyo may pagyang pasapil sa mga politiko sama sa mga kantang “Kabit”, “Tawo Pagmata”, “Baboy”, “Lingia” ug “Diyosnon”. Sa ilang tirada, posibleng ang Emphatzu nga gipangunahan sa ilang bokalistang si W. Borjal maoy matawag nga Dong Abay unya puhon sa Sugbo.
Tapos makapakita sa ilang tinan-ogang katakos ang tulo ka imbitadong guest bands, way daghang langay nga gisunod gilayon pagtawag ang opisyal nga Top 20 bands aron mopakita ug modiga sa kinakusgan nilang baraha sa talento sa musikang Bisrock. Ug samtang nag-anam og kalawom ang gabii, nag-anam usab kahugyaw ug kakulbahinam nga halos di na hapit mamilok ang tanan ilabi na ang mga suporter sa matag grupo dihang nagsunoray na pag- perform ang mga banda o artists uban sa ilang gitokar nga entry songs nga mao kining mosunod:
1. “Gihandom” by Emperianz (Talisay City, Cebu); 2. “IbogIbog” by Broken String (Bohol); 3. “Sugta” by Apos Tuhod (Bohol); 4. “Damgo” by Keith Ayuman (Cebu City); 5. “Uyab Na Lay Kuwang” by Grace & Gail (Naga City, Cebu); 6. “Kon Makauban Ka” by The Redstremes (Cebu City); 7. “Okey Ra” by Shanika (Inabanga, Bohol); 8. “Ayaw Guniti” by Lapulapu Tribe (Cebu City); 9. “Pagpadayag” by Revillgace-14 (Inabanga, Bohol); 10. “Dili Ko Na Maangkon” by Yuanexian (Cebu City); 11. “Pwede Ba” by Error Check (Davao City); 12. “Maghuwat” by Ryle Jhon (Cebu City); 13. “Gimahal Tika” by Jake Gomez (Cebu City); 14. “Unta” by Second Option (Cebu City); 15. “Angay Ka Malipay” by Square One (Cebu City); 16. “Sakto Na, Sakto Ka” by Sentes (Cebu City); 17. “Taphaw” by The Sets (Cebu City); 18. “Bahala Na” by Gutterboys (Cebu City); 19. “Palihog Bi” by Thy Cause (Toledo City, Cebu); 20. “Abuso” by Gods Smugglers (Barili, Cebu).
Ug sama sa daghang tigi nga sikit kaayo ang kompetisyon, naglisod gyod ang mga hurado sa paghukom. Apan kay naabtan nag kadlawon, wala na dugay-dugaya ang pag-anunsiyo sa palarang mga nagpakadaog. Ug makaingon tang gidebuynas gyod ang taga Bohol adtong higayona kay ang nakapunggit sa una ug ikaduhang puwesto pulos man mga Bol-anon.
Maoy naproklamar nga grand champion ang Bol-anong banda nga Broken String pinaagi sa ilang entry song “Ibog-ibog”. Samtang nalangkat usab sa laing Bol-anong grupo nga Shanika ang ikaduhang dapit pinaagi sa komposisyong “Okey Ra”. Ang Grace & Gail nga gilangkoban sa duha ka batan-ong babayeng rakista nga taga Naga City, Cebu maoy nakailog sa ikatulong puwesto pinaagi sa makahimuot nga obra nilang “Uyab Na Lay Kuwang”.
Kadtong hugyaw ug mabulokong finals night sa labing unang Bisrock Songwriting Contest 2017 gidumog pagtambong dili lang sa mga batan-on ug hamtong nga hugot nga nagmahal sa musikang Bisaya, kondili, lakip na usab sa ilado ug respetadong mga personalidad sa Sugbo sama nilang Ms. Sarah Smith (tag-iya sa Handuraw Cafe & Pizza), Superbalita Editor Rolando “Dodong” Morallo (nga mao say kasamtangang pangulo sa Bathalad -Cebu), Ms. Alma Rubin ug Ms. Claudine Catipay sa Globe Telecom nga usa sa mga main sponsors ug daghan pang uban nga kining tagsulat mangayo na lag pasaylo kon dili na nato mahurot og hingalan.
Sa tibuok kalamposan sa labing unang Bisrock Songwriting Contest, kining tagsulat modugang pagpasalamat sa tanang mingsuporta sa kalihokan og moingon, “Rock on, mga Bisrakista, hangtod sa sunod nga rakrakan sa mga kantang Binisaya!”—