Duna diay epektibong tambal sa dengue nga giaprobahan kaniadtong 2014
GIKATAHO nga sa wala pa ang Dengvaxia vaccine, aduna na diay mas epektibo pang tambal sa Dengue fever sa Pilipinas nga giaprobahan ni Secretary Enrique Ona kaniadto pang tuig 2014, panahon nga health secretary pa siya.
Gibutyag kini ni Hexilon Alvarez, presidente ug chief executive officer sa Pampanga-based Preferred and Proven Therapies Inc. (PPTI) nga local distributor sa nahisgotang herbal drug. Si Hexilon anak ni kanhi Senador Heherson Alvarez.
Matod niya, gipaubos kini sa clinical trials sa Pilipinas dungan sa kontrobersiyal nga Dengvaxia nga gituki sa senado gumikan sa nadiskobrehan nga daotang epekto niini sa mga nabakunahan na nga wala pa masakit og dengue.
Kining giingon nga mas epektibong tambal sa dengue gitawag og ActRx TriAct. Una kining giaprobahan sa US Department of Health and Human Services (USDHHS) Institutional Review Board (IRB) nga nag-isyu og sertipikasyon kaniadtong Pebrero 22, 2012 aron pagpahigayon og clinical trials sa tawo alang sa “Dengue Fever Treatment with Artemesia Combination Therapy” (ACTRx) sukad sa tuig 2012 hangtod sa 2014.
“The US Dept of Health and Human Services and FDA would not have issued the ‘go ahead’ or approval of the protocol to conduct testing on humans unless they were not sufficiently convinced of the safety and toxicity of the products and proceed with determining actual efficacy in a large group of humans,” matod ni Hexilon.
Ang clinical trials sa ActRx TriAct giaprobahan kuno ni Ona alang sa ilang barangay sa Palawan ginamit ang mga bata. Gipalapdan ni Ona ang clinical trials pinaagi sa gipagawas nga Department Order NO. 2014-0161 nga giisyu kaniadtong Septiyembre 24, 2014 alang sa 2,000 units nga ActRx TriAct alang sa dengue treatment sa 6 ka government-run hospitals.
Ang ActRx TriAct gidebelop ug padayon nga gimanupaktyur sa ActRX Operational Group, Ltd.
Sumala ni Alvarez, ang ActRx TriAct luwas ug epektibo ug dili lamang tambal sa dengue kondili lakip na sab sa malaria, pinasikad sa nahimong resulta sa clinical trials.
Miangkon si Alvarez nga mahimong adunay breakthrough ang naasoyng tambal batok sa dengue kon nahatagan lang kinig higayon nga mapamatud-an ang kaepektibo imbes nga gisalindot lang dayon ug mas gipalabi sa Department of Health ang pagpamalit og bakuna nga
pangontra sa dengue.—