YASSI PRESSMAN:
Usa Sa Malamboon Ang Karera Karon
NAGSUGOD si Yassi Pressman sa showbiz kaniadtong 2001 bawon ang talento ug kaanyag. Usa siya ka aktres, modelo, danser, mag-aawit, VJ ug host. Natawo siya sa Hong Kong sa amahang Briton ug Pilipinang inahan. Gibunyagan siyag Yasmin Isabela Yasto-Pressman ug kon nganong gidugang pa ang ikaduha niyang ngalan nga Isabel kana tungod sa lalawigan sa iyang inahan nga taga Isabela. May usa ka igsoong babaye si Yassi.
Tungod kay daghan siyag talento nga materyales sa showbiz, gikuha siya sa Star Magic sa ABS-CBN sa 2006 hangtod sa 2007. Unya nabalhin siya sa GMA Artist Center pagka-2010-2013; Viva Artist Agency sa 2013 apan sukad niadtong 2015, maoy naggunit kaniya ang ABS-CBN.
Gumikan sa iyang karera sa musika ubos sa Viva Records, gikauban niya ang mga Pop Girls, Coco Martin, Andre Paras, Sarah Geronimo, Donnalyn Bartolome, Julie Anne San Jose, Arci Muñoz, Rodel Nacianceno, Nadine Lustre, James Reid, Jamie Herrell, Bela Padilla ug Aimee Cheng-Bradshaw.
Sa pag-arte ubos sa ABS-CBN, nahiapil siya sa teleseryeng “Gulong Ng Palad” sa papel nga bata pa si Luisa una siya mibalhin sa Kapuso Network pagkasunod tuig diin nahimo siyang danser sa SOP Fully Charge. Nailhan siya nga “Princess of the Dance Floor” sa Party Pilipinas dihang giusab ang pasundayag niini sa pagka Sayaw Pilipinas diin maoy iyang mga kauban sila si Mark Herras, Sef Cadayona, Rocco Nacino, Steven Silva, Mayton Eugenio, Diva Montelaba ug Wynwyn Marquez nga anak nila ni Alma Moreno ug Joey Marquez.
Sa 2013, si Yassi gipapirma og kontrata sa Viva ug nianang 2014, gipaapil siya sa pelikulang “Diary ng Panget” sa papel nga Lorraine “Lory” Keet diin maoy iyang partner si Andre Paras. Apil usab siya sa pelikulang “Talk Back and You’re Dead” sa papel nga Audrey Dela Cruz.
Sa 2015, gipapirma siyag kontrata sa Kapamilya Network diin nahimo siyang dinapit sa pasundayag nga ASAP 20.
Sa 2016, usa siya sa mga bidang babaye sa teleseryeng “Ang Probinsyano” diin siya si Alyana “Ally” Arevalo Dalisay nga asawa ni Coco Martin.
Daghan na sab og nadawat nga mga award si Yassi sukad sa iyang pag-artista nga tungod sa kadaghan makapaduka na kon ato pang lakbitan.
Sa pagka karon, eksayted na si Yassi nga mapasalida ang labing ulahi niyang pelikula uban ni Sam Milby nga nag-ulohag “Ang Pambansang Third Wheel”. Usa ni ka romantic comedy sa Viva Films nga ang estorya bahin sa usa ka babaye kinsa nahigugma sa lalaki nga may anak na. Ubos kini sa direksiyon ni Ivan Andrew Payawal, kinsa nailhan sa indie film niyang “I America” nga apil sa 29th Tokyo International Film Festival sa Tokyo sa miaging tuig.
Sa iyang pagpatin-aw sa karakter ni Yassi, matod ni Payawal: “Gusto niya siya iyong priority pero dahil in-accept niya itong lalaki na ito sa buhay niya, kailangan niyang mag-adjust doon sa bata.”
Nagkauban na sila si Yassi ug Sam sa pelikulang “Camp Sawi” sa miaging tuig pero dili kaayo daghan ang esena nga naa silang duha.
Wala pa mahibaw-i kanus-a isalida ang “Ang Pambansang Third Wheel” nga giapilan usab sa batang si Alonzo Muhlach ug sa maanyag nga si Sam Pinto.—