Pinaskohan
KAPIN na sa napulo ka tuig sukad sa ilang kaminyoon apan wala gyod tugahig anak ang magtiayong Cedric-Lenie. Nahadiin-diin na silag debosyon sa mga santos ug santas, pamasin nga dunggon ang ilang mga pag-ampo. Bisag unsa na lang nga mga pamaagi ang ilang gibuhat pamasin nga momabdos si Lenie. Apan kining tanan wa mosalir. Nagpahiling og doktor silang magtiayon aron masuta ang hinungdan. Ug didto nahibaw-an nila nga baog diay si Cedric ug aduna usay diperensiya sa matris si Lenie. Ug tungod niini kuli na gyod silang makabaton og liwat.
Apan tungod sa dako nilang pagsalig sa Ginoo, wa gyod sila kawad-i sa paglaom. Alang kanila, way imposible sa Ginoo. Tungod sa mao nilang pagtuo, di gyod nila sipyaton sa paglitok ang mao nilang pangindahay matag adlaw. Ug matag Pasko usab ila gyong ihunghong sa batang Jesus diha sa Belen ang mao nilang wish.
Disyembre 24 sa hapon. Nahuman nag preparar sa magtiayon ang mga pagkaon alang sa noche buena.
“Nindota seguro, Love, kon karong Paskoha i- grant ni God ang atong wish,” pangindahay ni Lenie samtang paraygon nga mikupot sa bukton sa iyang bana.
“Hinaot unta nga hatagan ta niya og timailhan nga aduna kitay umaabot nga anak,” sumpay usab ni Cedric.
Diha sila sa maong kahimtang dihang mibagting ang selpon ni Lenie. Dali-dali niya kining gipunit sa gibutangan niyang lamesita aron tubagon ang nanawag. “Kinsay nanawag?” sukot ni Cedric. “Si Ireen, kadtong ig-agaw nako nga ob-gyne,” ni Lenie nga napintal sa nawong ang nagsagol nga kahinangop ug pagduhaduha.
Unya gisaysay ni Lenie ang kinatibuk-an sa giestoryahan nila sa iyang ig-agaw nga ob-gyne.
Human sila magkasabot, wala sila maglangan ug giadto gilayon ang ospital nga gialagaran ni Ireen. Sulod sa nursery room, puno sa kahinangop nga giduol sa magtiayon ang anghel nga nahinanok nga mao ang umaabot nilang anak. Nagkatinutokay sila nga ingon sa naglibog kay natataw nilang kaamgid nilang duha ang hitsura sa himsog nga puyang babaye.
Human nila mabayri ang bill sa ospital, nagsabot sila kabahin sa adoption sa maong puya. Napugos pagpa- adopt ang mga apohan ning bataa kay di sila makasarang og buhi kay wa lagiy pangita. Wa man gani silay ikabayad sa ospital.
Mipahasubo sila si Cedric ug Lenie sa mga kaliwat sa bata labi pa sa mga apohan. Gikuyogan sila sa mga tagtungod didto sa morgue. Wala nila kapugngi ang ilang mga kaugalingon. Bisag di nila kaila, gibati silag kasakit nga nagtan-aw sa haya sa single mother nga inahan sa ilang anak.
“Planado diay sa Ginoo ang kinabuhi sa tawo.” Gibuak ni Lenie ang taudtaod nga kahilom samtang luwan sila sa sakyanan aron manguli, “kay kon aduna pa tay anak, kinsa na man lang unyay mosagop kang Baby Zaira?”
“Karong Paskoha, gi- grant sa Ginoo ang atong wish.” Mipahiyom si Cedric dayong lingi sa iyang asawa.
Nakahukom silang magtiayon sa pagpanimba aron sugaton ang pagkatawo sa Manunubos uban sa ilang anak nga maoy labing bililhon nilang Pinaskohan. (KATAPOSAN)
Wala nay higayon nga makabaton og kaugalingong anak ang magtiayon. Apan miabot ang ilang pangandoy isip labing bililhong Pinaskohan…