Mga drug lord ibalik sa Building 14

SA higayon nga makapuwesto na si Philippine National Police (PNP) Chief Director Gen. Ronald dela Rosa sa Bureau of Corrections, gusto niya nga mabalik sa New Bilibid Prisons (NBP) Building 14 ang mga drug lord.

Nagtinguha siya nga mabantayan na pag-ayo sa Special Action Force (SAF) ang tanang mga drug lord nga sa pagka karon nagkatap sa medium security compound sama nila ni Peter Co, Sam Lee Chua ug uban pa nga mingsiaw pagpahigayon og transaksiyon sa droga mao nga kon makapuwesto na si Bato sa Bucor, i- account niya ang mga drug lord ug ibalik sa building 14 aron dili na sila makahigayon pa sa ilang modus.

Miingon si Bato nga tungod kay dili man masobornohan sa mga drug lord ang mga membro sa SAF mangita sila (mga drug lord) og paagi nga mabalhin sa ubang compound nga dili kontrolado sa SAF ang transaksiyon mao nga ang uban anaa na sa medium security compound.

Mipasabot si Dela Rosa nga ang pagpabalhin sa mga drug lord sa Building 14 dili lamang makahunong sa transakiyon sa droga kondili makapasanta usab sa pagpasulod sa mga cellular phone ug mahunong na sab ang transakiyon sa droga sa gawas sa presohan.

Kahinumdoman nga kaniadtong Hulyo gipabalhin ni Justice Secretary Vitaliano Aguirre II ang siyam ka high profile inmates nga nalambigit kang Sen. Leila de Lima sa giingong illegal drug trade sa NBP lakip sila si Rico Caja, Joel Capones, Jojo Baligad, Benjamin Marcelo, Sam Lee Chua, Hans Anton Tan, Che Kit Chua, Peter Co ug Vicente Sy.

Misaad usab si Bato nga pailisan o papulihan niya ang mga sakop sa SAF og laing sakop matag tulo hangtod sa unom ka buwan sa ilang kada puwesto.

Si Philippine National Police (PNP) Chief Director Gen. Ronald dela Rosa moretiro na sa Enero 2018 sa edad nga 56.— TNB