ANG GIDANGATAN SA GUWAPO
(Anib 2)
UG milingi ang amahang Milagros kang Mrs. Roldan nga dihas ilang luyo. “Salamat, Ma’m… moadto na mi!” Ug misunod sab paglingi ang asawa sa prinsipal apan ang usang kamot naggakos sa hawakan sa bana.
Midiretso si Tisoy sa Room No. 4 kay klase nila sa Algebra ug si Mr. Wenceslao Rivera maoy ilang maestro.
Migahob ang tibuok klase sa iyang pagsulod. Lakip si Mr. Rivera lanog og katawa.
“Mao nay sangpotan sa guwapo!” ni Mr. Rivera nga didto ra naglingkod sa silya sa atubangan sa iyang lamesa nga nahimutang sa eskina sa kuwarto simpig sa bentana ug kilid sa blackboard nga naatbang sa pultahan.
“Bitaw, uy! Ngano ba sang mora man kag Piolo Pascual?” tingog sa usa ka klasmeyt nga babaye, si Nida Galanaga.
“A… di gyod, mora sag si Vhong Navarro nga daghan nang nangehang babaye, pero wa man makaprobar.” Si Editha Bentor ang misal-ot. Ug mibalik paggahob ang tibuok klase.
Nagpanglingo si Tisoy nga igo rang mipasiplat sa ilang maestro ug sa mga klasmeyt sa pikas ug pikas. Midiretso siya sa iyang lingkoranan apan may nahinumdoman.
“Ang ako diayng bag…!” Ug mihana siyag balik sa gawas apan gitawag siyang Rey Ygot, iyang katupad sa paglingkod.
“Dia ang imong bag. Akoy nagkuha kay nakita ko mang imong gibilin didtos bombil,” ni Rey Ygot.
Mibalik siyag midiretso paglingkod. Ang mga mata sa iyang mga klasmeyt didto lang gihapon kaniya. Haiy maayog saaran mo lang nga pakaslang ilang anak? Mora nay paaging makagawas kas peligro.
Nakapanglingo si Tisoy. Miingon ang amahang Milagros nga aron sila makabawos kanako ipabuang kuno ko, ilabi na sa dihang giingnan kong di akoy nanglugos, si Milagros maoy nag-rape nako! Ug giingnan nakong may mga testigo ko. Ug kuhaon ko na unta silas Clarissa ug Marites. Apan misingka hinuon ang amahan nga di motuo kay buotan kunong ilang anak!
“Da, di ba pareho kas gidangatang Vhong? He-he!” salga ni Editha Bentor.
Wala motubag si Tisoy. Iyang nakita silas Clarissa ug Marites nga ming-apil sag pangatawa ug unya mopasiplat kaniya. Nagkasugat ilang mga panan-aw ni Tisoy ug sa duha.
“Pangutan-a ninyo silas Marites ug Clarissa kon kinsa gyoy nanglugos namo? Ako ba o siya? Nakakita silang gibira ko ni Milagros sa pagpasaka sa iyang giabtan.”
“Kanus-a ba kana?” Nakapangutana si Mr. Rivera nga wala pa gyod magsugod pagklase.
“Kadtong pag-uli namo gikan sa awditoryum kaniadtong Founder’s Day…” ni Tisoy.
“Saon kay Mr. Founder ug siyay Ms. Founder man.” Ug nangatawa silas Marites ug Clarissa. Ug minunot usab pagpanghugyaw ang kadaghanan sa sulod sa klase.
“Di ba akoy gipugos niya?” Maoy gipunteriya pagpangutanang Tisoy silas Clarissa ug Marites. Wala motingog ang duha ka babaye. Wa say gipunong estorya. “Tug-an pod mo, Marites! Molaban tas atong klasmeyt. Sulti sa tinuod!” Si Boy Estiola maoy miabiba nilang Marites ug Clarissa.
“Moray among nakita nga gibira siyang Milagros sa pagpasaka. Mao ra na.” Si Marites ang mitubag. Nagpakahilom lang si Clarissa apan miyango nga miuyon.
Wala na mosalga si Mr. Rivera. Iyang gipahilom ang tibuok klase. “Let’s begin our class. Forget everything about the story of Carlos and Milagros. Solve it yourself, Carlos.”
Miduko si Tisoy ug mitarong paglingkod. Ingon sa dili niya hisabtan ang kaugalingon. Labaw na ang gileksiyon ni Mr. Rivera niadtong higayona.
“Ayg pasumbi ang imong gibati.” Maguwang sa hagawhaw ang tingog ni Boy Estiola nga mitambag niya. Gipatung-an man god siya nilang Rey Ygot ug Boy Estiola.
“Ipasigarbo nang gitawag kag guwapo. Maoy hunahunaa nga ang suwerte nimo parehas ra sa suwerte nilang Piolo Pascual, Enrique Gil, ug uban pa dihang mga lalaking artista nga mingsikat sa ilang trabaho tungod sa ilang kaguwapo. Ug ayg patuyang og lakaw nga morang usa ilabi nag gabii kay basig nausab ilang plano pagbawos nimo. Ipabun-og ka.” Nagpanglingo ug sa hinayng tingog, miingon si Rey Ygot.
Nagpanglingo sab si Tisoy. Nagtutok siya sa gisuwat ni Mr. Rivera sa blackboard apan wa siyay nasabtan. Maoy nasubay sa iyang hunahuna ang nahitabo nilang Milagros kaniadtong gabii human sa ilang koronasyon isip Mr. ug Ms. Founder.
Pastilan mao nas ginhawa niyang likay-likay sa mga tentasyon sa babaye apan ngano ba tong nahitabo man to? Nganong misugot man gyod siyang mokuyog sa paghatod kang Milagros? Sila man god sab si Clarissa ug Marites ang nakaamong kay miagni man sab kaniya sa pagkuyog kanila. Managsilingan man god silag giabtan. Sa sunod ra silang apartment mag-abot dayong sulod ngadto sa merkado sa Placer.
Apan sa pag-abot nila didto, wala dangtig baynte minutos sa ilang pagpanglakawng upat, didto sa atubangan sa apartment nga giabangang Milagros, duol sa hagdanan, gipugos siyang Milagros sa pagpasaka. Giagda ni Tisoy silas Clarissa ug Marites sa pagpasaka kay basig may matimo-timo sa itaas.
Namalibad ang duha nga kakataw-onon apan ming-apura pa niyang Tisoy nga pasundon kang Milagros. Maong napugos na lang siya pagsunod. Basin sab og may painit nga giandam si Milagros ug human mamainit mobiya dayon siya.
Iyang gilingi ang duha nga nanagkatawang mingtan-aw kaniya. “Panaka mo kay basig may kape diri.”
Igo lang ang duha nga nagpanglingo nga ingog kakataw-onon. Dayong biya nila kay mosaka na sab sa balay nga kasimpig ra sa gipuyang Milagros.
Napugos siya pagsaka sa tulo ka ang-ang nga hagdanan kay gibira ang iyang pikas nga bukton ni Milagros.
Apan lahi ang nahitabo. Inay mamainit, midiretso si Milagros sa iyang kuwarto. Milingkod si Tisoy sa lingkoranan diha sa gamayng sala gawas sa kuwarto. Way laing kauban si Milagros. Kini rang usa ang nagabang sa maong kuwarto.
Taudtaod, migawas si Milagros apan sa dakong kahiwasa ni Tisoy, ingog nag-alindasay ang iyang kahiladman nga nagtan-aw kang Milagros.
Naghukas kini sa iyang gisul-ob nga blawos ug ang sayal na lay nahabilin. Gitangtang na sab ang bra nga gibilin sa kuwarto. Nakita ni Tisoy ang kinatibuk-an sa dughan ni Milagros. Ang tigson nga dughan ingog nagpangamay kaniya.
Nakapanglingo si Tisoy. Wala siya makasabot sa iyang gibati. Ania ang tental ug ingog di niya malikayan ang sugnib sa iyang pagbati. Mitigson na sab ug may midagaang sa iyang kahiladman.
“Nagsakit ang akong tiyan maong ari tas kuwarto aron imo kong mahilot.”
“K-kutob ra ta diha, ha!” Gikulbaan si Tisoy ug nagkanguhal ang iyang hinayng tingog.
Way tingog si Milagros nga mikabyon kaniyag gibira siya aron mosulod nas kuwarto.
Humot gihapon si Milagros sa pahumot nga gigamit niini. Si Tisoy wa gyoy pahumot gawas sa baby oil nga maoy iyang gigamit pagpalumoy sa iyang buwagaw nga buhok.
Nadala gyod siya sa sulod sa kuwarto. Didto sa sulod maoy iyang nakita ang gamayng katre nga igo rang kahigdaan sa usa ka tawo. May usa ka unlan nga taas ug pinundahag puti.
Mihigda dayon si Milagros ug gikab-ot si Tisoy sa pagpalingkod sa iyang kiliran kay nagpabilin pa man kining nagtindog sa ngilit sa katre kay nagdibal ang hunahuna. Tubayan ba kaha niya? nakapangutana siya sa iyang kaugalingon.
Wala makatingog si Tisoy nga gibatig kahiwasa. Mingsamot paggimok ang iyang kaunoran sa dihang gihubo na ni Milagros ang sayal niini. Tungod sa bombilyang gamay sa kuwarto, tataw kaayo ang pamustora niini. Naghiting-hiting ang bus-ok nga mga ugdo sa dughan ug bisag may kahadlok, kahaklapon nang iyang mga kamot niini.
Gisugdan niya paghaklap ang duha niya ka palad sa namugnawng tiyan ni Milagros. Tungod sa kabugnaw, nanguryente kini sa kalawasan ni Tisoy. Apan gipugngan niyang dili mahitabo ang dugay niyang gilikayan aron makahuman sa pag-eskuyla sumala pas pahimangno sa iyang apohan. Nahinumdoman niya ang kanunayng pahimangno sa iyang Tatay Imok panahon sa ilang pagpangaon. Sama sab sa nahitabo sa iyang inahan, si Mama Lisa niya nga naundang pag-eskuyla kay napasabkan. Ug siya maoy resulta.
“Pisila paghinay kay anaay di na nako masabtang kasakit,” ni Milagros. (PADAYONON)
Nagpatianod siya sa bul-og sa lawasnong pagbati