Armadong barangay tanod ipadakop ni Bato

GIMANDOAN ni PNP Chief Ronald dela Rosa ang tanang hepe sa mga unit sa kapolisan sa tibuok nasod nga ipadakop ang mga barangay tanod nga magdala og armas.

Kining maong kamandoan gipasikad niadtong dugoong aksidente sa Mandaluyong City diin adunay grupo sa mga barangay tanod nga namusil sa mga sibilyan nga nagsakay sa usa ka AUV. Ang mga tanod nangapil sa nangrespondeng mga polis nga nagsakay sa duha ka mobile car. Duha ka sibilyan ang nangamatay ug duha sab ang nangaangol kaniadtong Disyembre 28 sa gabii.

Matod ni Dela Rosa, dili awtorisado ang mga barangay tanod sa pagdala og armas ug mamusil.

“First of all itong mga tanod na ito they are not authorized to carry guns kaya right now I am giving instruction to all members of the PNP, hulihin nyo lahat ng tanod dyan na armado magalit na kung magalit dyan yung mga mayor na bossing ng mga tanod na yan wala akong pakialam,” pasabot ni dela Rosa.

Gipahayag usab ni Dela Rosa nga mahimo lang nga magdala og armas ang mga tanod kon sila may Permit to Carry Firearms Outside of Residence (PTCFOR) pero dili nila kini mahimong bitbiton bisan unsang orasa o sa bisan unsang operasyon o dili nila ipakita sa mga lugar nga daghang tawo sama sa mga simbahan, plasa ug uban pa.

Dili sab ni nila mahimong gamiton sa pagronda ug kinahanglang tagoan o itago lang nila kon mogawas sila sa balay tungod kay pangdepensa lang kini.

Gipasabot ni Bato nga gitugotan ang mga local government unit nga isyuhan og armas ang mga sibilyan nga konektado sa Civil Security Unit, pero awtorisado lang sila nga magdala og armas sa sulod sa compound sa munisipyo isip security.

“Let us set the record straight we are happy, the PNP is happy na merong tanod na nakakatulong sa ating maintenance of peace and order pero kung tanod naman ang source ng problema unang mamaril well hindi natin tolerate yan dahil in the first place illegal yung pagdadala nila ng firearms,” sumala pa sa hepe sa PNP.—