SHAINA MAGDAYAO UG PIOLO PASCUAL:

NAHIMBISAN NA BA SA INAHAN NGA SILA NA GYOD?

WALA ililong sa inahan ni Piolo Pascual nga kon magminyo na ang iyang anak, wala siyay laing nagustohan kondili si Shaina Magdayao. Tinaw kining gipahayag sa inahan sa aktor diha sa buntagong programang “Magandang Buhay” sa Kapamilya Network. Dugang usab sa inahan nga sa panuigong kap-atan, angay na gayod nga magminyo si Piolo.

Lagmit nga nahimbisan na pag-ayo sa inahan sa aktor ang aktres ug ingon og nasundan na pag-ayo niini kon kinsang mga artista nga suod sa aktor. Daghan na usab ang katuigang nanglabay sukad nga nagpahayag si Piolo nga kon girlfriend na niya si Shaina, dili kuno niya angay nga ibalita pa. Tuod, wala gayod ipamalita sa aktor ang panagsuod nila ni Shaina.

Kon ngano nga sa kadaghang artista nga nahisuod kang Piolo, siya ang nagustohan sa inahan sa aktor nga ingon og nasinati na kaayo niya si Shaina. Lagmit nga ang hinungdan mao nga ang aktres nagdako nga naagak sa tukmang dalan nga maoy nakadisiplina kaniya nga nagdako sa nataran sa showbiz kauban ang iyang magulang nga si Vina Morales.

Kahinumdoman nga si Shaina Magdayao sa Quezon City na natawo. Nagdako sa showbiz, usa siya sa nagpabiling taga Kapamilya sanglit pito pa lang ang iyang panuigon diha na siya sa ABSCBN. Nailhan siya sa mga angga nga Shin, Ina, Shai, Maggie ug sa kinamub-ang tawag kaniya nga SM.

Sama sa iyang magulang, maayo usab og tingog si Shaina busa sukad kaniadtong 2005 hangtod karon, regular siya nga tigkantahan sa ASAP, ang senimanang pasundayag sa ABS-CBN. Apan bisag nahimo siyang aktibo sa showbiz sukad sa 1992 (nagsugod siya isip modelo sa mga produktong pambata), 1996 na siya nahimong lead star sa teleseryeng Lyra. Kini gisundan na dayon sa programang “Ang TV” ug “Kaybol” dayon sa pag-apil niya sa haponong teleseryeng “Marinella”.

Sanglit nagdako nga gilibotan sa mga kalihokan sa showbiz tungod kay sa pagkatawo ni Shaina sa QC sikat na man ang iyang magulang nga si Vina, klaro na lang nga sa gamay pa naamgohan na niya ang kamabulokon ug kasadya sa kalibotan sa kalingawan. Sa iya usab nga pagka mag-aawit nga miliwat sa iyang magulang, dose anyos pa lang gani siya (tuig 2000), gikapagula na ang una niyang album sa Star Records nga may titulong “Sayaw Sweet Lullabye.” Lahi nga pagka artista si Shaina nga angay panaminan sa ubang bituon sa telebisyon ug pelikula. Sanglit diha magdako sa nataran sa Kapamilya Network diin daghan siyag proyekto ug mga endorsment, nakatigom og dako ang aktres nga sa iyang pagkahingkod, nakatukod siya og kaugalingong mga negosyo nga gipaluyohan sa iyang pamilya. Ug samtang mingkita ang iyang mga negosyong Ystilo Salon, laundry shop nga adunay daghang sanga, apartment nga may 20 ka pultahan, padayon usab ang paggula niya sa mga pasundayag sa tv ug pelikula diin nakadughit pa siya og lainlaing pasidungog sukad sa bata pa siya ug hangtod nga mihingkod na. Sa iyang kinitaan, nakat-onan niya ang pagtabang sa mga NGO ug balay-sagopanan sa mga ilong tuwapos nga kabataan sama sa Hospicio de San Jose ug St. Luke Reach Out Foundation. Niadtong 2014, ginamit ang kaugalingong kinitaan ug mga donasyon gikan sa mga higala sa showbiz ug sa ubang negosyo, mibiyahe si Shaina ngadto sa kalungsoran sa Samar ug Leyte aron pagtabang sa mga biktima sa bagyong Yolanda. Sa biyahe niya ngadto sa Italya, mipuyo siya sa kombento sa San Giovanni Rotondo ug mialagad sa mga batang wala nay kaayohan ang mga sakit. Alang sa aktres, bisag artista siya, wala niya ilha nga ang iyang kalibotan mao lang ang showbiz. Dako kuno kaayo ang iyang kalibotan ug ang showbiz gamay lang nga kabahin niini. Lagmit nga maoy gipasabot ni Shaina nga isip usa ka aktres, dili lang kini maoy angay nga saligan sa panginabuhi sa kalibotan. Ug sa panan-aw sa aktres sa kadako sa iyang kalibotan, okupado siya sa mga buluhaton busa ingon og walay luna kaniya ang suliran sa kasingkasing hinungdan nga nagpabilin siyang malipayon nga walay hinigugma hangtod nga nagkasuod sila si Piolo.—