ORCHID QUEEN
MAMULONG LABOT SA HARA SA ORKIDYAS SA HORTIKULTURA 2018
KON mahiligon mo sa orkidyas, ayaw sipyata ang pagtambong sa Hortikultura 2018 karong Pebrero 3, aron maminaw sa lektyur sa bantogang Davao Orchid Queen labot sa Queen of Orchids. Ang atong gipasabot nga orchid queen mao si Sally Leuenberger ug ang gipasabot natong queen of orchids mao ang waling-waling. Ipahigayon ang lektyur sa mga alas dos sa hapon sa Quezon Memorial Circle sa Quezon City.
Ang waling-waling mao ang labing bantogan nga orkidyas sa atong nasod. Si Gng. Leuenberger usab mao ang labing aktibo nga nag-atiman og pangkomersiyal nga waling-waling dili lang sa Davao kondili sa tibuok nasod.
Dili lang kalabot sa hustong pag-amuma og walingwaling ang tukion ni Sally sa iyang lektyur kondili lakip ang pamaagi unsaon pagsugod aron magmalamposon sa patigayon sa pagpasanay og orkidyas. Apil na usab nga hisgotan ang ubang barayti sa orkidyas.
Ang tambag niya niadtong buot mamatigayon og orkidyas: magsugod sa gamay lang una ug anha na lang padak-on ang patigayon kon makabaton nag saktong kasinatian ug kahibalo sa pag-atiman ug pagpamaligya sa mga tanom. Angayng ilista ang tanang gasto ug kita sa patigayon aron masayran kon nakaganansiya ba o naalkanse.
Adunay upat ka pulong nga angayng timan-an niadtong buot mamatigayon og orkidyas, matod ni Sally: Kakugi, Pasensiya, Pagdaginot, ug Puhunan. Angay nga ang si bisan kinsang buot mosulod niining maong patigayon adunay kakugi ug pasensiyoso, ug maantigong magdaginot ug magtigom aron mamahimo na usab nga puhunan ang tinigom.
Aron mousbaw ang patigayon, angayng ipamuhunan
ang 80 porsento sa ganansiya ( profit) ug ang nahabiling 20 porsento mao lay gamiton sa personal nga galastohan. Siyempre, aduna pay laing estratehiya si Sally aron ang pamatigayon og orkidyas makalingaw ug sa samang higayon maayog kinitaan.
Sa wa pa niya himoang hingpit nga panginabuhi ang pag-atiman og orkidyas, mitambong una siya og lainlaing seminar kalabot sa orchid business, nagbasa og mga libro ug uban pang balasahon, mitambong sa lainlaing orchid show sa nasod ug sa gawas sa nasod.
Midako ug midako ang iyang patigayon sa orkidyas ug sa pagka karon lima ka ektarya sa pito ka ektarya niyang yuta gipuno sa waling-waling ug uban pang barayti. Sa bisan unsang panahona sa tuig, aduna siyay 300,000 ka punoan sa orkidyas sa iyang umahan. Aduna sab siyay gibuhi nga mga baka nga adto ra sab maningaon sa mga sagbot sa bakanteng bahin sa iyang luna. Ang halin niya sa baka maoy iyang gigamit aron igasto sa mga eskolar niya sa hayskol.
Philippine Horticultural Society nga gipangulohan ni Dorie S. Bernabe isip tagsiya ug ni Norman Villanueva isip presidente. Ipahigayon kini karong Pebrero 2 hangtod Pebrero 11, 2018.
Niining tuiga, ang Allied Botanical Corporation maghimo og dakong eksibit sa ilang mga mamuwakayng tanom sama sa sunflower, zinnia, marigold, celosia, ug daghan pa. Mao usab ang EastWest Seed, magpakita sab sila sa ilang begonia ug uban pang mamuwakayng tanom.
Ang Department of Trade and Industry (DTI) magpabarog og air-conditioned tent diin adto ipahigayon ang lektyur ug adto usab magdispley og baligyang mga produkto sa mga micro, small and medium enterprises nga gitabangan sa DTI aron makabaligya sa ilang mga produkto.
Siyempre, sama sa kasagarang manghitabo sa mga garden show, daghan ang ipasundayag nga matahom nga mga masetas. Adunay tigi sa lainlaing kategoriya ug ang magmadaogon gantihan og mahinungdanong premyo.
May mga lektyur usab labot sa lainlaing tema matag adlaw. Sa Pebrero 11, kining inyong alagad mamulong labot sa exotic fruit trees sama sa duryan, longkong lansones, imported nga tambis ug daghan pa.
Magkita-kita unya ta didto.—