KOMBENSIYON SA BATHALAD CEBU 2018

ANG Bathalan-ong Halad sa Dagang (Bathalad) Sugbo, Rehiyon 7 mopahigayon sa tinuig nga dakong tigom ( convention) karong Enero 28, 2018 sa Handuraw Pizza Cafe sa White Gold Complex, North Reclamation, Dakbayan sa Sugbo, ala 1:00 ngadto sa alas 5:00 sa hapon.

Si Cheeno Borden, Palanca awardee ug opisyal sa Bathlad Sugbo, mohatag sa iyang hamubo nga lecture series (dugtong-dugtong nga pagtudlo) sa estilo ug han-ay sa pagtagik og balak.

Lakip sa highlights (tugbawng pahigayon) sa dakong tigom o kombensiyon mao ang awarding ceremonies sa Bathalad Sugbo Tigi sa Sinuwatay 2017, pagpili sa bagong mga opisyal ug pagbasa og mga balak nga halad o pahinungod kang anhing Magbabalak Melchor Yburan kinsa maoy unang gituboy sa 1989 sa Hawanan sa Kabantog sa Bathalad sa natad sa Sugboanong pamalak.

Si Dr. Melquiadito M. Allego, magtutukod ( founder) sa Bathalad nga tua na magpuyo sa Estados Unidos, motambong sa kombensiyon ug mangunay sa pagtunol sa mga ganti ngadto sa mga mananaog human mohatag og hamubong pakigpulong.

Nag-unang sponsors ning maong kalihokan mao ang Handuraw Pizza, White Gold alang sa venue ug sa Tigi sa Sinuwatay nga sila si Dr. Mel Allego ug kapikas nga si Thelma (Balak), Dr. Juvenal Jabil (Sugilanon), Dr. Aurorita Lariosa-Dayon uban ni Atty. Arielita LariosaLagman (Usa ka-akto nga Dula) ug Evalinda Lariosa Despo (Gumalaysay). Ang mga sponsor sa tigi pulos nagpuyo sa gawas sa nasod sama sa Estados Unidos ug Singapore.

Ang bangga o tigi gipahigayon sa konseho sa miaging mga pangulo ( council of past presidents) nga sila si Ernesto D. Lariosa (Tsirman-Internal) Vicente Bandillo (TsirmanExternal), Lamberto Ceballos (Puli-Tsirman) ug Rogelio Pono, Mike Obenieta, Antonio Allego, Josua Cabrera, Goddy Ypon, Genica Mijares ug Jeremiah Bondoc (mga sakop).

Ang kombensiyon nagsapnay ning tema o dugokan: Way Kutas nga Pagpadayon sa Kalamboan sa Katitikang Sugboanon.

Ang kasamtangang mga opisyal sa Bathalad Cebu: Rolando R. Morallo, pangulo; Karla Quimsing, pulipangulo, Kevin A. Lagunda, kalihim, Romeo Nicolas Bonsocan, mamahandi; Richellet Chan, tigsusipi; Roehl Joseph Dazo ug CD ‘Cheeno’ Borden, tigsangyaw.

Gidapit ang tanang sakop sa Bathalad Cebu nga dili mopakyas sa pagtambong sa kalihokan ug abli usab kini ngadto sa dili mga membro nga interesado sa literaturang Bisaya. —