KADTONG KOMBENSIYON SA BATHALAD CEBU
TUGOB sa kahinam kong mibiya sa among panimalay sa Purok Lemonsito, Barangay Gun-ob, Lapulapu City nianang wala pay alas dose sa udto sa Enero 28, 2018. Ingon ining orasa ang sagad kong igikan padulong sa sibyaanan nga akong gialagaran nga nahimutang sa Fuente Osmeña, Cebu City. Gahinan ko gayod og kapin sa usa ka takna ang biyahe aron dili ko maulahi sa akong trabaho isip tigsulat og balita kay ala una man ang akong tambong. Hinuon, dili estrikto ang tagdumala sa oras basta mahuman lang ang trabaho ug dunay mabasa nga balita ang newscaster nianang pagka ugma (kay Domingo man kadtong adlawa ug walay balita sa alas 4:00 s.h. nga maoy naandan gikan sa Lunes ngadto sa Biyernes).
Apan dili ang pagtambong sa akong trabaho ang tuyo ko niadtong higayona kondili ang tinuig nga kombensiyon sa Bathalan-ong Halad sa Dagang (Bathalad) Cebu sa Handuraw Pizza Café sa White Gold Complex, North Reclamation Area, Dakbayan sa Sugbo. Segun sa eskedyul, ipahigayon ang kombensiyon ala una ngadto sa alas singko sa hapon.
Sa wala pa ko mogikan, miteks ko kang Jondy Arpilleda nga akong gidapit pagtambong sa maong kalihokan (kay ania na man siya magkanunayan sa Sugbo tungod sa iyang pagkuhag masteral sa usa ka unibersidad) ug gipangutana kon nagpaingon na ba siya sa venue. Mitubag si Jondy nga naligo pa siya sa hotel nga iyang gisak-an ug si Richel Dorotan a.k.a. Omar Khalid ug Jose Allende, literary editor sa Bisaya, miuna na lang kaniya. Sulagma nga nagkapareho silag gisak-ang hotel si Omar hinungdan sa ilang panagkita.
Alas 12:30 pa sa udto dihang nahiabot ko tungod sa ganghaan sa White Gold Complex diin nahimutang ang Handuraw Pizza Café. Human ko makakawas sa 21A nga akong gisakyan, nagbarog-barog una ko simpig sa kongkretong koral sa Queen City Memorial Garden ug nanawag kang Mar Manus, Jr. nga nagpadu’ng na usab sa benyu niadtong tungora. Matod niya, anaa pa sila ni Nelson, iyang manghod, sa may Park Mall sa Mandaue City.
Gihuwat-huwat ko sila apan kay layo-layo pa man tong Park Mall ug gilaay kog pinaabot nakahukom kong mosu’d na lang sa compound sa White Gold. Milabang ko sa Don Andres Soriano Ave. ug mipadayugdog paingon sa Handuraw diin sa akong ilokan gisipitan ang plastik nga sudlanan sa anteyohos (nga gisudlan kog bolpen, lighter, ug USB) nga gipatangag sa gipiko nga karaang newspaper nga akong ipandong-pandong kon magtutaligsik.
Pagdangadanga nako sa Handuraw Pizza Café, nalantawan ko dayon si Omar ug Kevin Lagunda nga nanagbitbit nag botelya sa ‘pulang kabayo’. Nakabantay dayon nako si Jose Allende nga nagpahiyom. Misaludo ko kaniya dayong patighulog sa ilang nahimutangan. Apan tayming nga mao usay pag-abot ni Karla Quimsing, batan-ong magbabalak, ug nagbeso-beso ang duha.
Nasigpatan ko si Israel Ybañez didto sa usa ka lamesa uban sa duha niya ka anak-babaye nga mialalay kaniya kay maglisod na man lagi siya paglakaw. Didto na usab ang maanyag-mapahiyomong si Richellet Chan, gradwado sa Young Blood Writer sa Bisaya (YBW), nga naglingkod sa registration table uban kang Rolando ‘Dodong’ Muralllo, presidente sa Bathalad-Cebu. Gipig-it ko ang tuo niyang kamot ug akong nabatyagan ang kabugnaw ug kalumoy sa iyang palad nga bolpen, keyboard ug keypad ray sagad tapoy-tapoyan.
Miduol ko kang Israel ug naghinabi mig kadiyot. Nangutana siya hain si MMJ ug giingnan kong nagpadu’ng pa. Unya mipahiluna ko niadtong bakanteng silya atubang sa usa ka talad. Mingtimbaya usab kanako sila si Lam Ceballos ug Ernesto Lariosa nga didto sa pikas lamesa.
Wala madugay ming-abot sila si Oliver Flores, Fred Monternel, Jondy Arpilleda, Dr. Melquiadito Allego ug kapikas, ang managsoong Renato ug Rogelio Pono, Elpidio Dal Aranggo, Jr., Emeterio Sumagang, Apronianito Miramon, Seth Salcedo, ang bag-ong mga gradwado sa YBW nga sila si Wilfreda Cabusas ug Niño Augustine Loyola ug ang emcee sa tulumanon nga si Jae Marie Magdadaro uban sa iyang magdadasig nga si Ton Daposala. Gilamano ug gipaamen ko si Inday Jae sanglit nagsabot man mi nga usa ko sa moluhod sa iyang kasal puhon kon walay kakulian. Una pa kadto namong panagkita.
Nakita usab nakong mitunga si Kapitan Francis Espares sa Barangay Quiot, Cebu City nga usa ka banggiitang dramaturgo ug magsusulat og drama sa DyHP. Gidapit diay siya ni Israel nga usa sa mga mulupyo sa maong barangay. Naulahi pag-abot sila si MMJ ug Nelson kay nahisalaag ug wala dayon makadumdom sa benyu.
Nianang ala una pasado sa hapon gibuksan ni Inday Jae ang
tulumanon. Human sa mga pulong sa paghangop ( welcome remarks) ni Murallo, gisunod ang lecture ni Cheeno Borden bahin sa lahing estilo sa pagtagik og balak diin usa lang ka vowel ang gigamit. Makita sa sampol niyang balak nga giulohan og Ang Abat nga kontrolado niya ang paggamit sa vowel nga A sa tibuok balak.
Apan mitumaw ang diyotayng tensiyon dihang nangukit si Jun Aranggo (nga morag napikal) nganong ipamugos man ni Borden ang maong pamaagi nga lainlain man og estilo ang matag magsusulat. Iya pang gihimong sanglitanan ang tigi sa Bathalad Mindanao. Gipasabot ni Borden nga ang iyang gipaambit iyaha lang kaugalingong mugna ug wala magpasabot nga kini nay sundon sa ubang magsusulat. Nagtuo man god si Aranggo nga mao kiniy gibasehan sa paghukom sa kontes (kay usa man si Borden sa mga maghuhukom sa sugilanon) hinungdang morag misaka ang dugo sa iyang ulo. Maayo na lang kay mikalma kini dihang misalga si Omar ug maoy mipatin-aw sa gilalisang isyu.
Dihay basa-balak nga gipahinungod sa mitaliwang magbabalak nga si MelchorYburan sa wala pa ipanghatag ang mga ganti sa mga nakadaog sa tigi sa sugilanon, balak, gumalaysay ug usa-ka-aktong drama. Lakip sa mga mingbasa mao sila si Kevin Lagunda, Ernesto Lariosa, Richellet Chan, Roehl Joseph Dazo, Jae Mari Magdadaro, Ton Daposala, Wilfreda Cabusas, Omar Khalid ug Mar Manus, Jr. Gitunol usab sa maong higayon ang mga sertipiko sa uwahing minggradwar sa YBW pinaagi ni Editor Richel Dorotan.
Unya samtang nagtungab-tungab ko niadtong botelya sa RH gipasigpatan ko si Eda nga diha sa akong likod hangtod nagkaabot ang among panan-aw ug kaha nakamay-ong sa akong hitsura sa Facebook, mibathay ang matam-is niyang pahiyom. Mao pa kadtoy una namong panaghimamat ni Eda. Sanglit distansiya ra man siya gikan kanako, gipaabot nakong mopaduol o moagi siya tungod sa akong gilingkoran. Tuod man, miduol gyod siya sa akong luyo ug akong gitimbaya dayong pig-it sa lumoy niyang palad. “Komosta, Sir?” matod pa niya. “Okey lang. Ikaw tong nagsuwat sa sugilanong Pinangga, sa?” Miyango siya.“Ngano man diay, Sir?” “Bag-o ra man god nakong nabasa. Taasa, uy…” “Mao ba? Salamat, Sir. Nice meeting you...” ni Eda pa dayong lakaw balik sa iyang kaubang babaye nga sa akong tan-aw, iyang suod ug kauban sa trabaho o kaha klasmet.
Ang kataposang bahin sa tulumanon mao ang pagpili sa bag-ong mga opisyal sa Bathalad Cebu ug ang gituboy ug napiling mangulo ug motimon sa kapunongan su’d sa usa ka tuig mao si Karla Quimsing uban kang Jae Marie Magdadaro isip puli-pangulo. Nasabotan nga silang duha na lay mopili sa uban nilang kaabag sama sa kalihim, mamahandi, tigsusipi ug mga tigsangyaw.
Nahuman ang tulumanon nianang alas 5 sa hapon. Plano unta nakong mosibat sa mga alas 3:00 apan gitiwas ko na lang total nakahimo na man ko daan og lima ka news items busa kuwang na lang kinig napulo kay 15 man ang gikinahanglan sa tunga-sa-oras nga programa sa mga balita nianang Lunes sa alas 7:00 sa buntag.
Nag-uban mi ni MMJ ug Nelson sa pagpamiya sa Handuraw Pizza Café ug nagbuwag mi sa eskina duol sa SM City Cebu kay sila para Lapulapu man samtang ako para Fuente Osmeña diin adto ko magatang og dyip sa Mabolo.—