KARAANG TRADISYON SA MGA TAGA KAZAKHSTAN
KANIADTO ang mga Kazakh (mulupyo sa Kazakhstan) magbalhin-balhin og pinuy-anan. Bisan gani karon, ang ubang Kazakh nga magbalantay sa hayopan manugway sa ilang mga hayop diha sa nagkalainlaing mga sibsibanan depende sa panahon. Kon ting-init mangadto sila sa mga sibsibanan sa bugnawng kabukiran ug kon panahon sa tingtugnaw mamalhin sila sa mga init-init nga sibsibanan sa kapatagan.
Ang ubang Kazakh namuyo sa dagkong mga siyudad pero makita sa ilang tradisyon ang mga pagkaon ug mga handicraft nga maoy estilo sa kinabuhi sa ilang katigulangan nga magsigeg balhin-balhin og puluy-anan.
Ang mga Kazakh daghag karaang balak, awit ug musika nga ilang tugtogon pinaagig lumad nga mga instrumento.
Ang yurt nga ilang naandang balay nga mabalhin-balhin nahimong simbolo sa usa ka tawo nga nagpakabana sa kinaiyahan. Ang mga magbalantay mas mopilig puyo sa yurt pero ang mga Kazakh nga taga siyudad mopuyo lang niini panahon sa espesyal nga okasyon.
Ang mga yurt nagsilbing dangpanan sab sa mga turista. Makita sa sulod sa yurt ang nahimo sa mga babaye sa pagborda, paghabol ug paghimog carpet.
Minahal kaayo sa mga Kazakh nga nagpuyo sa kabaryohan ang ilang mga kabayo. Aduna silay 21 ka pulong alang sa kabayo nga lainlaig kahulogan, ug kapin sa 30 ka pulong ug ekspresyon alang sa kolor sa balhibo sa kabayo. Ang maayog liwat nga kabayo mahal ug makalipay kaayo nga iregalo. Sa kabaryohan, ang mga batang lalaki makamao nang mangabayo.
Ang pagkaon sa mga Kazakh aduna gayoy karne pirme ug sagad dili halang. Kinaham nila nga ilimnon ang koumiss nga hinimo gikan sa gatas sa kabayo ug daghag sustansiya, ug ang espeso ug medyo aslom nga shubat gikan sa gatas sa kamelyo.—