IKA-18 NGA IYAS LASALLE NATIONAL WRITERS’ WORKSHOP, BUKAS NA
ANG ika-18 nga IYAS Lasalle National Writers’ Workshop nanawat na usab og mga aplikasyon alang ning tuiga. Ipahigayon kini karong Abril 15-21, 2018 didto sa Balay Kalinungan, University of St. Lasalle, sa Bacolod City.
Ang IYAS giabagan sa University of St. Lasalle (USLS), uban sa Bienvenido N. Santos Creative Writing Center sa De La Salle University (DLSU), sa National Commission on Culture and the Arts (NCCA), ug sa Institute for Climate and Sustainable Cities (ICSC). Sama sa nangaging mga tuig, si Dr. Marjorie Evasco gihapon ang modumala isip workshop director. Ang panel pagalangkoban nila ni Ronald Baytan, Grace Monte de Ramos, John Iremil Teodoro, Susan Lara, ug Em Mendez. Si Ray Boy Pandan kinsa maoy project coordinator mosilbi usab isip membro sa panel.
Ang screening committee sa maong pasinati modawat og mamugnaong mga sinulat sa Hiligaynon, Cebuano, Filipino ug English. Ang fellowships i- award agad sa dyenra ug lengguwahe. Ang mga salmot nga mingsuhid ( explore) sa problemadong mga relasyon sa tawo uban sa kalikopan ( environment) maoy hatagan og dakong kahigayonan alang ning maong fellowship. Napulog lima (15) ka aplikante ang pagapilion alang sa workshop fellowship, diin maglakip sa transportation subsidy ug board and lodging.
Aron ang aplikasyon sa workshop fellowship makonsiderar, ania ang mosunod nga rekisitos nga kinahanglang andamon:
1.) Magsubmiter og orihinal ug wala pa mapatik ( unpublished) nga obra sa usa lamang ( only one) ka napiling dyenra ug pinulongan: 6 ka balak, 2 ka mugbong sugilanon, o 2 ka one-act play;
2.) Tulo (3) ka computer-encoded nga hard copy sa salmot ang angayng ipadala, sa font size nga 12 pts., double-spaced; ug
3.) Usa ka mubong resume, ID photo sa aplikante, ingon man kompletong detalye sama sa adres sa pinuy-anan, e-mail ug contact number.
Ipadala sa dili pa molapas sa Marso 10, 2018 ang entry ug ubang rekisitos ngadto kang:
Dr. Marjorie Evasco, Workshop Director, c/o Bienvenido N. Santos Creative Writing Center, De La Salle University, Room 208 Miguel Hall, 2401 Taft Avenue, Malate, Manila 0922.—