Hustisya Sa Kamatayon Rotoras ni
GIHINGUSGAN sa mga sakop sa National Bureau of Investigation (NBI) ug sa mga sakop sa Philippine National Police (PNP) ang pagpangita sa mga kriminal nga mingpatay kang Dr. Ricardo Rotoras dinhi sa Cagayan de Oro City. Si Rotoras maoy presidente sa Philippine Association of State Universities and Colleges nga sa samang higayon mao poy presidente sa University of Science and Technology of Southern Philippines (USTP) ning siyudad.
Tinguha sa mga tinugyanan sa balaod nga madakpan na gayod ang mga mamumuno aron nga mahatagan nag hustisya ang nahitabo sa usa ka dedicated public servant nga si Rotoras. Siya gipatay sa adlawng Sabado sa buntag niadtong Disyembre 2, 2017 sa gawas sa iyang panimalay sa GlowNort Subdivision nga nahimutang sa Dalan Cypress, Upper Carmen, Cagayan de Oro City. Ang mga sakop sa kapolisan mihimo nag masubsob nga pagtuon sa lainlaing anggulo sa kaso aron sa pagsulbad niini pinaagi sa pagmugna og Special Investigation Task Group nga gihugpong ni Police Director Senior Superintendent Roy Bahian.
Aron maengganyo ang tanan sa pagpanginlabot sa
natigayong krimen, ang kagamhanang lokal sa Cagayan de Oro ug ang Masonic Community ( Free and accepted Masons of the Philippines) ning siyudad mingsaad sa paghatag og duha ka milyon nga ganting salapi alang niadtong makatudlo sa nagpatay sa biktima.
Pastilan, naukay gyod ang kadaghanan tungod kay ang mga imbestigador walay nakitang bugat nga rason aron hunosan sa kinabuhi ang naasoyng presidente sa tanang mga unibersidad sa tibuok Pilipinas. Nga gumikan sa makalitong panghitabo, si Cagayan de Oro Mayor Oscar Moreno dili halos makatuo sa dayong pagkahanaw ni Ricardo Rotoras sa kalibotan sa mga buhi.
Lab-as pa sa panumdoman ni Mayor Moreno ang malipayong pagpakighinabi kaniya ni USTP President Rotoras niadtong mga higayon nga gisaulog ang kalihokan sa paghandom sa adlawng natawhan ni Andres Bonifacio sa Nobiyembre 30, 2017 didto sa Divisoria sa CDO, tulo ka adlaw sa wala pa mahitabo ang naasoyng krimen.
Nahibaw-an nga sa wala pa hunosi sa kinabuhi si Rotoras daan na siyang gipanid-an sa wala mailhing gunmen for hire aron tumbahon. Gikan pa siya sa panagtigom kun Christmas party sa tanang mga mason didto sa N hotel sa Barangay Kauswagan niadtong adlawa ug sa iya nang pagpauli sa panimalay kalit na siyang gipusil diha mismo sa iyang nataran sa wala mailhing suspetsado. Ang nahitabong krimen plansado kaayong natigayon kay gawas nga mingaw, kaadlawon pa gyod ni nahitabo.
Sumala pa ni Chief Inspector Ritchie Salva sa Carmen Police Station, unom ka bala ang ming-igo ni Rotoras— gibanatan sa mga kriminal ang iyang ulo, likod, abaga ug ubang delikadong parte sa iyang lawas nga maoy hinungdan sa hinanaling kamatayon. Alayon niini, nagtuo ang kapolisan nga giplano sa mga kriminal ang iyang pagkapukan.
Milutaw sa imbestigasyon nga upat ka tawo ang nagbuhat sa ingon. Ug posible kuno, sumala sab sa pamahayag ni NBI Region 10 Director Sally Hans Barbaso, nga ang upat ka tawo gilangkob sa duha ka professional killers, gisundan sa ikatulo nga didto nang daan nagpahipi sa lagwerta samtang naniid sa palibot ug ang ikaupat mao ang drayber.
Gibutyag usab ni Barbaso nga ang mga suspetsado nagbuhat og duha ka buok hagdan nga coco lumber. Giasembol didto sa likod aron kini makasulod sa subdivision nga gipuy-an ni Rotoras. Dako ang pagtuo sa mga tinugyanan sa balaod nga ang mga hired killer nga mingbanat sa biktima dunay kauban nga nagmonitor didto pa lang sa Christmas party sa Kauswagan nga gitambongan ni Rotoras.
Kahinumdoman nga sa iyang panahon isip presidente sa tanang state universities natigayon ang maayong pagpadagan ug maanindot nga imahen sa institusyon nga iyang gialagaran— una na niini ang pagkadeklarar sa bagong ngalan gikan sa kanhing Mindanao Universities of Science and Technology kun MUST.
Ang pag-usab sa ngalang MUST ngadto na sa USTP nahilatid sumala sa Akta Republika 10919 uban ang pagpakighiusa niini sa Misamis Oriental State College of Agriculture and Technology sa Claveria Misamis Oriental. Ang status sa USTP sa pagka karon nagpabilin sa level IV nga gihangad sa kadaghanan sa iyang pagka highest distinction. Alayon niini, ang USTP gihukman usab sa Commission On Higher Education (CHED) ug sa Department of Budget and Management nga nahiapil na sa napulog siyam ka unibersidad sa tibuok Pilipinas nga ang mga lagda ug kalidad sa edukasyon maayong pagkatuman.—