LOLO MAX: Magtutudlo Apan Nagserbisyo Isip Guwardiya Sa Eskuylahan
USA sa mga aktibong nag-alagad sa Marigondon National High School (MNHS) sa Marigondon, Lapulapu City mao si Ricardo Bartolini, 66 anyos ug lumad sa Ylaya, Marigondon, Dakbayan sa Lapulapu. Mas nailhan siya sa mga estudyante, mga maestro ug mga maestra sa eskuylahan sa tawag nga “Lolo Max”. Gradwado siya sa kursong Bachelor of Arts ug igo lang nagmaestro og kadiyot sa Dumalaan National High School sa Albuera, Leyte.
Isip edukado ug impluwensiyado sa edukasyon, bation gayod siyag kahingawa kon makita niya nga ang mga estudyante dili seryoso sa ilang pagtuon. Busa sa iyang pag-alagad sa MNHS isip tiggiya sa mga estudyante ug nagbantay usab sa iyang apo nga nagtungha sa naasoyng tulunghaan, migahin gayod si Lolo Max og panahon aron magtinarong sa ilang pagtuon ang mga bag-ong henerasyon.
Gugma alang sa kabataan maoy nagdasig kang Lolo Max kon anaa na siya sa school campus. Maya siyang ikahinabi busa walay katarongan nga dili ganahan kaniya ang kabataan. Sa mga panahon nga walay klase ( vacant time) ang ubang mga estudyante manghugop kang Lolo Max aron magpahimalad ug ang uban pod magpahilot. Manalagna ug manghihilot sab si Lolo Max.
Diha kadtoy higayon nga nasibot ko pagpahimalad kang Lolo Max. Tuod man, ang iyang panagna susama ra sa panagna sa higala kong manalagna sab sa dihang nagpahimalad ko niini kaniadto. Ug sa dihang gipangutana ko si Lolo Max kon diin niya hikat-oni ang nahuptan niyang mga hiyas, mapahiyomon siyang mitubag nga nahuptan niya ang maong mga katakos pinaagi sa iyang pagpangaliya sa Ginoo.
Malipayon kaayo si Lolo Max sa iyang pagserbisyo sa MNHS ilabi na sa paggiya sa mga estudyante. Gani, mipadayag man siya nga mahisagmuyo siya kon may mga adlaw nga walay klase kay holiday o ba kaha adunay kalihokan ang siyudad diin suspendido ang klase.
“Kadaghan ba sad sa adlaw nga walay klase, uy. Kaluoy sa mga bata,” matod niya nga nagkulismaot ang nawong.
“Ayaw sigeg kaestres ana, Lolo Max, ang imong mga kunot maoy atimana,” pahinumdom ko kaniya apan misamot pa hinuon kangislo ang dagway ni Lolo Max.
Sa dihang gipangutana ko siya kon unsay iyang lingaw sa panahon nga walay klase, mitubag siya nga mang- healing kuno siya. Usa sad kuno ang pagpang- healing sa mga hiyas nga gituga sa Ginoo kaniya. Diyosnon kaayo si Lolo Max mao nga maayo kaayo ang iyang batasan ug anaa kaniya ang kinaiya sa pagka matinabangon sa isigkatawo. Puno siya sa kinaadman ug wala gayoy bati nga mga pulong nga manggula sa iyang baba. Pagtambag ug paggiya sa kabataan maoy labing gigahinan niyag pagtagad.
“Angayng magtinarong ang mga estudyante sa ilang pagtuon. Suwerte gani ang kabataan karon kay dali na lang kaayo ang pagpangita sa ilang mga asaynment kay aduna nay internet nga makatabang. Ug kinahanglang gamiton lang nila ang internet sa eksakto ug maayong katuyoan,” panahom ni Lolo Max. Pinaagi sa pagpatingog o pagpasirbato ni Lolo Max sa iyang pito ( whistle), maigpot ang mga estudyante nga linga sa ilang pagkulukabildo human sa paniudto ug makamatngon sila nga oras na sa ilang pagbalik sa klasrom aron ang klase sa hapon pagasugdan na. Hasta ang mga magtutudlo manghinay-hinay na pagaginod paingon sa tagsa-tagsa nila ka klasrom kon mabati na nila ang sirbato sa pito ni Lolo Max. Kinse minutos sa dili pa ang ala una sa hapon mao ang takna sa pagpalanog ni Lolo Max sa iyang pito.
Si Lolo Max nag-alagad isip ikaduhang guard sa MNHS. Karon ang principal, si Sir Ernesto E. Peteluna, ug ang assistant principal si Sir Severiano B. Amistad. Kaniadto sa dugay nang panahon nga ang prinsipal mao pa si Ma’m Conchita Oyao midagsang ang kinawatay nga ang naghimo mga estudyante ra usab, ug tungod kay manggihunahunaon man kaayo si Lolo Max sa kaayohan sa kabataan, iyang panakpon ang badlongong mga estudyante ug pasudlon niya sa klase. Hangtod nga gihimo siyang roving guard.
Si Lolo Max nagsuweldo og P4,000.00 nga gitunga sa PTA ug sa kagamhanan sa siyudad sa Lapulapu. Sa una igo ra siyang mobantay sa iyang apo nga babaye nga nagtungha sa MNHS apan tungod kay kada adlaw man lagi siyang anaa sa eskuylahan, gi- hire siya isip ikaduhang guwardiya (kay anaa man lagiy security nga anaa ra madestino sa main gate). Ang duty ni Lolo Max magsugod sa alas 9:00 s.b. ug mo- out siya sa alas 6:00 o 7:00 s.g. tungod kay iya mang tsek-apon ang mga klasrom inigbugno na sa kahayag ug kangitngit aron pagseguro nga walay mga estudyanteng manag-uyab nga mag- date.
Bisan gradwado o propesyonal ug kalipikado nga motudlo sa mga eskuylahan, igo lang si Lolo Max nga nagmaestro og dili kaayo taas nga panahon kay ang pagka guard lagi kuno ug ang paggiya sa kabataan ang anaa sa iyang kasingkasing.—