balaoron alang sa magtiayon nga gustong magbuwag nag-ung-ong na sa kongreso

GIDUSO na sa Ubos nga Balay Balaoranan sa Kongreso ang balaorong nagtinguha alang sa mas ubos nga bayranan ug paspas nga proseso sa pagpa- divorce.

Sumala ni Albay Rep. Edcel Lagman, pangulo sa technical working group nga gitahasan nga maoy mo- consolidate sa upat ka divorce bill, gilaoman nila nga walay makababag sa naasoyng balaoron nga gilaoman usab nga maaprobahan sa Kamara.

Mipasabot si Lagman nga sa Marso 8 nga saulogon sab ang International Day for Women tukion sa plenaryo ang kontrobersiyal nga balaoron.

Sukwahi niini, tutol si Magdalo Rep. Gary Alejano sa divorce bill tungod kay mituo siya sa “sanctity of marriage” ug makaguba lang kuno kini sa pamilya isip usa ka institusyon.

Nabalaka si Alejano nga hayan daghang magtiayon nga magbulagay kon aduna na unyay divorce law ug mahimong makaluluoy ang ilang mga anak.

Lakip sa consolidated divorce bill mao ang House Bill 6027 ni Speaker Pantaleon Alvarez diin usa ang basehanan nga “unhappiness” aron tugotan sila sa korte nga ma- dissolve ang ilang kasal.

Ubos sa maong balaoron, ang agrabyadong asawa exempted sa court fees ug ang korte maoy mokuha og abogado aron i- represent ang petitioner nga gikan sa Integrated Bar of the Philippines (IBP) o uban pang legal aid groups.

Gilatid sab sa naasoyng balaoron nga iduso dayon diha sa korte ang summary proceedings aron makabaton dayon og kagawasan ang magtiayon ilabi na kon gidagmalan o kulatado ang babaye.

Nalakip usab ang psychological incapacity, irreconcilable differences, violence hasta ang transgender surgery sa sumbanan nga mahimong ipakita kon gusto na sa magtiayon nga magbuwag sa legal nga paagi.

Nakarga sab sa balaoron nga tugotan ang korte nga magbutang og psychologist o psychiatrist nga mas kubos ang bayranan o libre ba kaha hinuon.