PARENTS’ BRIGADE DAKOG GIKATABANG SA ESKUYLAHAN
SUKAD nga nahimugso ang Parents’ Brigade (PB) sa mga eskuylahang publiko sa Dakbayan sa Lapulapu, diha pa nahibaw-an nga daghan gyod diayng mga estudyante nga mga badlongon, nakasupak sa mga patakaran sa eskuylahan ug uban pang violations nga nangahimo o gipangbuhat sa mga estudyante nga wala lamang mamatikdi sa mga nanagdumala sa matag tulunghaan ilabi na sa security guard.
Diha lang sa Marigondon National High School (MNHS) sa Marigondon, Lapulapu City, ang security guard kun sekyu nag-inusara lang ug anaa ra gayod siya madestino sa main gate sa MNHS. Dili na siya makahigayon sa paglibot (roving) sa school campus tungod kay kon iapil pa niya kini sa iyang pagbantay wala na man lagiy guwardiya ang main gate ug delikado nga adunay makasulod o mosulod nga mga badlongon nga dili estudyante o mga estambay ba kaha nga mohimo og mga dili maayo sa eskuylahan.
Ang sekyu sa MNHS mao si Camelo Sollano. Nasuod ko siya sa dihang gitukod ni Lapu-Lapu City Mayor Paz Corro Radaza ang Parents’ Brigade ug ilabi na gayod kay ako poy nahimong presidente sa Parents’ Brigade sa Senior High School kay ang matag ginikanan nga sakop o membro sa PB padyutihon o paserbisyohon man og duha ka adlaw sa usa ka semana (adlawng tingklase). Apan hinuon, voluntary lang busa dili pinugsanay, agad lang kon adunay ekstrang taym ang mga membro.
Kay ako man lagi ang presidente sa PB sa MNHS, gituman gyod nako ang akong obligasyon. Kada adlawng Martes ug Huybes ang akong eskedyul sa pagserbisyo sa nahisgotang eskuylahan. Kada buntag ra hinuon— alas 9:0011:00. Samtang ang sa hapon lain na pod ang mangserbisyo nga magsugod sa alas 2:00-4:00.
Gawas sa seminar workshop nga gipahigayon ni Mayor Radaza sa mga member sa PB, gibansay sab mi ni Parents’ Brigade Coordinator Roseline D. Atuel ug Assistant Coordinator Carol C. Abarquez atol sa 1st Assembly meeting sa Parents’ Brigade kaniadtong Enero 26, 2018 kon unsa gayod ang buhaton namong mga PB sa panahon sa among pag- duty o pag- serve sa campus sa tulunghaan.
Sa akong kagrupo nga mangserbisyo og kada Martes ug Huybes sa buntag, ang aktibo kaayo nakong mga membro mao sila si Maria Leah Francisco, Marife dela Cruz, Ilane Igot, Yvonne Aquino, Marites Daño, Mila Mangubat, Maita Aliñabon, Gena Bello, Jocelyn Cabigas, Emely Bayawa, Felix Ompad, Noe Bracero, Ramil Potot ug Sherwin Tutor.
Ang opisyales sa Marigondon National High School Parents’ Brigade 2017-2018 mao kining mosunod: President – Mar Mañus, Jr.; Vice President – Noe Bracero; Secretary – Marife dela Cruz; Auditor – Ramil Potot; Treasurer – Sherwin Tutor; P.R.O.’s – Ma. Leah Francisco ug Ilane Igot.
Nakasinati kami og daghang mga estudyanteng badlongon. Adunay walay respeto sa mga magtutudlo ingon man kanamong mga parents’ brigade. Adunay uban nga magtuo ka nga walay klase kay anaa ra nagsigeg tabi sa daplin apan sa among pagsukit-sukit among nasayran nga ming- cutting classes ra diay. Ug nanagan pa sa dihang among gikomprontar. Ang among gibuhat amo gyong gipangsignit ug among gidala sa opisina sa principal ug sa ngadto-ngadto nakamatngon ra sa ilang mga sayop.
Diha pa kadtoy magtutudlo ug ubang parents’ brigade nga nakaakto sa usa ka estudyante nga nagdala-dala og hunting knife. Mao gihapoy nahitabo, gidala sa opisina sa principal ug giisyuhan og citation. Kana mga pipila lamang sa mga violation o mga tinonto sa ubang mga estudyante nga kon wala pa ang parents’ brigade, tingali, hangtod karon wala gayod masakpi sa ilang (mga estudyante) kabadlongon.
Ang ubang membro sa Parents’ Brigade gawas nga adunay anak sa high school, human sa ilang pag- duty sa alas 9:00 hangtod sa alas 11:00 s.b., manabok na sab ngadto sa elementary school aron adto na sab mangserbisyo kay aduna man pod silay anak nga elementary pa. Sakripisyo ang ilang gihimo tungod kay dili man lang kini alang sa kaayohan sa tulunghaan kondili alang man usab sa kabulahanan sa ilang mga anak nga nagtungha.
Ang mga tulunghaan o eskuylahang publiko sa Dakbayan sa Lapulapu gilangkob sa 10 ka distrito ug ang Marigondon National High School ug Marigondon Elementary School anaa mahisakop sa ikalimang distrito kauban ang Adler Child Development Center, Inc.; Franzine Learner Center, Inc.; Cebu Christian Institute International; Nissi Academy; St. Gabrielle Academy of Lapu-Lapu, Inc.; ug Solomon Institute of Transformation, Inc.—