Mga amo sa gipatayng OFW nga gisulod sa freezer bitayon kon mapamatud-ang guilty
MATOD ni Philippine Ambassador to Kuwait Renato Villa, bitayon ang mga agalon sa gipatay nga Filipino worker nga si Joanna Demafiles kon mapamatud-an nga mga guilty sila sa korte sa Kuwait.
“Dito sa Kuwait, kung mapatunayan ‘yung kasong murder, ay death by hanging [ang parusa],” pasabot ni Villa sa mga tigbalita.
Sa miaging bulan (Pebrero), nadiskobrehan ang patayng lawas ni Demafelis nga gituohang gipatay ug gisulod sa freezer sa usa ka abandonadong apartment kaniadto pang 2016 sa iyang mga among Lebanese ug asawa niining Syrian.
Miingon si Villa nga nadakpan na ang magtiayong suspek sumala sa ilang mga source pero wala pa (sa pagsulat niini) nila madawat ang kopya sa opisyal nga kompirmasyon sa pagkadakop sa magtiayon.
Midugang ang ambassador nga gikahinabi niya ang usa ka security official sa Kuwait nga nakadawat og impormasyon gikan sa mga awtoridad sa Lebanon mahitungod sa pagkadakop sa lalaking suspek nga si Nader Essam Assad.
“Yung masasabi natin na ‘yung asawa, ‘yung lalaki, ay malamang nadakip na dahil ang source ay ‘yung Kuwaiti official na galing sa Lebanese INTERPOL,” matod ni Villa.
Hinuon giangkon ni Villa nga ang balita bahin sa pagkadakop sa babayeng suspek naggikan lang sa usa ka tigbalita sa naasoyng lugar.
“Nakatanggap kami ng tawag sa isang source lamang, isang private person dito sa Kuwait, news reporter siya, nakatanggap naman siya ng information mula sa isang Lebanese judicial official na nadakip na sa Syria ‘yung asawa,” pasabot pa niya.
Sa pagsulat niini wala pa ipagawas sa mga awtoridad sa Kuwait ang mga hulagway sa suspetsadong magtiayon.
Kahinumdoman nga gikasuko kaayo ni Presidente Rodrigo Duterte ang sinalbahis nga gidangatan ni Demafelis sa mga kamot sa mga langyawng employer.
Tungod niini, gimando ni Duterte ang pagpatuman sa total deployment ban ngadto sa Kuwait. – TNB