Richard Gutierrez & Angel Locsin

HUMAN sa usa ka dekada, ang sikat nga love team nga Richard Gutierrez ug Angel Locsin sa Kapuso Network mabanhaw karon sa Kapamilya Network uban kang Angelica Panganiban sa usa ka pelikula nga ubos sa direksiyon ni Nuel Naval.

Gikompirmar kini sa Star Cinema sa nagsunodsunod nga mga post sa instagram diin gipakita sila si Angel, Richard ug Angelica kauban sa direktor ug pangulo sa Star Cinema nga si Malou Santos.

Si Angel ug Richard nagkauban na kaniadto sa mga pelikulang “Mulawin the Movie”, “The Promise” ug “Mano Po 6: Gua Ai Di.” Nagkauban usab silang duha sa mga teleseryeng “Click” ug “Mulawin” diin inila kaayo silang nagdala sa papel nila ni Aguiluz ug Alwina sa Kapuso Network. Samtang si Angel ug Angelica nagkauban na usab sa “One More Try” kaniadtong 2012 nga entry sa Metro Manila Film Festival (MMFF).

Kahinumdoman nga gumikan sa nahitabo kang Angel diin may problema ang iyang likod, gipahibalo nga dili na siya mahimong magbida sa “Darna” sa Kapamilya nga gikasubo pag-ayo sa iyang fans, ingon man kang Angel mismo apan gipahibalo kaniya nga mogula siya sa umaabot nga pelikula.

“Bago ko pa narinig iyong story ay sinabi na sa akin na, ‘Are you OK working with Chard?’ Sabi ko, ‘Game, anong oras iyong call time ko?’ I’m very excited na makatrabaho ulit si Chard. Sobrang nami-miss ko siyang katrabaho,” pahayag ni Angel ngadto sa mga reporter.

“Iyong nararamdaman ko ay more excitement,” admitar ni Richard. “And at the same time, I consider this a challenge kasi it’s a big movie and iyong role ko requires a lot from me so I will definitely prepare. Pero more than anything, I’m excited.”

Ang panagsuod nila ni Angel ug Angelica nahitabo dihang nahiatol nga halos nagkadungan silang gibuwagan sa ilang mga karelasyon. Si Angel, gitalikdan ni Luis Manzano human sa taudtaod nilang panaghigugmaay nga nahimo ganing suod kaayo si Angel ni Vilma Santos nga inahan ni Luis. Si Angelica usab, gitaho nga naputol ang relasyon nila ni John Lloyd Cruz.

Sa Instagram, nag- message si Angelica kang Angel nga nagkanayon: “Hindi man fairytale ang simula ng friendship natin, naniniwala akong may happy ending tayo.” Ang ilang pelikula ubos sa direksiyon ni Nuel Naval, kinsa nailhan sa maayo niyang pagdirehir sa lilas nila ni James Reid ug Nadine Lustre nga “This Time”, “A Secret Affair”, ug “The Love Affair”.

Kining ilang pelikula karon ni Angel, Angelica ug Richard maoy kaagi sa duha ka babaye nga ang usa kanila ugangan ni Richard. Kon kinsa ang ugangan ni Richard kanilang duha ni Angel ug Angelica, wala pa ibutyag. Kon kinsa ang giakusahan nga nanlimbong, dili pa nato mahibaloan sanglit wala pa nato mahibaloi kon kinsa kanilang duha ni Angel ug Angelica ang asawa ni Richard. Lagmit kaha nga asawa ni Richard si Angel sa pelikula ug tungod kay nadani siya kang Angelica, wala niya kalikayi nga mahigugma usab siya niini?

Walay pay titulo ang mao nilang pelikula.

Sama kang Angel, si Richard gikan usab sa Kapuso Network ug sa paghibalhin niya sa Kapamilya Network, gikuha siya nga usa sa mga bida sa teleseryeng “La Luna Sangre” nga bag-o lang natapos. Ug ning ila karong panag-uban ni Angel og usab, mabanhaw gayod ang love team nga usa ka dekadang nawala sa telebisyon ug sa pelikula.—