LIWAYWAY, GIPASIDUNGGAN ISIP “NATATANGING HIYAS NG SINING SA PANULAT”
MIDAWAT og espesyal nga pasidungog ang magasing Liwayway sa ikatulong tuig sa GEMS (Guild of Educators, Mentors, and Students) Awards isip “Natatanging Hiyas ng Sining sa Panulat”. Ang maong pag-ila gitunol atol sa Gabii sa Pasidungog sa GEMS nga gipahigayon niadtong Marso 2, 2018 didto sa Center of Performing Arts, sa De La Salle Santiago Zobel School, Ayala Alabang Village, Muntinlupa City nga gitambongan sa inilang mga personalidad gikan sa nagkalainlaing natad sa arte.
Ang pasidungog mahinangpong gidawat sa editorial team sa Liwayway pinangunahan sa tagsulat isip editor, Wilson Fernandez, staff/photographer, ug Pamela Lim-Kwok, layout artist, nga personal nga gitunol ni G. Norman G. Llguno, ang tagtukod ug pamuno sa GEMS.
Ang GEMS nga gitukod ni G. Llguno niadtong 2016 usa ka organisasyon nga gilangkoban sa mga akademisyan gikan sa nagkadaiyang eskuylahan, mga propesyonal gikan sa pribadong institusyon ug sektor sa katilingban, ug mga tinun-an gikan sa pipila ka prestihiyosong mga kolehiyo ug unibersidad, kansang katuyoan mao ang paghashas, pag-ila ug pagpasidungog sa mga alagad sa arte sa natad sa panulat, entablado, radyo, telebisyon ug pelikula.
Ang “Natatanging Hiyas ng Sining sa Panulat” mao ang kinatas-ang pasidungog nga gihatag sa GEMS sa pipila nga may dili hitupngang kontribusyon sa natad sa arte, indibidwal man o institusyon. Ug matod pa ni G. Llguno, nagkahiusa ang tibuok
pamunoan sa GEMS nga nahiangay lamang nga kining maong pasidungog i- award sa magasing Liwayway sanglit usa na man kini ka institusyon. Ingon man usab sa dalaygon ug dakong natampo niini sa katitikan sa Pilipinas.
Sa nakalabayng kasiyaman ug lima (95) ka tuig nga pagtunhay sa Liwayway, daghan na kinig napunpon nga mga pag-ila ug pasidungog gikan sa nagkalainlaing institusyon ug sektor, ingon man sa inilang mga unbersidad. Sama pananglit sa pag-ila gikan sa NCCA, Gawad Tanglaw, Ateneo de Manila University ug daghan pang uban. Ug kining maong mga pasidungog labi pang nagpatublaw sa estado sa Liwayway isip nag-unang katitikanong magasin sa Filipino sa nasod. Kahinumdoman nga ang Liwayway magasin nagsugod kaniadtong Hunyo 15, 1922 isip Photo News ubos sa pagdumala ni Don Ramon Roces kinsa maoy publikador, ug Don Severino Reyes isip editor. Niadtong Nobiyembre 18, 1922 giilisan ang ngalang Photo News ngadto sa Liwayway nga nagpasabot og “dawn”, o “Bag-ong Sinugdanan”.
Ubos sa pamunoan karon sa Manila Bulletin Publishing Corp., ang magasing Liwayway padayong nanamkon ug nagpahimugso og mga obra-maestra gikan sa tadhan ug bag-ohang mga magsusulat ug mga dibuhista. Padayon kining nag-alagad ug nagdalit-og-lingaw sa mga magbabasa. Ug
taliwala sa mga pagsulayng dala sa nagakausab nga panahon, nagpabilin kining lig-on ug takos gayod sa pasidungog nga “Natatanging Hiyas ng Sining sa Panulat”.
Sa laing bahin, gipasidunggan usab sa GEMS si G. Dindo M. Balares sa Balita isip Best Entertainment Editor. Si G. Balares maoy kanhi movie editor sa Liwayway, ang magasing maoy unang naghulma kaniya sa iyang pagka magsusulat ug editor.
“Sabi sa akin ng discoverer ko na boss at editor namin noon sa Liwayway, ‘wag kang magpipigil ng galing. Sa mahuhusay na tao umaasa ang Diyos para maisaayos ang gusto Niyang ayusin sa mundo, hindi sa mahihina. Hindi rin pinigilan ng GEMS ang galing, kaya ngayong gabi, naririto, inipon ninyo ang pinakamahuhusay sa sining,” pu’ng pa sa pakigpulong ni Editor Balares sa iyang pagdawat sa award.
Dugang pa niini, gipasidunggan usab sa GEMS ang Balita, igsoong peryodiko sa Liwayway ug ning magasing Bisaya, isip Best in Newspaper (Tabloid). Gidawat sa Balita team ang pasidunog nga gilangkoban nila ni G. Dindo M. Balares, Dianara T. Alegre ug Allaine Cal.—