Aquino lagmit makasohan bahin sa Dengvaxia

GIBUTYAG ni Senate Blue Ribbon Committee Chairperson Richard Gordon nga hayan mapasakaan og kasong kriminal si kanhi Presidente Benigno Aquino III bahin sa kontrobersiyal nga anti-dengue vaccination program sa kagamhanan.

Gawas kang Aquino, posibleng makasohan sab sila si kanhi Health Secretary Janette Garin ug kanhi Budget and Management Secretary Florencio Abad.

Lagmit makasohan sab og graft and corruption ug pagsupak sa Code of Ethics ang nahinganlang mga opisyal sa gobyerno. Ug pasakaan pod og kaso ang French manufacturer sa dengvaxia nga Sanofi Pastuer.

Una niini, misang-at na si kanhi Technical Education and Skills Development Authority (TESDA) Chief Augusto Syjuco og kasong mass murder ug plunder batok nilang Aquino ug Garin.

Gipasakaan sab og kasong sibil sa Public Attorney’s Office si Garin ug uban pang health officials.

Gipahimug-atan sab ni Gordon nga ang pagpalit og mga dengvaxia nga nagkantidad og P3.5 bilyones usa ka “scandalously fast” kon ikomparar sa kasarangan nga dugay ang pagproseso sa budget.

Gidali-dali ni Aquino ang kasabotan sa pagpalit og dengvaxia kaniadtong nakigsabot siya sa mga opisyal sa Sanofi.

“There was a rush to try and push for this drug [even if dengue] is not even in the top ten killers in the country,” ni Gordon.

Kahinumdoman nga gihunong sa DOH ang ilang dengue vaccination program human nga migawas sa pagtuon sa Sanofi nga adunay hulga ang dengvaxia sa panglawas sa mga bata nga wala pa masakit og dengue.— TNB