ELLA CRUZ,
Padayong Gisuwerte sa Pag- artista ug Pagsayaw
GAWAS sa pagdawat og mga offer sa pelikula, maoy gikalingawan karon sa dancing diva ang paggama og series of videos. Gani, sa miaging buwan, nagmalamposon ang iyang pag-apil sa KPOP Random Play Dance sa YouTube Fan Fest Manila. Sa maong Random Play Dance nakauban ni Ella ang ELLAmazings ug ang kpop fanatics. Sa mga dance video, makita ug mabati ang tanan nga mokanta ug mosayaw sa kada kpop song nga ipatugtog.
Makita usab sa YouTube channel ni Ella Cruz ang mga dance video sama sa Bboom Bboom kauban ang iyang ka- loveteam nga si Julian Trono. Cute lagi tan-awon ang duha nga sweet maong daghan ang nanghinaot nga makabuhat sila og laing pelikula, dance cover ug mga kanta.
Sa laing bahin, nahimo usab niyang dance partner si Alden Richards sa “Safeguard Fuse It App.”
Tungod sa ka- busy sa iyang schedules, ingon sa nagkinahanglan na og clone ang dalaga aron matambongan ang tanan niyang mga commitment. Pero kining tanan iyang gipaningkamotan nga maatiman ug way maliatan.
Dako ang pagpasalamat ni Ella sa Ginoo, sa iyang pamilya ug sa mga tawo nga mingsalig sa iyang katakos. Kay padayon nga miabot ang mga grasya sa iyang kinabuhi, gikan pa sa iyang pagka child star sa “Goin’ Bulilit” ngadto sa iyang pagka dance diva diin mikatap ang iyang mga viral video sa social media, sa iyang pagka artista sa pelikula ug pagpanag-iya og dance studio nga gihugopan sa gustong makat-on sa pagsayaw.
Sa laing bahin, ipagawas na sa mga sinehan sa Hunyo 20 ang pelikulang “Cry No Fear” nga gibidahan ni Ella kauban si Donnalyn Bartolome. Ang maong suspense/thriller nga pelikula bahin sa duha ka half-sister nga may kayugot sa usag usa.
Si Kayce (Donnalyn) ug Wendy (Ella) kanunayng magkatinubagay ug way maayong buot. Apan sa usa ka higayon nga nagbagyo ug sila rang duha ang nabilin sa balay, gisulod silag tawo nga gustong mopatay nila. Niini, wala silay laing kapilian kondili ang magtinabangay aron makaeskapo.
Maoy tambag ni Ella nga kon motan-aw ka sa pelikula, ayaw pag-inusara. Aron kuno dunay mahawiran o magakos sa higayon nga kuhiton sa kahadlok.—