PINK SPAGHETTI
LTR69 Tuesday Yow12:09am Sup? 01:42am Up for? 01:45am “Ang Ginoo maanaa kaninyo. Maanaa usab kanimo.” Medyo taas-taas pod ang wali sa pari ganiha. Igo pod nalanay ang kandela nga akong gidagkotan. Naghuwat ko sa gawas sa Sto. Rosario. Bag-o pa lang mingitngit. Ang trapik baga pa gihapon. Aduna pay mga manimbahay nga nanganaog sa jeep ug nanulod sa simbahan aron moapas sa kinauwahiang misa. Nakabantay na ang tindera og kendi nga taudtaod na kong nagsige og liso sa akong kawo, nagsige og adjust sa akong poloshirt ug karsones. Ang mga
tawo ug ang mga takna nanglabay. Nakabantay pod si Ate nga ang akong mga mata adunay gipangita: ang mga tawo nga mangagi, gunitan sa akong mga tutok, ulo hangtod sa tiil, usa buhian ngadto sa nag-iniktin nga kasaba sa mga sakyanan, sa kuskos-balungos sa takna. “Naa na ko sa may Cebuana,” text ni LTR69. Milantaw ko sa may Cebuana. Naay pundok sa mga tawo nga padu’ng molabang. Kinsa kaha diha sa upat ka laki si LTR69? Una nakong nahimamat si LTR69 sa Tinder, GymBod pa ang iyang username adto. Ang iyang profile description: “Gym bod. Good looking for same. Looking for gym bud or LTR.” Guwapo siya ug, as the name suggests, gym bod gyod siya. Mao to, I swiped right. Tulo ka adlaw ang minglabay, nag- open kog balik sa akong Tinderprofile, ug nag- match mi ni GymBod, ug nagbilin siya og message. Mi- reply ko pagkabuntag niana. Pagkagabii hangtod sa buntag sa sunod adlaw, nagsige mi og chat. Dayon, nangayo siya sa akong face pic. Gisendan nako siya sa akong recent picture, ug pagkahuman, iya kong gi- block.
Tulo ka buwan ko nga wala na mogamit og mga dating apps. Dugay naka- recover ang akong self-esteem nga mitiurok sa pagblock ni GymBod. Siya ang una nakong nakaila gikan sa usa ka dating app; dili man kaayo tig- reply ang uban. Niadtong medyo naka- recover na ang akong confidence, ug mibati na pod ko og kahinangop nga adunay makahimamat ug makaestorya, nagdownload ko og lain nga dating app.
Mi- vibrate ang akong phone; akong i- silent mode akong cellphone pirme kay mauwaw ko basin naay laing tawo nga makasakay nako sa jeep nga familiar sa notification tone. Akong gi- open akong Grindrprofile. Nag- message si LTR69. Naa na diay siya gawas sa Jollibee. Wala ko kabantay nga ganiha ra man diayng nanglabang ang mga tawo nga nagbarog sa Cebuana. Milakaw ko sa unahan paingon sa pultahan sa Jollibee. Naay duha ka lalaking nagbarog tupad sa dakong buyog. Morag familiar ang nawong sa usa. Naa siyay ka- text. Nagtuplok-tuplok pod kunohay ko sa akong cellphone. Mitan-aw ko sa lalaki ug mao poy paglingi niya diri sa akong dapit. Nakalitan ko. Si GymBod man diay ang lalaki nga tapad ni Jollibee. Dili ko masayop tungod kay naa man siyay Chinese character nga tattoo sa iyang liog, parehas kang GymBod. “Hain na ka? Naa na ko gawas sa Jobee,” mensahe ni LTR69. Si LTR69 seguro ning tapad ni GymBod. Wala ko kahibawo unsay dagway ni LTR69. Dili man siya mo- send sa iyang face pic, wala pod ko mi- send sa akoa. Para thrilling? Dili, uy, natagam na ko. Ha-ha-ha. Nakakatawa ko sa akong hunahuna. Namugos man siya nga mag- meet lang lagi kuno mi in person para walay daghang jemma. “Naa na ko diri,” reply nako niya. “Ikaw ni akong tupad?” text ni LTR69. “Ha? Unsay tupad?” pangutana nako niya. “Unsa imong gisul-ob?” sukna niya. “Nag- baseball cap ko,” akong reply.
Ug mitan-aw nako ang lalaki nga morag si GymBod. Miduol siya, ug mi- smile.
“Hi! Ikaw si LTR Anyone?” sulti niya dayong tunol sa iyang kamot.
“Hi! Oo, ako. Ikaw si LTR69?” tubag nako niya, nga iya pod gitubag og tando.
“Francis diay. Ikaw, unsay ngalan nimo, Bay?” sulti ni LTR69, aw, Francis diay. “Louie, Bay,” paila nako. Nagkita ug nagkaila na gyod mi. Apan ang akong utok wala gyod mamuhi sa pangutana kon si GymBod ug sa Francis a.k.a. LTR69 usa ra ba? Midaguok ang akong tiyan. Giagda nako si Francis nga mangaon sa Jollibee total naa na man gyod mi diri. Mitando ra man pod siya.
Dili pa kaayo daghan ang nangaon, tingali tungod kay wala pa mahuman ang misa. Miabay kog lakaw kang Francis, apan paspas ang iyang mga lakang. Misuway na pod kog abay sa iyang lakaw, apan misutoy siya. Sa dihang duol na mi sa counter, mikalit og liko si Francis paingon gawas sa laing pultahan sa Jollibee. Pag-abli niya sa pultahan, nasangit ang iyang mga mata sa among luyo, mora ba og naay mata nga gibagat-bagat. Gisubay nako ang iyang tinan-awan ug didto akong nabantayan ang tinan-awan sa mga nangaon. Misunod na lang pod ko kang Francis.
“Dugay na ka sa Grindr?” pangutana ni Francis samtang nagbarog mi gawas sa USC. “Bag-o pa,” pasabot nako. “Aw, ako sad. Dili pa kaayo dugay. Tinder akong gamit sa una,” tubag niya. “Nag- deactivate ko sa akong Tinder. Mga basa man kasagaran ngadto kon dili straight.” Igo ra kong mitando sa iyang gisulti. “Dili ko ganahan og basa, Bay. Block gyod dayon nako, he-hehe,” ingon ni Francis.
Siya gyod si GymBod. Si GymBod nga lamig lawas, gamayg utok. Sukad adtong gi- block ko niya, dili na ko basta-basta mo- send sa akong face pic. Dapat trade. Unya ako sad giusab akong profile. Kasagaran man god nila dili ganahan og basa nga bayot parehas ni GymBod. Apan guwapo baya gyod si Francis, gym bod gihapon. “’Nya asa na man ta ani?” Ako siyang gipangutana. “Nice meeting you? He-he-he. Kita lang tag balik puhon,” ingon ni Francis.
“Okey,” nako pa. Misakay si Francis og 13C, ug ako, milakaw na pod padu’ng uli.
Sige na mi og text ug chat ni Francis sukad adto. Usahay, magvideo call mi. Buotan ra man diay si Francis. Thoughtful pod siya nga pagka tawo, mo- show gyod siya og care. Naka- date na pod mi more than a couple of times. Sa Sugbo Mercado, sa Stellar, usahay sa Ayala. Medyo kiwaw usahay, kay dapat dili gyod ko magpahalata nga halata ko. For the first time, nakaila ko og tawo nga feel nako compatible nako. Magkuyog mig laag kanang kami ra, usahay kuyog among labing suod nga mga higala— kadtong mga nakahibawo gyod sa akong sitwasyon. Kon wala iyang igsoon sa ilang apartment, adto ko matulog sa ilaha, pero ganahan gyod siya makaadto sad sa akong boarding house. Kay lagi daw, ako rang usa. Dili kuno siya magpangikog sa ubang tawo ba. Pero ako siya pirmeng balibaran, lansesan nako nga gamay kaayo akong kuwarto, kay tinuod man pod. Ha-ha-ha.
“Bay, hain ka?” text ni Francis. Akong gitan-aw ang oras. Alas 9:00 sa gabii. Ang iyang text na- send 7:00 s.g. Naa pay usa ka text. “Padu’ng ko sa imong boarding house.”
Pagkabuntag, daan na man kong nag-ingon niya nga medyo lain akong lawas. Nagsabot man unta mi nga manan-aw og “Infinity Wars.” “Ayaw na lag ari, uy. Maikog lagi ko nimo,” ingon nako niya. Misulod ko kadiyot sa banyo. Paggawas nako, three missed calls. Mitawag siya og balik.
“Hoyy! Naa ko sa gawas sa inyong boarding house. Aria ko, Bay, please,” hangyo niya.
Nanghipos ko og dali-dali sa akong kuwarto. Tanang sanina gitam-ok nako sa daplin, ipon ang pil-onon ug labhonon. Gihawanan ang lamesa. Pag-abli nako sa gate, dako kaayo iyang ngisi. Nagtingsi lang ang nawong.
“Mosta na man ka? Okey na ka?” pangomosta niya. “Nagda ko og fruits.”
“Salamat, Bay,” sulti nako. Sa akong hunahuna, awwwe… ka- sweet sa animal. Gikilig ko. Gipasulod nako siya. Nananghid ko nga mogawas kadiyot kay magpalit ko og tambal. Pagbalik nako, nahapil ang akong mga sanina nga giitsa sa daplin sa akong kuwarto. Nag-estorya mi kadiyot. Dayon nananghid siya nga molakaw na.
Pagkaugma, walay Francis sa akong inbox o call logs o Grindr.
Francis: Saturday Hey 09:17am Hey! 09:20am Hoyyy 06:00pm
Sunday Hi!12:09pm Musta? 03:45pm
Simba ta na! 05:05pm
Tuesday Bay? 03:00am Hey. 10:15am
Wednesday Francis 04:00am Is there something wrong? 04:25am
Thursday Hoyyy! Dili na lagi ka moreply? 01:45am Duha ka semana na ang minglabay, wala gihapon mo- reply si Francis. Padu’ng ko uli gikan nanagkot sa Sto. Rosario. Mingaw ang boarding house kay nanguli sa ilang mga probinsiya ang mga boarder. Ang among landlady, mibakasyon kuyog ang iyang pamilya. Ang caretaker ra ang nahabilin nga kuyog nako ang nagtikawtikaw. Pagsulod nako sa akong kuwarto, akong gipasiga ang suga. Wala pa gyod mabungkag ang akong mga sanina nga maayong pagkapilo ni Francis. Dili pa ko andam nga bungkagon ang pagkahapil. Igo ra nakong gitutokan matag adlaw.
Hangtod karon, tanghaga gihapon kanako ang iyang pagbiya. Walay away, walay pahibawo, walay pananghid. Mibarog ko para mag-ilis. Akong gikuha ang diha sa kinaibabwan nga sanina sa mga pinilo ni Francis. Akong gisul-ob. Mibarog ko atubangan sa samin. Ang ako man diayng napunit kay ang pink nga spaghetti.
(KATAPOSAN)