bag-ong kapunongan sa mga magsusulat sa lapulapu ug cordova
SAMTANG nag- atubang ko sa akong PC kun Personal Computer aron mangitag source alang sa akong lindog sa KANAAS nga mantalaan sa kagamhanan sa Dakbayan sa Bogo ubos sa pagdumala ni Mayor Carlo Jose A. Martinez ug ilabi na sa Bisaya Magasin ( Bismag), sa matag karon ug unya mobisita ko sa akong account sa Facebook kay mopasiklap kon si kinsa sa akong mga friend ang nag- online kay aron lagi mosalingay og pakig- chat, dihay mitunog ug sa akong pagtan- aw si Norberto “Nor” Dungog diay nga magsusulat usab nga taga Babag, Dakbayan sa Lapulapu.
“Komosta, Bay Mar?” maoy iyang inablihan nga mensahe sa akong messenger.
“Uy! Bay Nor, milagro mag online nga tagsa ra man ka mopatim- aw? Hehe.” Maoy akong replay. “Mobalik kog panuwat, Bay.” “Maayo nuon.” “Tagai kos imong numero sa selpon, Bay bi.”
Ug ako siyang gihatagan sa numero sa akong sim card nga sun.
Pagkahuman nakog paniudto mihuni ang akong tangkilepono ug sa akong pagsil- ip numero ra sa nagtawag ang akong nabasa kay dili man rehistrado sa akong ponbok. “Hello,” matod ko sa nagtawag. “Bay Mar, hain man dapita ang inyo sa Basak kay anhaon tika.”
Didto akong nailhan ang nagtawag nga si Nor diay. Akong giingnan nga “sakay lang og traysikol gikan sa merkado ug kanaog sa Basak- Iba anha sa atbang sa gate sa Cebu Light Industrial Park o sa tungod ba sa Stop Over Bakery kay sugaton tika.”
Sa wala pa moabot si Nor sa Basak- Iba, akong gitawgan si Agaw John Tam Ybañez ( JTY) ug akong gidapit sa pag- ari sa balay ni Papa kay moari si Nor. Misanong si JTY ug wala madugay miabot siya kuyog ang iyang apo nga lalaki nga sayis anyos nga siaw kaayong pagka bata— si John Kord nga anak sa ikaduhang liwat
ni JTY ug Mare Remy nga si Jonathan kinsa akong kinugos sa bunyag.
MAO pa gayoy pagkahimamat nilang Nor ug Papa Binog ( Mar Mañus Sr.) niadtong higayona kay unang higayon man sab kadto nga nakaadto si Nor sa balay ni Papa. Dili pareho sa ubang mga magsusulat nga nagsige nag duaw ni Papa sama nilang Fred Monternel, Rey Alegado, Ronie Catadman ug Christopher Fajardo.
Nakita ni Nor ang kahimtang ni Papa nga nag- ilaid sa iyang balatian. Nagsige na lag higda sa katre nga anaa lang namo ipahimutang sa sala kay budlay na kaayo kon adto sa kuwarto sa itaas kay maglisod nag saka- kanaog si Papa. Pero sa iyang kiliran ( sa katre) anaa ang karaang makinilya nga maoy dangpanan ni Papa sa higayon nga mingawon siyang Mama Mayling.
Gitunolan ni Nor si Papa og upat ka buok papel nga kolor ube. “Noy, niay pangkape, o,” ni Nor pa nga milamanong Papa. Apan ang “pangape” ni Papa lahi man. Gitawag niya ang akong pag- umangkong babaye ( iyang apo) nga anak ni Bro. Nelson ug gisugo og T65 ug sopdrink. Kay bisan sa kahimtang ni Papa motubil man gihapon siyag ginagmay labi nag maghimo nag pulongbay.
Human sa komostahay ug siningkiay sa mga baso, miaghat si Nor nga manggawas ming tulo si John Tam aron magkasabot kamig maayo. Di man god mi makakonsentreyt og maayo sa balay kay daghang tawo ug saba sab kaayo ang telebisyon nga niadtong tungora maoy gitan- aw sa mga sakop sa balay ang gikabuangang noon time show sa telebisyon nga magsugod sa alas 12: 00 sa udto ug mahuman sa alas 3: 30 sa hapon.
Didto sa usa ka inilang fast food restaurant, sa among panag- alirong sa gamayng talad samtang nagkalingawg sima- sima sa inorder ni Nor, nagiyahay mig hunahuna kon unsay maayong ingalan sa grupo namong mga magsusulat sa Dakbayan sa Lapulapu. Unya among nasabotan nga iapil na lang namo ang mga magsusulat sa Lungsod sa Cordova.
Kaniadto nakaumol na mi si JTY og kapunongan sa mga magsusulat sa
Opon. Amo kadtong ginganlan og KANILA kun Kaliwat Ni Lapulapu. Unya kay niadtong panahona nahisakop na man kami si JTY sa Bathalad- Cebu ( lakip na si Ronie Catadman), among gipaynal sa KANILA- BATHALAD. Ug kay kami pa mang tulo adtong panahona, ang among kailhanan mao kini: ako KANILA- BATHALAD isip 1; si JTY KANILA-BATHALAD isip 2 ug si Ronie KANILABATHALAD isip 3.
Apan nagkabulag- bulag mi. Milangyaw ko sa Manila kay gikuhang sakop sa kapangulohan sa Bismag niadtong 1993. Si JTY nakasulod sa DYKC Radio ug si Ronie nakaagalon og Hapones ug nabisi sa ilang negosyo.
Pagkahuman pa gayod niadto, sa akong paghibalik sa Opon gikan sa Negros Occidental nga maoy dapit sa akong asawa diin kami nanimuyo sa dihang nagsera ang Liwayway Publishing, Inc. nga tigpatik sa Bismag kaniadto, nakaumol na sab mi si JTY og pundok sa mga magsusulat— ang Kapunongan sa mga Magsusulat sa Opon ( KAMAO). Apan wala matigayon kay wala namo makontak sila si Rey Alegado, Ronie Catadman ug uban pa.
Karon ania, natibuok na usab namo ang KAMALACOR kun Kapunongan sa mga Magsusulat sa Lapulapu ug Cordova. Sa dayon nakong pagsulat niini, ako nang napahibawo si Rey Alegado pinaagi sa messenger sa Facebook ug sa among pagtsatay miuyon siya ug nahinangop nga mahimo siyang membro sa maong pundok sa mga magsusulat. Samtang si Ronie Catadman, sa amo gihapong pagkomyunikeyt sa FB, nalipay usab nga namugna ang maong pundok ug usa siya sa mga membro.
Sa Dakbayan sa Lapulapu ubay- ubay na ang mga magsusulat nga molangkob sa KAMALACOR. Sa Lapulapu: Ako ( Mar Mañus Jr.), Mar Mañus Sr., Henry Mañus, Nelson Mañus, John Tam Ybañez, Ronie Catadman, Rey Alegado, Nor Dungog. Samtang sa Cordova anaa sila si Fred Cañete, Prescil Cañete, Edgardo Sumagang, Samuel Agbo, Gilbert Bayot, Jeffrey Macumao ug Florencio Inoc.
Sa wala pa kini masulat, mipasalig si Prescil Cañete nga iyang panungkoon ang ubang mga magsusulat sa Cordova aron magpasakop sa KAMALACOR kay sa amo sa Dakbayan sa Lapulapu klaro na man ug ang pagpamili na lang sa mga opisyal ang gipangandaman aron mahingpit na ang pagkaumol sa KAMALACOR.
Kon si kinsa kadtong taga Lapulapu ug taga Cordova nga mahiligon sa panulat, bukas ang ganghaan sa KAMALACOR kon buot kamong magpasakop aron makaambit kamo sa mga hunahuna ug mga pagbayloay og ideya sa mga magsusulat sa nahisgotang pundok aron nga makakat- on o madugangan ang inyong kahibalo sa natad sa panulat sa Sinugboanong Pinulongan.—