Noynoy miduso og counter-affidavit sa kaso sa Dengvaxia
SA pagtambong ni kanhi Presidente Benigno Aquino III sa hearing sa kaso sa kontrobersiyal nga Dengvaxia nga gipasaka sa Department of Justice, hugot niyang gipanghimakak ang mga pasangil batok kaniya.
Misumiter si Aquino sa panel of prosecutors og counteraffidavit sa reklamong giluwatan sa Volunteers Against Crime and Corruption ug Vanguard of the Philippine Constitution Inc. nga nalambigit siya sa pagkamatay sa pipila ka batang tinun-an nga nabakunahan sa anti-dengue vaccine nga Dengvaxia.
Gihangyo ni Aquino ang DOJ nga ibalewala ang reklamo tungod kay wala kunoy merito ang mga kasong multiple homicide and physical injuries through negligence, malversation of public funds, ug pagsupak sa Anti-Graft and Corrupt Practices Act ug Government Procurement Reform Act.
Misumiter usab og counter-affidavit sila si kanhi Health Secretary Janette Garin, Budget Secretary Florencio Abad ug uban pang mga akusado.
Nangatarongan si Aquino nga dili siya angayng kasohan og criminal negligence tungod kay walay lig-ong ebidensiya nga magpamatuod nga nangamatay ang mga bata gumikan sa Dengvaxia.
Mipasabot si Aquino nga giaprobahan niya ang antidengue immunization program aron mokubos ang gidaghanon sa mga mangasakit og dengue. Wala kunoy irregular niini ug misinformation lang ang mga report bahin sa pagkamatay sa mga batang nabakunahan sa Dengvaxia.–