Mirror Of Fortune
(ANG INYONG KAPALARAN SA HUNYO 20 – 26, 2018)
PISCES – (Pebrero 20 – Marso 20) – Aduna nay kasulbaran ang kabilinggan sa pamilya. Dali lang masulbad ang problema kon magtinabangay ang managsoon. Angay kang magmatngon sa imong mga lakang. Sangpit kanunay sa Ginoo. Makapatabisay sa laway ang romansa. Biyernes ang suwerte mong adlaw ug 4, 3, 2 ang palaran mong numero.
ARIES – (Marso 21 – Abril 20) – Niining semanaha madugangan ang imong asaynment sa simbahan. Ayaw pagbalibad kay may grasya nga moabot kanimo. Daghang kabataan ang imong matabangan. Makab-ot mo ra ang imong giambisyon. Masabtan mo ang mensahe sa kidhat. Suwerte mong adlaw ang Huybes ug palaran mong numero ang 1, 9, ug 6.
TAURUS – (Abril 21 – Mayo 21) – Motaas ang imong perpormans. Di madugay ma- promote ka sa imong posisyon. Mabaid og maayo ang imong salabotan sa bag-o mong asaynment. Dako ang purohan nga matuman na ang imong gipangandoy. Dugosnon ang romansa. Martes ang suwerte mong adlaw ug 8, 2, 4 ang palaran mong numero.
GEMINI – (Mayo 22 – Hunyo 21) – Niining semanaha hatagan kag malisod nga tahas. Masukod na ang imong abilidad. Mapakita mo ang talagsaong kalantip sa imong salabotan. Motaas pa ang lebel sa imong kadasig. Makahibalag kag binuhat nga mounong sa kalisod. Suwerte mong adlaw ang Miyerkoles ug palaran mong numero ang 6, 7, 3.
CANCER – (Hunyo 22 – Hulyo 22) – Beripikahon mog maayo ang taho nga imong madawat. Di ka angay mopakanaog dayon og desisyon kay basig basolan mo kini sa kaulahian. Moasenso ang tukoron mong negosyo. Daghan ang mahimo mong suki. Mangablit ang tumang kahidlaw. Biyernes ang suwerte mong adlaw ug 3, 2, 4 ang palaran mong numero.
CAPRICORN – (Disyembre 22 – Enero 21) – Mahuman na gayod ang giapura mong trabaho. Daghan ang makadayeg sa talagsaon mong abilidad. Malalangon ang imong imahinasyon. Padayong kawilihan ang imong mga obra. Madungog na ang imong mga pangaliya. Makalikay ka sa tentasyon. Domingo ang suwerte mong adlaw ug 2, 9, 8 ang palaran mong numero.
LEO – (Hulyo 23 – Agosto 23) – Niining semanaha daghan ang makamatikod sa bag-o mong diskarte. Lahing awra sa imong personalidad ang makita sa imong suod nga mga kaila. Regular ka nang mosimba matag Domingo. Maggukod ang paghangos sa pagkab-ot sa himaya. Suwerte mong adlaw ang Sabado ug palaran mong numero ang 7, 1, 9.
VIRGO – (Agosto 24 – Septiyembre 23) – Makatigom kag igong ipuhunan sa ginagmayng negosyo. Dugangi pa ang imong kasibot kay makab-ot ra ang imong gipangandoy sa kinabuhi. Mopatigbabaw ang kahapsay sa pamilya bisan sa mga sungog sa panaghiusa. Matagbawon ang romansa. Huybes ang suwerte mong adlaw ug 8, 6, 4 ang palaran mong numero.
LIBRA – (Septiyembre 24 – Oktubre 23) – Niining semanaha sorpresahon ka sa imong igsoon. Makakuyog ka na sa iyang paglupad. Matuman na gyod ang imong gitinguha. Di ka malimot sa pagpasalamat sa Ginoo sa grasya nga imong nadawat. Mainit ang romansa. Suwerte mong adlaw ang Lunes ug palaran mong numero ang 9, 2, ug 5.
SAGITTARIUS – (Nobiyembre 23 – Disyembre 21) – Niiningsemanahamakadawatkagmakapahimuot nga balita. Dako na ang kausaban sa batasan sa imong minahal. Lahi na ang iyang panlantaw sa umaabot. Mokuyog na siya sa pagsimba. Masumok kag relasyon nga magmahangtoron. Suwerte mong adlaw ang Martes ug palaran mong numero ang 6, 3, 1.
SCORPIO – (Oktubre 24 – Nobiyembre 22) – Mopaundayon ang kahigayonan sa kadasig sa imong pagpaningkamot. Daghan ang mosalig sa imong kamatinud-anon. Madugangan ang imong puhunan. Modaghan pa ang imong bag-ong mga suki. Makigdungan kas pagtungas sa himaya. Miyerkoles ang suwerte mong adlaw ug 4, 2, 8 ang palaran mong numero.
AQUARIUS – (Enero 22 – Pebrero 19) – Niining semanaha adunay motanyag kanimog ekstrang trabaho. Tayming kini kay nanginahanglan kag igong kantidad nga magamit sa imong proyekto. Way makababag sa imong pangandoy. Lahing abentura sa gugma ang imong masinati. Suwerte mong adlaw ang Lunes ug palaran mong numero ang 8, 6, ug 2.