Gisuwayan pagsumpay- sumpay ni Monsour ang mga detalye sa kinabuhi ni Angelo Lopez…

Medyo nakugang si Monsour sa iyang nadungog. Wa na diay utang si Angelo Lopez sa gitrabahoan niining kompaniya isip chief accountant? Kon mao, way katarongan nga maghikog siya? Nagduwa-duwa kining tanan sa hunahuna sa detektib.

“Abi nimo, Mon, duna mi kabilin si Angelo gikan sa namatay namong mga ginikanan. Dakong luna sa kalubihan ug dakong humayan sa probinsiya. Wa ni namo mabahin ni Angelo. Nagkantidad kinig singko milyones. Gihangyo ko ni Angelo nga among ibaligya ang maong kabtangan. Nakasabot ko sa iyang tuyo. Wa ko mobalibad kay gusto kong tabangan ang akong igsoon.” “Mao ba. Dako gyod diay ang nadispalko ni Angelo?” “Tres milyones, Mon. Ang sobra sa kantidad sa halin sa maong kalubihan ug basakan, gihatag ni Angelo nako.” “Pila mo ka magsoon, Div?” “Kami rang duha si Angelo, Mon. Ako ang maguwang.” “Unsay plano nimo karon, Div, nga patay na si Angelo?” “Si Donna ang legal nga asawa ni Angelo. Siya ang may dakong katungod sa nahabiling mga katigayonan ni Angelo. Kining dakong balay, maiya na ni. Ang mga benepisyo nga makuha ni Angelo sa iyang pagtrabaho, si Donna na ang makapahimulos. Aw, di kay siya lang, apil na ang iyang kairing-iring!” “Wa diay anak sila si Angelo ug Donna?” “Wa, Mon. Baog ang akong igsoon.” “Unya si Cassandra, asa na man lang?” “Pakig-estoryahan ko pa siya bahin ana, Mon.” Gihatod ni Divina Lopez Singson sila si Monsour Morales ug Malou Sayson kutob sa gawas sa lagwerta sa dihang nananghid ang duha nga mopauli na. Nagpabilin sila si Donna Lopez ug Dave Ligan sa sulod sa balay. Sa paniid sa detektib, gustong makigsulti si Donna kang Divina apan nasabtan sab niya nga naglikay si Divina sa bayaw. Kinsa man tuoy di masuko? Si Donna man diay ang unang nagluib, di man si Angelo?

Naghilom lang si Monsour samtang nagmaneho sa iyang duha ka tuig na nga Vios. Gisugdan niyag proseso ang mga impormasyon nga iyang nasayran gikan kang Divina Lopez Singson. “Unsay imong tan-aw, Mon?” Nakalingig kadiyot ang detektib kang Malou nga diha sa iyang tupad.

“Komplikado ang maong kaso. Di basta-bastang masulbad. May katarongan si Divina sa iyang pagtuo nga wa maghikog si Angelo Lopez. Wa na kiniy problema sa nadispalko nga milyones sa gitrabahoang kompaniya kay nabayran na man diay kini.” “Unsay plano nimo ron, Mon?” “Ugma, makigkita ko kang SPO1 Homer Calderon sa Homicide. Nagtuo ko nga siya ang nagkupot sa kaso sa pagkamatay ni Angelo Lopez.”

Suod nga higala ni Monsour Morales si SPO1 Homer Calderon kay kadaghan na siya moduol niini kon dunay kaso nga iyang kuptan sama sa kaso ni Angelo Lopez. Gawas pa, klasmeyt ni Monsour sa hayskol ang maong inspektor sa kapolisan.

Kalit nga gigabling ni Monsour ang manobela sa iyang sakyanan dihang usa ka pick-up nga Estrada ang mi- overtake kanila ug gipamusil sila si Malou.

(PADAYONON)