Daghan siyag pangandoy. Apan niining gabhiona…
ang mga aping.” Nagpadayon lang gihapon si Sofia sa pagrebond sa iyang kostumer nga nagpakli-pakli sa mga panid sa mantalaan.
“Pasensiya na, Bayot, ha,” dungag sa kostumer nga may tono sa kaulaw.
“Hay, si Mader. Kini akong nawong? Gisagpa ra nig walo ka tutoy sa yawa maong napiyahok ni.”
Mikatawa ang kustomer sa pasiaw sa bayot. “Walo gyod ka tutoy?”
“Of course, Mader. Kulong man diay kaayo ni imong buhok, sa? Magabhian ta ani, ha.”
“Lisod man gyod tul-iron ning akong buhok. Taymsa, aydol kaayo nako ning atoang presidente. Tulo ka buwan, iyang hapsayon tanan! Ah, isog kaayo, uy! Ingon ana gyod nang mga Bisdak.”
“Kaya kaha na nga daghan man kaayong mga tawo ron nga mogamit og droga,” ni Sofia nga naglisod og tul-id sa kulong nga buhok sa kustomer. Maypa mahalon lang nga medisina iyang gigamit sa buhok!
“Kaya, uy. Awa ang Davao, malinawon kaayo. Tulo ka buwan, mapapas nis mapa sa Pilipinas ang mga adik. Tokhangon, uy. Ingon sila nga kining mga mopatay magmotor daw.”
“Sa ako lang, ha,” mitingog og kalit ang bana sa kustomer. “Patyon gyod nang mga adik, pusher, ug drug lords. Di na madalag rehab. Akong igsoon gani gi- rehab wala may epek. Ug, Day Perla,” dayon tan-aw sa iyang asawa, “kining mga tawhana nga magmotor, mao kiniy molimpiyo sa katilingban.” “I- rehab diay og balik, Noy?” ni Sofia. “Ug mogasto na sad og laing diyes mil? Baynte mil?” Nagpadayon si Sofia sa pagtul-id sa buhok sa iyang kustomer. Puypoy na ang iyang duha ka bukton ug sa hilom nangandoy siyang matuboan og laing duha pa ka bukton, daw Shiva sa Mortal Kombat nga pirme niyang duwaan adtong bata pa siya. Dili lang laing mga bukton ang pangandoy ni Sofia, apil na sab ang pag-adto sa Thailand, kuyog sa iyang kailang parlorista sad nga si Beverly, aron magpa- sex change kay gikapoy na silag paburot sa mga kondom aron isuksok ilawom sa baby bra aron mapormang tutoy nga adunay atngal. Pangandoy sab niya nga moapil og Miss Gay Kalawakan sa Kamagayan apan kahibawo siyang maglisod siyag tubag sa Q & A. Pangandoy… Kini mausab kuyog sa paglabay sa panahon, sa iyang hunahuna. Karon, si Sofia nangandoy alang sa iyang inahan.
Alas nuybe na sa gabii nga nahuman ang pag- rebond sa buhok. “Mader, salamat kaayo. Balik-balik lang unya.” Milingkod gilayon si Sofia sa gamayng sopa ug gidagkotan ang sigarilyo.
“Gitokhang si Noy Ramir, sa?” sa babaye sa gawas nga nagbarog dili layo sa iyang salon. “Ay, katong mamaligya og butong ba duol sa flyover.” “Kakuyaw god. Mosuyop sad diay to siya?” “Mao bitawng midaot lang siyag kalit.” “Mirisi. Maayo nuon nga pamatyon na sila.” “Kada Sabados gabii naa may mamatay kada sityo, uy. May gani diris Jupiter wala.”
“Puyra buyag. Mga buotan man god ang mga tawo diri. Sabado man diay ron.” MINGAW na ang gawas sa salon dihang miabot ang usa ka lalaki nga may dala nga itom nga bag.
“Dugay lagi ka miabot, Langging,” ni Sofia, dayong halok sa aping sa batan-ong lalaki. “Nagtiwas mos inyong pradyek?”
“Naay seminar mahitungod sa HIV ug mga sira. Ha-ha. Kahinumdom nuon ko, da! Kadto ganing nagpapalit ko nimog tambal sa sira kay gikuan kos bayot buang luyos bapols sa diskohan.”
“Na-Aristotle diay ka. Hugaw man gyod to siya.” Mibarog si Sofia ug milakaw padu’ng sa gamayng kabinet. “Bagohay lang ko nahuman og rebond adtong kulong nga buhok ni Mader. Giatay buhoka. Ay, uli og sayo human nimog hatag nilang Andres ug Pitpit.”
“Aw, mouli ko dayon, Babes, uy.” Miduol ang lalaki ug gikuha ang posporo. “Pila ka gramo?”
“Ambot,” ni Sofia ug dayon gikuot niya ang kinatawo sa lalaki ug gihapuhap kini. “Uli dayon, ha.” “Ugh… shit. Dalia ra nako maganahan, uy.” “Buang!” “Lagi, lagi.” “Ayaw kalimot sa kuwarta. Gamiton nako na para kang Nanay.”
“O, lagi.” Ug dali-daling migawas ang lalaki sa salon. “Balikan tika.” Ug pilyo kining mikatawa. “NAY, mata pa lagi ka?” niya sa selpon. “Di ba tingkatu’g na man ron nimong orasa… Lagi. O. Mouli na man god ko. Sus, nangita kog kuwarta, uy! Ay, di man motuo… Unsa? May nangita nako nga mga lalaki? Si George tingali… Sure kaha ka nga… Lagi. Kinsa kaha. O, mouli na ko. Mag-amping lagi ko, uy. Sigeg balik? Katu’g na. Sige… Sige… Love you.”
Tataw ang tingog sa pag-abot sa duha ka motor nga mihunong sa gawas sa iyang salon. Gilili ni Sofia kon kinsa ang nangabot. Tulo ka lalaki nga nagsul-ob og itom nga helmet.
Dali-daling gikontak ni Sofia ang numero sa iyang Nanay. Mi- ring. Apan way mitubag. Mi- ring. Ug may mituktok sa pultahan. Mi- ring. Ug may mibuto. May mibuto sa Sityo Jupiter sa unang higayon: pangandoy. (KATAPOSAN)