Metapora Musimos

ANG bag-ong librobalak ni Magbabalak-Ambasador Vicente Vivencio Bandillo ilusad sa Dakbayan sa Sugbo karong Agosto 31. Laing gasa alang sa Sugboanong pamalak ug sa literatura sa kinatibuk-an.

Giulohan og Ang Musimos Mismo ang iyang ikaduhang koleksiyon sa mga balak sa tuig 2018. Gipatik kini uban sa abag sa BATHALAD-Sugbo, grupo sa mga mamugnaong magsusulat diin nahimo pong pangulo si Bandillo sa wala pa siya masulod sa Philippine diplomatic service sa Dekada 90.

Sa sayong bahin ning tuiga gilusad ang Damgo Ug Alimungaw sa Jose T. Joya Art Gallery sa University of the Philippines Cebu.

Ang paglusad sa Ang Musimos Mismo ipahigayon sa Books and Brews Café sa Mango Ave., Dakbayan sa Sugbo. Magsugod ang kalihokan alas siyete sa gabii. Walay bayad ang pagtambong sa kalihokan. Gihulagway ni Bandillo, nga ilado sa angga nga Butch sa iyang mga higala ug pamilya, ang iyang bag-ong librobalak isip guwatsinanggong kaluha sa Damgo Ug Alimungaw.

Ang hapin sa Ang Musimos Mismo minugna ni Josua Cabrera, usa ka visual artist, magbabalak ug piksiyonista.

Si Cabrera, nga nakadawat og mga pasidungog sa iyang editorial cartoons sa SunStar Cebu ug nakasignit og Palanca sa iyang mubong sugilanon, mao poy nagmugna sa obra nga nahimong hapin sa Damgo Ug Alimungaw.

Ang Musimos Mismo maoy ikaupat nga librobalak nga napatik sa lumad nga dila sa magbabalak kinsa maoy ambasador sa Pilipinas sa Bangladesh, ug usab sa Sri Lanka ug Maldives ( concurrent jurisdictions).

Ang Sanglitanan sa Kalipay ug Kasakit (2003) ug Tsinelas nga Nalubong sa Danaw (2009) mao ang unang duha ka librobalak ni Bandillo.

Ang Earth Alive, Moon Eternal (2001) mao ang labing unang librobalak ni Bandillo. Nahisulat kini sa Iningles nga pinulongan.

Sa tuig 2017, gilusad ni Bandillo ang The Book of Departures— ang iyang libro sa piniling mga balak nga gipanghubad ngadto sa Iningles ug Bengali.

Si Bandillo nahimo pong editor o co-editor sa mga antolohiya sa mga balak ug sugilanon.—