pagpalagpot kang alvarez talagsaong yugto sa atong kasaysayan

“The world has many stairs; there are those who go up and those who go down”-- Sicilian proverb

SA ato, ang panultihon sa mga bugoy nga katumbas sa anaa sa itaas: “Ang kinabuhi weder-weder lang.” Usahay anaa ka sa ibabaw, usahay anaa ka sa ilawom. Ug kon anaa ka na sa itaas wala kay laing padulngan kondili paingon sa ubos.

Mao kini ang nahitabo sa Kamara de Representantes sa miaging Hulyo 23 atol sa ikatulong State of the Nation Address (SONA) ni Presidente Duterte.

Walay usa nga nagdahom, lakip na si Presidente Duterte, nga mahitabo kining usa ka talagsaong yugto sa atong kasaysayan. Si Espiker Pantaleon Alvarez gikalitan sa nahitabo. Kauban pa niya si Senate President Vicente Sotto III nga mingsugat kang Presidente Duterte sa pag-abot niini sa Batasang Pambansa.

Naandam na ang tanan. Nakalingkod na ang opisyales sa Kongreso sa tagsa-tagsa nila ka lingkoranan ingon man ang mga bisita nga naglakip sa mga embahador sa ubang nasod.

Gipakaingon ni G. Duterte og sugdan dayon niya ang iyang diskurso sahi sa naandan. Gisip-on siya ug lain ang paminaw niya sa iyang lawas. Minglabay ang pila ka minuto, tunga sa oras, unya usa ka oras apan wala gihapon siya dad-a ngadto sa sulod sa Kamara aron sugdan ang SONA. Sa kuha sa telebisyon, nakita siya nga nanampiling ingon sa napikal. Nganong nadugay man ang paghatod kaniya ngadto sa Kamara? Unsay hinungdan sa pagkalangay?

Diay, samtang si Duterte uban kang Sotto ug Alvarez didto sa holding room sa Batasang Pambansa, may dakong drama nga nahitabo sa session hall sa Kamara. Giilisdan na diay si Alvarez isip espiker ni kanhi Presidente Gloria Macapagal-Arroyo. Nakakuha siya og 184 botos nga dakong labaw sa katunga sa mga membro sa Kamara. Sa entablado nanumpa si Gng. Arroyo sa atubangan ni Kongresman Dennis Laogan sa partido Ang Kabuhayan, ang labing batan-on sa mga diputado.

Entonses, duha nay espiker. Nan, kinsa man karon ang angay molingkod sa tuo ni Presidente sa entablado: si Alvarez ba o si Gng. Arroyo?

Aron masulbad ang dakong gumonhap, napugos si Duterte pagpataliwala. Gipatawag niya, tagsa-tagsa, sila si Alvarez ug Arroyo. Misugot si Arroyo nga si Alvarez na lang ang mosaka sa entablado ug ang mingsunod nga mga yugto tipik na sa atong kasaysayan. Nganong napalagpot si Alvarez? Bisan kon ingon sa nakalitan siya sa nanghitabo, taudtaod nang may mga kiyaw-kiyaw sa Kamara bahin sa pagpadagan ni Alvarez sa Kamara ug sa iyang pagtratar sa kauban niyang mga kongresista. May nag-ingon nga may pagka diktador si Alvarez; kon unsay iyang gusto angay mosunod kaniya ang ubang kongresista. Kay siya man ang lider sa PDP-Laban sa Kamara,

ang partido sa presidente, ang gipalutaw ni Alvarez mao nga ang tanan niyang desisyon may panalangin sa Malakanyang.

Dihang gipahayag ni Duterte nga gusto niyang banhawon ang death penalty kun silot nga kamatayon, giawhag ni Alvarez ang mga diputado nga sundon ang tuyo sa presidente. Ang nagdumili pagsunod kaniya, iyang gitangtangan sa puwesto, lakip na si Arroyo nga napalagpot isip luyo-luyong espiker. Si Arroyo supak sa death penalty.

Kaniadtong Disyembre, 24 ka magbabalaod ang gipamawian sa ilang presupuwesto alang sa ilang mga proyekto tungod sa wala nila pagsunod sa gusto sa administrasyon.

Daghan usab og nakaaway si Alvarez. Human niya atakeha sa hawanan sa Kamara, gisang-atan niya og kasong grap ang kanhi suod niyang higala, si Davao del Norte Kongresman Antonio Floirendo, Jr., nga maoy labing dakog natabang nga pundo alang sa kampanya ni Duterte.

Apan ang labing dakong hinungdan ngano nga nawad-an og respeto ang mga magbabalaod kang Alvarez mao ang iyang plano nga iuswag o kanselahon ang eleksiyon sa sunod tuig. Kini pabor unta sa mga kongresista kay kadugangan man ang ilang mga termino. Apan kadaghanan sa mga membro sa Kamara may mga delikadesa, nga tingali wala kang Alvarez, ug maoy ilang gihunahuna ang reaksiyon sa mga lungsoranon nga dakong supak sa pagkanselar sa eleksiyon. Dinhi ingon sa naupos na ang pailob sa mga kongresista ug nakadesidir nga angay nang tangtangon si Alvarez. May papel si Mayor Sara? May mga huhungihong nga gitawgan kuno ni Mayor Sara Duterte-Carpio ang mga membro sa Kamara aron pag-awhag nga ilisan si Alvarez ni Gng. Arroyo. Kini dakong insulto sa mga magbabalaod kay nagpasabot kini nga wala silay kaugalingong prinsipyo o baroganan, nga nagpagawong sila sa anak sa presidente.

Apan ang away nila ni Alvarez ug Inday Sara malagmit nga nakatampo sa pagkawala sa kompiyansa kaniya sa iyang mga kauban sa Kamara.

Ang away nila ni Alvarez ug Mayor Sara nga, sama sa iyang amahan isog usab ug walay lipod-lipod manulti, nagsugod sa pagtukod sa naulahi sa Hugpong ng Pagbabago, usa ka lokal nga partido politikal. Mipahamtang si Alvarez nga ang partido ni Inday Sara kabahin sa oposisyon. Mihulga usab siya nga mahimo niyang ipa- impeach o palagpoton si Presidente Duterte nga maoy nakapasanting sa dunggan sa babayeng alkalde.

“Nagtuo ka nga kay babaye ko dili ko mosukol nimo?” matod pa ni Mayor Sara ginamit ang social media. “Nasayop ka sa pagpanghilabot sa usa ka babaye sama nako,” dugang niya.

Ang partido ni Mayor Duterte narehistro na sa Commission on Elections ug giingong moapil sa eleksiyon sa sunod tuig. Ang kaugmaon sa Kamara Sa rebelyon sa Kamara, walay laing gitugpo aron ipuli kang Alvarez kondili si Gng. Arroyo. Usa ka natural nga lider, si Gng. Arroyo napresidente sulod sa mokabat sa 10 ka tuig. Sa pito sa 10 ka tuig, kining tagsulat nag-alagad isip chief editor sa Office of the Press Secretary (OPS) nga karon Presidential Communication Operations Office o PCOO. Gumikan niini, nasinati ko ang kalidad sa pagka lider ni Gng. Arroyo: kugihan, maalam, mahigalaon ug mainantoson.

Paglingkod ni kanhi Presidente Aquino, ang una niyang gibuhat mao ang pagpasaka og nagtipun-og nga mga kasong grap batok kang Gng. Arroyo. Gipakarsel siya ug tungod kay kanhi presidente gibutang siya sa hospital arrest sulod sa mokabat sa lima ka tuig. Apan ang tanang kaso batok kaniya gidismis sa Korte Suprema.

Karon nakabalik na siya sa poder isip labing unang babaye nga espiker ug ikaupat nga labing gamhanang opisyal sa atong nasod.

Kataposang termino na ni Espiker Arroyo sa pagka kongresista, busa dili na siya mahimong modagan pag-usab sa sunod eleksiyon ug dili na siya magpabilin nga espiker. Kon unsay nagpaabot kaniya, kon asa siya dad-a sa kapalaran, kini mag-agad lamang sa Diyos.—

Diay, samtang si Duterte uban kang Sotto ug Alvarez didto sa holding room sa Batasang Pambansa, may dakong drama nga nahitabo sa session hall sa Kamara.