LATIGO PARAS MGA POLIS
Medyo pintas kaayo ang mga pulong sa presidente, apan kini naghulagway lamang unsa kaseryoso ang atong gobyerno karon sa paglimpiyo sa talay sa kapolisan sa bugok ug korap nga mga membro niini.
ANG pagtudlo kang Oscar Albayalde isip hepe sa Philippine National Police maoy senyales nga seryoso si Presidente Duterte dili lamang sa pagsumpo sa krimen kondili sa paglimpiyo sa hugaw kaayong organisasyon sa kapolisan sa nasod. Nadunggan nako ang pakigpulong sa presidente diin iyang gipasabot ngano nga si Albayalde man ang iyang gipili nga mas daghan pa man siyag suod nga mga kalipikado nga mga opisyal sa polis nga mahimo niyang saligan sa maong labing taas nga puwesto. Daghan gani kunong ming-abot kaniyang hangyo nga dili maayo nga si Albayalde mahimong Chief sa PNP, sobra kaestrikto, manipa gani dayon kuno og masipyat ang polis. Matod sa presidente nga ang maong kinaiya ni Albayalde maoy hinungdan ngano nga kini ang iyang gipili nga mamuno sa nasodnong kapolisan.
Tuod man, wala madugay human makalingkod sa puwesto, hilabihan na kadaghan sa mga polis ang gipangpapha, gipangsuspenso ug gipangkasohan ni Albayalde. Sukwahi sa kanhi nga style ni PNP Chief Ronald dela Rosa nga harabharabon lang og yawyaw ang iyang mga sakop apan walay klarong silot nga gipahamtang, karon sa panahon ni Albayalde nangabulabog dili lamang ang mga scalawag ug bisan gani ang mga pulpol ug hingatulgon nga mga polis.
Usa nako ka higalang polis miingon nga nalipay man tuod sila nga nadoble ang ilang suweldo apan halos kanapulo kuno pil-on ang kabug-at sa ilang trabaho ingon man ang kahadlok nga masayop sa ilang panerbisyo sukwahi kanhi nga parelaks-relaks lang ug hayahay kay lagi polis. Apan miuyon siya nga angay lang sila nga ing-anaon tungod sa kadako sa gahom ug kaakohan nga ilang gigunitan ibabaw sa katungod sa mga sibilyan.
Sa iyang pakigpulong niadtong pagdawat niya sa iyang trabaho, mipasalig si Albayalde nga ipadayon ang gubat batok krimen ug droga ug maningkamot siyang mas mahimo pang epektibo ang mga polis sa ilang trabaho. Ug karon pa lang iya na kining gihimong tinuod dili lamang diha sa padayong paglihok sa kapolisan kondili diha sa pagsilsil sa kaligdong ug katarong ngadto sa hunahuna ug kasingkasing sa kapolisan sa nasod.
Gipatas-an na ang suweldo sa mga polis, gihatag na kanila ang igong mga kahimanan ug armas aron madasig sila sa tininuod nga trabaho, apan dili gyod kadto igo aron maputol ang mga tinonto ug korapsiyon nga nakagamot na og maayo sa kultura sa kapolisan. Gani, giangkon na sa PNP nga liboan diay gihapon sa mga polis ang nahilambigit sa ilegal nga mga buhat ug korapsiyon, sa palusot sa ilegal nga droga ug ingon man sa gun for hire activities diin gigamit ang ilang pusil diha sa pagpamatay og mga sibilyan para makakuwarta lang. Hilabihan ang kasuko niini sa presidente ug niadtong miaging semana lang mibahad siya sa maong mga polis nga dili siya magpanuko pagpapatay kanila kon dili sila moundang sa mao nilang kabuang. Matod sa
presidente, wala gyoy mahitabo sa nasod kon dili niya pangihawon ning mga eskalawag nga polis nga maoy naghugawhugaw sa imahe sa PNP.
Medyo pintas kaayo ang mga pulong sa presidente, apan kini naghulagway lamang unsa kaseryoso ang atong gobyerno karon sa paglimpiyo sa talay sa kapolisan sa bugok ug korap nga mga membro niini. Ug naa, nangasakpan ug nangabulabog ang mga polis nga nalambigit sa kidnap for ransom, sa palusot sa droga, bisan gani tong nangilkil sa gagmayng mga negosyo wala palabya ug gipangtaral ug gipangsilotan.
Revitalized PNP Internal Cleansing Strategy. Mao kini ang ngalan sa programa karon sa pagdisiplina sa mga polis nga gilusad sa pagdumala ni Albayalde. Ang sad-an kinahanglang silotan sa tukma nga silot. Kon sa kanhiay nga style diin igo lang nga i- relieve ug ibalhin og laing dapit ug puwesto ang nakasala nga polis, lahi na karon, matod pa ni Albayalde. Atubangon gyod sa polis ang sumbong batok kaniya ug kon mapamatud-an papahawaon ug suspensohon gyod siya sa puwesto. Gimontar usab ang epektibong sistema sa counterintelligence diin panup-an ang mga kalihokan sa masigkapolis aron matan-aw kanunay kon wala ba siya moraket sa mga tinonto ug ilegal nga buhat.
“The internal cleansing will be chilling and deadly,” matod pa ni Albayalde sa pintok ug seryoso kaayo nga tono.
Dako kini nga hagit ug buluhaton. Apan karon pa lang klaro na nga sa suporta ni Presidente Duterte, naa sa eksaktong dalan si Albayalde. Ang balaod nagmontar na og igo nga sistema aron mapanubag ang buluyagong mga polis sa ilang mga atraso ug tinonto sa trabaho. Ang gobyerno karon nagdasig na sa publiko pagbarog aron mapapahawa kining mga elemento nga maoy nakapahugaw sa kapolisan. Maong kon positibo ug kusog lang ang suporta niini sa publiko ug mga sibilyan, wala gayoy katarongan nga dili nato mapaangat ang katarong ug maayong imahe sa atong kapolisan aron mas lig-onon ug kusganon pang sumpoon ang nagkadaghan ug nagkadakong hagit sa mga krimen sa atong nasod.—