Mata Sa Hustisya
Monsour, may mapupho kahang mahinungdanong kasayoran ang detektib?
(Gula 14)
SAMTANG nagmaneho si Monsour Morales sa iyang Vios, si Donna Lopez ang iyang gihunahuna. Unsa kahay tinuod nga motibo niini nga gusto man kining makigsulti niya nga sila rang duha? Igo na ba siyang motuo sa giingon niini nga seloso si Dave Ligan maong sila rang duha ang angay nga magkita?
O gusto lang molingkawas si Donna isip usa sa mga suspek pinaagi sa pagpakigsuod kaniya?
Apan sa hunahuna sa detektib, kon nagplano si Donna nga laangon siya, anad na siya niini ug seguradong ang babaye ang masulod sa iyang laang kon aduna gyod kini kalabotan sa pagkamatay ni Angelo Lopez.
Mipahuway og kadiyot si Monsour pag-abot niya sa gipuyang apartment. Miinom siyag usa ka botelyang gamay nga beer nga gipundo na niya sa refrigerator. Sa wala pa siya molahos sa pagpauli sa apartment, mikaon una siya sa suki niyang karenderiya sa Pelaez. Maoy ilang sabot ni Donna nga dinner time sila magkita sa usa ka restawran sa uptown.
Nahunahuna ni Monsour si Malou. Ugma pa kini moduaw sa apartment. May igo pang panahon alang sa paghatag niyag panahon kang Donna. Kon unsa man ang impormasyon nga gustong itug-an niini kaniya, tinuod man kini o bakak, masayran ra gihapon niya kini agad sa iyang pagtimbang-timbang sa sitwasyon.
Sa kadugay na niya sa iyang trabaho nga ang kadaghanan sa mga suspek iyang gipakigsultihan, nakahibawo na siya sa reaksiyon pa lang niini, kon nagtug-an ba kini sa tinuod o namakak kaniya. Apan interesado gyod siya sa giingon sa babaye nga duna kini gustong itug-an kaniya. Who knows nga makatabang gyod tuod kini sa gikuptan niyang kaso sa kamatayon ni Angelo Lopez.
Nakatagpilaw ang detektib. Alas siyete sa gabii siyang nakamata. Naligo siya. Alas otso ang ilang sabot ni Donna. Duna pay igong panahon. Dili ra layo gikan sa iyang gipuy-an ang restawran sa uptown nga ilang gikasabotan ni Donna.
Human makakaligo ug makailis, naandan na ni Monsour ang pagspray og pahumot sa iyang lawas ug sa gisul-ob niyang jacket.
Igo-igo lang ang gikusgon sa pagpadagan niya sa kotse. Wa pa si Donna sa restawran sa iyang pag-abot. Didto sa medyo ngungitngit nga bahin sa parking area sa atubangan sa restawran niya iparada ang iyang Vios. Miorder una siyag usa ka gamay nga botelya nga serbesa. Samtang nagtungab-tungab siya sa beer, matag karon ug unya motan-aw siya sa nangabot nga mga sakyanan.
Gitan-aw niya ang iyang relo de pulso, menos singko para alas otso. Unya adunay nahiabot nga Navara, giparada ang maong sakyanan luyo sa iyang Vios. Sa tan-aw sa detektib, bag-o pa lang ang Navara. Mikanaog ang usa ka babaye, nag- miniskirt ug nagblusa nga mi- fit sa lawas niini. Mihulma ang kanindot sa lawas sa babaye.
Si Donna Lopez ang maong babaye. Nakapanglingo si Monsour. Sa makausa pa, nakadayeg siya sa katahom sa babaye. Suwerte si Dave Ligan nga napunta kaniya si Donna, hilom nga nakaingon ang detektib. “Hi! Ganina ka ra, Mon?” Midiretsog lingkod si Donna atbang sa detektib. Mapahiyomon siya ug nangalisbo ang kahumot gikan sa iyang lawas.
“Di pa lang dugay, Don.” Milingi-lingi si Monsour. Nahikatawa si Donna nga mikupot sa usa ka kamot sa detektib nga gipatong sa ibabaw sa lamesa.
“Ako rang usa, Mon. Wa koy kauban. Tua sa balay si Dave. Akong giingnan nga duna koy importanteng tambongan nga miting sa among negosyo.” “Maayo kay wa mokuyog? Seloso man kaha siya?” Mitungab si Monsour sa serbesa. Gihurot niya pag-inom ang diha sa sulod sa botelya.
“Di siya mamugos kon di nako pakuyogon. Mahadlok siyang mosupak sa akong gusto, nahadlok nga akong biyaan.”
Mikatawa si Donna. Nahikatawa na lang sab si Monsour. Gitan-aw sa detektib ang kamot sa babaye nga nagkupot gihapon sa iyang kamot. Mipakibo lang sa mga abaga si Donna dayong kuha sa iyang kamot. Gitawag sa babaye ang usa ka waiter. “Akoy nag-imbitar nimo, Mon. So, ako ning gasto.” Nakahuman nag order si Donna sa pagkaon ug imnonon alang kanila ni Monsour. Gusto sa detektib nga masayod na siya sa gustong itug-an ni Donna kaniya. Dili siya gusto nga magdugay pa ang ilang panag-uban ni Donna. Nasayod siya sa iyang limitasyon kon babaye na ang hisgotan labi nag matahom sama kang Donna. Abtik siya, isog ug igmat bahin sa iyang trabaho. Apan huyang siya sa madanihong mga babaye.
Hinuon, usa ra ang iyang gugma, ug kini alang lang kang Malou.
Nahiabot ang mga pagkaon ug ilimnon nga gipahimutang dayon sa waiter sa ibabaw sa lamesa. Samtang nagkaon sila si Monsour ug Donna, namatikdan sa detektib nga kanunay nagpasiplat ang babaye kaniya. Kanunayng mapahiyomon.
“You know, Mon, katulo na ko i- date ni Jeffrey Sandoval dinhi.”
Nakalitan ang detektib. Mora siyag natuk-an. Nakahunong siya pagkaon. Miinom siya sa tubig sa iyang baso. Nahikatawa lang si Donna.
“Nagkaila mi si Jefrrey dihang nagkabuwag na mi si Angelo. Nag-inusara kong nagkaon dinhi dihang giduol ko niya. Mao to nga nagkailhanay mi. Nangulitawo siya nako sa misunod namong panagkita. Gihaylo ko niya og luhong pagpuyo. Pero wa ko magpadala kay duna na man mi relasyon si Dave. Nakahibawo sab ko nga daghan og babaye si Jeffrey. Nahadlok sab ko niya kay isog siyang manulti.”
Naghunahuna si Monsour. Kon si Jeffrey ang nagpatay o nagpapatay kang Angelo aron mapanag-iya niini si Donna, di kini mahitabo kay nagbuwag na man sila si Donna ug Angelo dihang gipangulitawhan ni Jeffrey ang babaye? “Gisultihan sab ko ni Jeffrey nga gibaharan siya ni Angelo.” “Gibaharan?” Ning puntoha, nadasig na si Monsour sa pagpadayon sa pagkigsulti kang Donna. “Oo, Mon.” “Nagsulti ba si Jeffrey nimo, Don, kon unsay hinungdan?” “Wa, Mon.” Miinom si Monsour sa tubig sa iyang baso. Giganoy ang iyang hunahuna sa lawom nga paghanduraw.
(PADAYONON)