SKYTRAIN: LABING MODERNO TANDI SA MRT
“Ang oras-oras na mababagal na biyahe, halimbawa ay mula sa Fort Bonifacio patungong Guadalupe station, tatakbuhin lamang ito ng skytrain sa loob ng lima hanggang anim na minuto.”— InfraCorp
ATOL sa pagpahayag sa kadagkoan sa DoT kalabot sa pagwagtang sa naandan na natong mga dyip de pasahero, mao poy ilang pagpagulag dugang pang plano aron mas maangkon ang modernisasyon sa natad sa transportasyon.
Kahinumdoman nga niadtong giplano pa lang nga wad-on na ang mga pasaheroang dyip, ang gipaneguro sa Department of Transportation mao nga mahimutang sa kasegurohan ang labaw kun kulang 87 porsento kanato nga walay kaugalingong mga sakyanan ug nagsalig ra isip mga commuter. Matod pa niadto ni DoT Secretary Arthur Tugade, “The PUV Modernization Program is not antipoor. We are just protecting the safety of our commuting public.”
Kon unsa may buot ipasabot ni Tugade sa giingong pagprotehir kanatong mga commuter aron mahimutang sa kasegurohan, buot bang ipasabot nga peligroso na ang mga dyip de pasahero nga maoy atong naandang sakyan?
Kahinumdoman nga sa mga serye sa protesta ug transport strikes sa mga transport group, sa pagpanguna
sa PISTON, ilang nakita nga mokapin sa 200,000 ka dyipney sa tibuok nasod ang mamahimong apektado ning proyekto nga public utility modernization. Mao tingali nga nakaingon si Kalihim Tugade nga dili anti-poor ang maong proyekto isip tubag sa walag tuo nga protesta sa mga drayber ug mga opereytor sa nangaraan nang mga pasaheroang dyip.
Ang PUV modernization program usa lamang sa inisyatibo nga gitumbok sa Department of Transportation. Igamodernisa kun pagabag-ohon ang mga sakyanang pasaheroan sa Pilipinas, lahi tandi sa naandan nang ‘bayhon’ sa jeepneys nga atong nailhan ug naandang sakyan sulod sa kapin 15 ka tuig.
Mamatikdan nga sa Manila hinay-hinay nang nanggula ang bag-ong mga matang sa pasaheroang dyip isip kabahin sa paghulip sa giingong inanayng pag- phase-out sa kanhi jeepneys nga maoy atong naandan. Sa pikas bayhon sa naasoyng PUV modernization, nahiapil sa mga alternatibo sa DoT kadtong unang gipagula nga kaping usa ka libo ka sakyanan nga ilang gitawag og solarized, mga pasaheroang jeep nga wala na magsalig sa gasolina kondili sa paaging solar na lang. Wala pay labot niana ang pagbutho sa pipila ka pangpublikong bus nga matawag usab nga kabahin sa modernization program, naa na man ganiy pipila nga hinay-hinay nang nagbiyahean kun namasahero sa EDSA.
Sa pag-aginod sa tanang plano sa DoT nga sa pipila ka tuig ma- phase-out na gayod tanang dyip de pasahero nga matawag nga nangaraan nang modelo (sama nianang naandan natong makita sa Metro Manila ug dagkong kasiyudaran sama sa Cebu, Davao, Cagayan de Oro, Dumaguete, Bacolod, Iloilo, General Santos City ug uban pang mga lugar), gikataho nga samtang sayo pa may higanteng mga kompaniya na nga tig- manufacture og mga sakyanan ang interesadong makig- bidding sa Department of Transportation ug sila mingsaad nga makatubag gayod ang ilang serbisyo sa gihandom nga modernisasyon sa transportasyon sa Pilipinas.
LABING BAG-ONG GIPLANONG PROYEKTO SA MODERNISASYON Tungod lagi sa labihang traffic, kining skytrain maoy usa sa mga gitutokang maayong proyekto aron masolusyonan ang pagkalangan sa liboan ka mga biyahe matag adlaw sa mga commuter ilabi na sa Metro Manila. Skytrain maoy nahunahunaan sa InfraCorp Development, usa ka kompaniya nga gimugna sa higanteng Alliance Global Group, Inc., ug kini nga project proposal napadangat na sa InfraCorp sa Department of Transportation.
Partikular sa transport solutions, nag-una nang daan ang panlantaw ug pangagpas sa InfraCorp nga sa haduol nga panahon mahiabot usab kining proyektoha sa kaprobinsiyahan ning nasod. Dako gayod kinig ikatabang sa commuting public, nagkanayon ang InfraCorp. Kapahimuslan gayog maayo sa mga commuter nga halos sa matag adlaw kanunay malangan sa ilang biyahe tungod sa labihan kahagip-ot nga trapiko.
Ang skytrain maoy gitawag og automated-propelled monorail. Mas moderno kini, ug layo ra ang MRT tungod kay ang kasagarang biyahe nga daganon og 60 minutos o inoras sa MRT kuhaon lag 5-6 ka minuto niining sytrain. Ning matanga sa propelled monorail, matod pa sa InfraCorp, klaro kaayong mabuhinan ang naandang travel time sa mga office worker ug ordinaryong manakayay bisan pa kadtong mga biyaheng mokaog duha-tulo-upat ka oras tungod kay gilangay pag-ayo sa sobrang traffic sa Metro Manila.
Pila ba ka oras ang biyahe gikan sa Guadalupe Station padulong ngadtos Fort Bonifacio? Apan niining skytrain, kuhaon ra nag lima ngadto sa unom ka minuto! Ing-ana ni kamoderno, kabahin sa advance technology sa natad sa transportasyon.
Hinuon, kining matanga sa automated-propelled monorail nauna nang nanggula sa dagkong mga nasod, ilabi nas Japan ug China. Makabenepisyo gayod niini ang kapin kun kulang usa ka gatos ka libo (100,000) ka pasahero matag adlaw dinhis Metro Manila ug kasikbit nga mga lungsod.—